ROMANOS 15

1Nane Jesumo àùnotùnuiaùmona dámùerie ñue ràinorede. Jùáùmacù fùgo comécùna náùnidiaùoù. Caù ja comécùna ràinoredùnodùcaù, íemona naù comécùna ràinidùnona canóredùcaù. Afefue caùmo llonódacaigafue. Afedo danù caù abùna ióbitanidùcaù. 2Cáùmona illa dàgamùe ie àùnote ámana ióbitarede, afémùe ñue íllena. Daje izói íena Juzíñamuimo aillo àùnotaredùcaù. 3Mei Cristo dama ie abùri ióbillena jenóñede. Mei jùáùfodo Juzíñamui Cuegáuai íemo zúilla. Afe uai daùde: “Afe báñoridùno Juzíñamui jùáùma báñoa cuemo baite.” 4Nana jaiai uícodo Juzíñamui Cuegáuaillaù caù llófuellena cuega. Aféuaimo caù comecù fàraja uai baitùcaù. Afe izói bíuai caù facáduamona comecù járitañenafue caùmo comuide. Iemona Juzíñamuimo ùco caù nabáirizaillùruimo ocuíridùcaù. 5Juzíñamui afe comecù járidoñenafue llotàmùe. Daje izói afémùe, caù comecù fàrajano caùna náùretade. Iemona omoù ie canóllena afémùemo jùcádùcue, illa dàgamùe jùáùmaùaùri dájena caùmare omoù íllena. Mei Cristo Jesús daùí caùna dáùdeza. 6Afe llezica, dájena omoù comécùillena íemo jùcádùcue, caù Ocuíraùma Jesucristo Moo Juzíñamuina dáauaido omoù caùmátaitallena. 7Mei daùí Cristo caùmare caù uáidua izói, afe izói conímana caùmare omoù uáidori, Juzíñamuimo ebíredùfue nitállena. 8Mei bie cue daùna uai: Cristo judíuaù ñue fànuaùbite. Nana Cristo táùjùna fueñe judíuaùmo dúide, caù nanóidùgùmana daùna uai ñue fuitállena. Afedo Juzíñamui ie méidoñega llogáuaina caùmo jino ácatate; mei Juzíñamui afe ie daùna uai jaca jùáùfodo méidofùnideza. 9Daje izói judíoñedùno Juzíñamuimo ióbillena Cristo ana bínùemo bite. Iemona Juzíñamui íaùoùmo dúecaillari ióbidiaùoù. Juzíñamui Cuegáuai jaiai uícodo daùí daùde: Ie jirari afe izói judíoñede náùraùaù càgùri omo caùmátaitùcue. Omo ñúefue cue nitalle rua afémacù càgùmo róitùcue. 10Ie mei jùáùnomo Cuegáuai daje izói daùde: Judíoñede náùraù mai omoù cáùmacairi, naa Juzíñamui imácùaùri. 11Nane jùáùnomo Cuegáuai daje izói daùde: Naga judíoñede náùraù, caù Ocuíraùma ióbiri. Mei afe Juzíñamui jamánomoidùmùeza, íemo omoù ióbiri. 12Mei daje izói Isaías cuete: Isaí (illaùma David moo) ie méifomo comuídùgùmamona jamánomoidùllaùma cómuite. Afémùe nana judíoñedùno càgùri illáùmaite. Afe comùnù afémùemo ocuíritiaùoù, daùde. 13Juzíñamui caùna íemo ocuíritaite. Ie jira íemo omoù àùnuamona ñue cáùmafue jeire omoù óllena, afémùemo jùcádùcue, daje izói omoù comecù caùmare uái illafue jùcádùcue. Afe llezica Juzíñamuimo omoù nabáirizaillena birui jabo ocuíridùomoù. Afemona Ñuera Joreño ràinodo ñue izire omoù ocuírillena Juzíñamuimo jùcádùcue. Mai mei daùí Juzíñamui ómoùna ñue ézùcùiteza. 14Cue ámatùaù, ñue onódùcueza, ñúefuiaùna jeire otàomoù naa omoù fùbítainafuiaùri. Daje llezica illa dàgamùe jùáùmacùna caùmare llófuiana onódùomoù. 15Mei íadù bie cue cuegábedo, bíuaillaù ómoùmo ùere jino uáfodo cuetùcue, afe uáillaùna omoù féitañeillena. Juzíñamui cuemo dúecaillano cuemo jóonenocaigafue jino llotùcue. 16Bie cue táùjùnafue: Juzíñamui lloga caù jílloillùfue ómoùmo cue lluájillena. Afefue ómoùmo llotùcue, Juzíñamui íena omoù maméillena, mei judío imácùñedùomoùza. Ie mei, Juzíñamui ómoùna caùmare uáidoite, mei omoù ja Ñuera Joreño ñue fùnócaomoùza. 17Mei daùí dama Jesúsmo cue àùnuamona, Juzíñamuimo cue táùjùnafueri ióbillano caùmare itùcue. 