FILIPENSES 4

1Cue izíruiga ámatùaù, mei ómoùna ùere cùóiacadùcue. Omoù cue ióbioinamacùdùomoù. Iemo cue jùrídolle raa izóidùomoù. Ua cue izíruigamacùdùomoùza; mai caù Ocuíraùmamo jaàcùna rùire omoù comécùoiri. 2Evódiana mámecùredùngo íemo Síntique dùga, izire jùcádùcue, dáafuemo ómùngo comécùiri. Mei caù Ocuíraùmamo jaùnáinamona ebúñona maméidùomùngoza. 3Daje izói jùáùmùemo úritùcue. O, cue táùjùnado jaca ñue cuena nabáidùo. Ua cue àùnoga nábaidùo. Jira bie caù miràngotùaùna o canótaitùcue. Mei afe íaùnguaù cúeoùri afe jíllona uai cue llócainado nàcùdocaidiaùnguaù. Bíaùnguaù, Clemente dùga naa jùáùmùeoùri cúeoùri táùjùcadiaùoù. Nana afémacù mámecù ja Juzíñamui zíiñona illùno óitùno mámecù cúeinanicomo cuega. 4Nágaruillaùdo caù Ocuíraùmamo mai omoù caùmátaioicairi. Nane dáanomo daùdùcue, mai caùmátaioicairi. 5Omoù comecù mánaùna naga cómemo, mai càotaitùomoùza. Caù Ocuíraùma billàruimo áùnozideza. Caù áùnori íteza. 6Omoù comecù nàfuemo járitaitañeno iri, mei jùáùfodo naga ómoùmo comuídùfuiaùna Juzíñamuimo úrilla llezica, afémùemo mai omoù lloiri. Daje izói omoù jitailla raana jùcari. Afe llezica “Ùere fùgora” mai omoù daùífùreri. 7Ie mei Juzíñamui comecù caùmare uái illafue ómoùmo íiteza. Bie comecù uái illafue comùnù onoiga táùnofue baùmo ñuera. Afe caùmare uái illafue omoù comécùna ñue ráiruite. Daje izói omoù comecù jarire úrillafuena ñue manánaitaite. Mei Cristo Jesumo daane jáùnaitùomoùza. 8Cue ámatùaù, íiraùcaiño omoù llóitùcue. Nana nahí uáfuiaùmo omoù comécùiri. Daje izói nahí caùmare jacàruioigafuiaùmo omoù comécùoiri. Daje izói nana jaàcùna illáfuiaùmo omoù comécùiri. Afe izói nana àaùnidùfuiaùmo omoù comécùiri. Daje izói nana ióbillafuiaùmo omoù comécùiri. Daje izói nana caùmare jalléinafuemo omoù comecù uibíoiri. Nana bie ñúefuiaùmo omoù comécùoiri. Daje izói nana ñúefuena nitáfùreganomo afémacùmo omoù uibíoiri. 9Omoù cue llófuia izói mai omoù iri; ómoùmo cue lloga lletárafuiaùmo mai omoù àùnori. Cue dáùnana omoù cacana izói, cue fùnócana omoù cùona izói, afe izói mai omoù iri. Iemona comecù caùmare uái illafue fecáfùrede Juzíñamui omoù dùga ífùreite. 10Meine nane cuemo omoù comécùillari caù Ocuíraùmado ùere ióbidùcue. “¿Nùbái mei cuena féitatùomoù?” ómoùna daùíacañedùcue. Cue omoù canóacana raa átùitùmùe iñédeza, onódùcue. 11Cue ráaninari ómoùna fùeni úacaiñedùcue; cuemo ite raari cue ióbillana ja fùbídùcue. 12Duere cue íllana fùbídùcue. Daje izói aillo cue jitaica ráanùaù íllana fùbídùcue. Nùfue cuemo comuíadù, afe izóidùfue cue ocuíllana ja fùbídùcue. Nùbaù jeàredùcue, nùbaù jufíruitùcue; afe izói caùmare cue íllana fùbídùcue. Güiga alla cuemo íadù, mei cuemo iñéniadù daje izói ñuera. 13Naga cuemo eróicana comuide raana ocuíredùcue; mei Cristo cuena ràiduado ocuíredùcue. 14Mei íadù cue dúerena llezica cuemo omoù dúecaillamona, cue omoù cánua ñuera. Dùga icaiño duere cue fùnóinari omoù zúunailla cuena náùcaitade. 15Omoù Filipos imácùdùomoùza, daje izói bífuena onódùomoù. Nano fueñe jíllona uai cue llócaina llezica, daade cue canófùredùnodùomoù. Ua Macedóniamona oni jùáùnomo cue jailla llezica daade cue canode Jesumo àùnotùnodùomoù. Fia fecaca ráanùaù cuemo oréfùredùomoù. Afemona comànùmo cue feca izói, íemo íaùoùmona cue llàùnua izói, afe dájemo naa ómoùri táùjùdùnodùcaù. 16Naù Tesalónicomo cue illa llezica, omoù dùga ícaiño, fia fecáfùreiga ráanùaùna cue jítaicanùaùna cuemo orédùomoù. 17Fia ráanùaùna cue llàùnoiacanamo comécùiñedùcue; mei íadù cue comecù jítaillafue, Juzíñamui uiécomo ómoùmo aillo ii, daùdùcue. Iemona daùí aillo omoù ofítaga raana uire maiñóritùomoù. Afemo comécùidùcue. 18Mei nana jae cue llàùnoga. Afena cue jitaica ráanùaù baùmo ja llàùnotùcue. Epafrodítodo cuemo omoù oreca ráanùaù fùgo baite. Baùmo cue jitáillena iñede; ja aillo íteza. Cuemo fia omoù oreca ráanùaù ùere Juzíñamuina ióbitade. Daùí cuena omoù cánuado, Juzíñamui comecù jítaina fùnódùomoù. Aferi Juzíñamui ióbicaillano afémùe áfena jeire ote. 19Cue àùnoga Juzíñamui nana omoù jitaica raana ómoùmo fécaite, mei nana Cristo Jesús ebire comuítaga ráanùaù Juzíñamuimo dúideza. Ie jira íemo aillo ite ráanùaù izói, afe izói ómoùmo fécaite. 20Mei ñuera ebíredùfue caù Moo Juzíñamuimo jaca íoicaideza. Daùítadeza. 21Cue dùbénedo nana Juzíñamuimo jaùnáidùno Jesucristo mámecùdo omoù uáidori. Cue dùga ite caù ámatùaù ómoùmo uai orédiaùoù. 22Nana benomo ite Juzíñamuimo jaùnáidùno daje izói uai ómoùmo orédiaùoù. Romano nahíllaùma jofomo itùno ùere ómoùna izire uáidoiacadiaùoù. 23Caù Ocuíraùma Jesucristo nana ómoùna ñue ézùcùiteza. Mai daùítadeza; ja nùùe.

will be added

X\