1 Kaibaiba, handih pinghanah inaliyak hinan nuntuttuduh mipanggep hi pangi-en Apu Dios ya uggek ingkalih umat nah pungkalkallin di makahhapit weno hay pungkalkallin di ohan nakannomnoman 2 te bokon hay laing kun kumaliy dayawon yu, te hay ninomnom kun ipaanhan an ipainila ya hi Jesu Kristo ya hay natayanah krus. 3 Handi ya kumakkaguwak an maid di dinol kuh adol ku ya kumanobkobak te makudang di kabaelak an muntuttudu. 4 Ya hay pungkalkallik handih nuntuttuduwak ke dakayu ya adi umat hi pungkalkallin di makahhapit, mu naawis kayu te hay kandaman nan Espiritun Apu Dios. 5 Kinali hay pangulug yu ya ugge nipuun hi kinalaing weno adal di tagu, mu nipuun hi kandaman Apu Dios. 6 Man-u po hanadah nahamad moy pangulug da te hay panuttuduk ke dida ya umat nah panuttudun di nalaing, mu hay kinalaing kun muntuttudu ya ugge nipuun hi kinalaing di tagu tuh luta weno aap-apun mapoppog di pun-ap-apuwan da, 7 mu nipuun hi kinalaing Apu Dios. Kinali hay ituttuduk ya mipanggep hi kinalaing na an numplanuh ahi taku kidayawan. Hituwe ya plinanu na tuwali handi ot ahi mawada hanadan lintuna, mu uggena impainila ingganad uwani. 8 Maid di nanginila hanadah ap-apun di tatagud uwani ketuwen plinanun Apu Dios, te kon gulat nat inilada ya uggeda ot impipatak hi krus nan madayaw an Apu taku. 9 Mu athinay naat ta mipaannung nan impitudok Apu Dios an kananay "Maid di ohah nanibo, nangngol ya nunnomnom nah plinanun Apu Dios an kiphodan hanadan naminhod ke hiya." 10 Mu ditakun mangulug di nangipainilaan nan Espiritun Apu Dios kediye te inila nan am-in, takon di nganneh diyen wadah nomnom Apu Dios. 11 Ditakun tatagu ya adi na-ala on inilan di udum an taguy wadah nomnom taku te ditaku ya abuy nanginilan diye. Ot namam-ay nomnom Apu Dios an hay Espirituna ya abuy nanginila. 12 Ya hay gapuh nawadaan nan Espiritun Apu Dios ke ditakun mangulug ya maawatan takun am-in di ibaddang Apu Dios ke ditaku gapuh homok na. Ta hidiye nan, adi taku un-unudon di pangi-en nadan adi mangulug. 13 Hay itanuttudu mi ya nalpu nah Espiritun Apu Dios, kinali bokon hay kinalaing di taguy pundinolan mi, mu nah Espiritun Apu Dios an wadan ditakun mangulug. 14 Mu nan tagun adi mangulug ke Jesu Kristo ya maid di Espiritun Apu Dios ke hiya, kinali adina abuluton nan mituttudun malpuh Espiritun Apu Dios. Adina maawatan datuwen mituttudu te kah-in di waday Espiritun Apu Dios ke hiya ta ahina maawatan. 15 Hanan tagun waday Espiritun Apu Dios ke hiya ya inilanay maphod ya adi, mu hanadan adi mangulug ya adida maawatan di pangi-e ya punnomnom nan tagun waday Espiritun Apu Dios ke hiya. 16 Hituwey nitudok an kalin Apu Dios. Kananay "Maid di nanginilah nomnom Apu Dios, kinali adinadaman waday mangituttuduh atona." Mu ditakun mangulug ya umat hi punnomnom Kristoy punnomnom taku.