18Dama Cristo cuedo fùnócafuiaùri llócaitùcue, mei áfedo judíoñedùno Juzíñamui uaina jeire otátatùcueza. Jùáùmùe táùjùnafuena jaca jino llócaiñeitùcue. Afe íaùoù Juzíñamui uaillaù jeire ua, cue daùna uáillaùdo jino ñue àcoùmo fuitádùcue. Daje izói cue ñue táùjùnado íaùoùna ñue jaàcùna àùnotadùcue. 19Afe izói jino cue càotaga uaido comuítaga cùóraùnina ráamona íemo jùáùe onóillena fùnócafuiaùri, íaùoùna ñue jaàcùna àùnotadùcue. Daje izói Ñuera Joréñomo ite ràinodo íaùoùna ñue jaàcùna àùnotadùcue. Bie izói cue fànuamona Jesucrístodo caù jílloillùfue lluájillena ja ñue àcoùmo fuitádùcue. Ua Jerusalémona oni jùca nágagobiaùdo aféfuena llócaidùcue. Ua àcoùmo Ilírico énùemo záitajidùcue. 20Afe daùí, naù jaca Cristo mámecùna cacáñedùnuiaùmo, afe ñuera caù jíllonafue llócaidùcue. Daùí oni jùcado llócaidùcue, jùáùma jae llógamo dáanomo nane cue llóñeillena. 21Mei íadù Juzíñamui jaiai Cuegáuai daùna izói: Juzíñamui ífuena naù lloñéganuiaù afémùena ñue ónoitiaùoù. Daje izói jaca íena cacáñedùno nane aféfuena como fàdùitiaùoù, daùde. 22Dùga icaiño omoù uáiduaillena comecù facáfùredùcue, íadù jaca jáinidùcue. Mei como ómoùmo cue lloga oni nágagobiaùdo cue llócaigafuemo záitaiacadùcueza; bínidùcue. 23Mei ja birui bígobiaùdo cue táùjùcana ja fuitádùcueza. Jaiai dùga fùmónaùaù omoù dùga íacadùcue. 24Ja birui Espáñamo cue jáizailla llezica ómoùna méiñuaùbiacadùcue. Omoù càgùri cue illa llezica, ùere caùmare íitùcue. Afe mei Espáñamo cue jáiacana llezica, omoù cue canóllena jítaitùcue. 25Mei íadù birui fueñe Jerusalemo ite ámatùaù canollena raa úitùcue. 26Macedonia énùe imacù, naa Acaya énùe comànùri, Jerusalemo ite dúeredùno canolle úcube ofítallena maméritiaùoù. Afe íaùoù ofítaga úcube cuedo Jerusalemo óreitiaùoù. 27Afe bie úcube oréllemo ñue comécùidiaùoù. Mei jùù, afefue ñue jaàcùna joide. Uafue benó itàmacù afémacùmona aillo comecù cáùmafuiaù ùbáñeno itíaùoù. Iemona birui Jerusalemo ite àùnotùnomo raùre ùballe ite. Ua judíuaùmo ite Jesumo àùnotùno, íaùoùmo ite comecù cáùmafuiaù, jae judíuaùñedùnomo dájeze fecádiaùoù. Iemona benó Macedóniamo ite àùnotùno naa Acaya àùnotùnori, judíuaùmo ite àùnotùnona, afe ùbana íaùoùmo ite úcubedo canóacadiaùoù. 28Bie íaùoù afémacù cánua mei, afe izói íaùoù jóonega úcube cue izájille mei, Espáñamo jáitùcue. Ua omoù uáidocana afénomo jáitùcue. 29Ñue onódùcueza, omoù càgùri cue dúcùille llezica, nana Cristo uáimona comuide cáùmafuiaù ómoùmo llófueredùcue. 30Amatùaù, caù Ocuíraùma Jesucristo mámecùdo izire ómoùmo jùcádùcue. Daje izói Ñuera Joreño caùmo comuítaga izíruillafuedo izire ómoùmo jùcádùcue. Mai, cue dùga dájena omoù iri, Juzíñamuimo dájena caù úrillena. Juzíñamui cue canólleza, mai izire omoù jùcari. 31Dùnó Judea énùemo ite àùnoñedùno cue íaùoù llaùtáacanamona cue ie zuitálleza izire Juzíñamuimo jùcari. Afe llezica bie cue uiga Jesumo àùnotùno canolle úcube caùmare íaùoù llàùnolleza, daje izói Juzíñamuimo omoù jùcari. 32Bie Juzíñamuimo omoù jùcáfùreillùfuiaù ómoùmo jóonenocaidùcue, Juzíñamui comecù jítaina izói omoù illánomo caùmare cue dúcùillena. Afe mei omoù càgùri nano áùnori cue ílledo cue comecù ñue náùreite. 33Mai, comecù caùmare uái illáfuena fecade Juzíñamui omoù ñue nábaiteza. Daùítadeza.

will be added

X\