GALATAS 4

1Bie izói cue daùíacanafue: Daa come jitó móonaillano, ie moo tàilla mei, moo raana náamatarede. Mei íadù afémùe naù úruena llezica maiñónide. Afémùe naù jofo eromo ocuífùregamùe izoide, afémùe nana afeco raana maiñóreite íadù. 2Afémùe naù úruena llezica, íena úiñoitùno ite, ie moo jùáùfodo ie úiñotùnomona oni olle dùno. Daje izói ie jetállùfue ocuídùno ite. 3Jaca bie izói caùmo comuífùrede. Caù jílloillùuai naù déiñena llezica, naù úrue illa izóidùcaù. Aféruillaùdo aillo bínùe comùnù nàcùdogafuiaù anamo, izire ocuícano izói, itùcaù. Dáarie cómemona ocuica uáillaùdo llavécacaù. 4Mei íadù nana Juzíñamui mamécafuiaù ñue zuilla mei, jaiai uícodo ie mámiarui dúcùamo, Juzíñamui ie Jitó Jesús orede. Afémùe rùngómona jococa. Moisés ocuica uai anamo judío izói comuízaùbite. 5Afémùe daùí bite, nana Moisés ocuica uáillaùdo llavécano aféuaimona oni jàrecaitallena. Daùí caù jàrecaillamona Juzíñamui dama ie jitótùaùna caù jáillena caù mámiano, caùmare caùna uáidoite. 6Iemona, ie jitótùaù omoù íllana omoù onóillena, Juzíñamui ie Jitó Jesucristo Joreño omoù comécùmo orede. Afe caùmo oreca ie Joreño rùire daùífùrede: “¡Cue Moo!” daùde. 7Mei daùí o ja Juzíñamui jitódùo. Ja rùire ocuícamùeñedùo. Ie jitona o íllamona, ie uícodo lloga ñúefuiaùna Juzíñamui Crístodo omo fécaite. 8Naui Juzíñamuina naù omoù onóñena llezica, taùno juzíñamuillaùmo izire ocuífùreganodùomoù. Afe omoù llaveina juzíñamuillaù ua juzíñamuiñede; fia jàfuia juzíñamuillaù. 9Mei birui ja ua nahí Juzíñamuina onódùomoù. Mei jùáùfodo ñue daùna, Nahí Juzíñamui ja ómoùna onode. Ja íena omoù onónamona, ¿nùé izói meine abùdo afe ràinide jílloñenafuiaùna jeire óiacadùomoù? Dáanomo íaùoù llavéinanomo ¿meita abùdo jáiredùomoù? 10Dùga iruillaù oni jùáùfodo naù comécùifùredùomoù. Daje izói dùga fùuíllaù eneno jùáùfo comécùifùredùomoù, naa dùga fùmónaùaùri. 11Nùbaù nana omoù càgùri cue táùjùacana táùnomo jùfánofide izóideza áfena jacàruitùcue.. 12Amatùaù, izire jùcádùcueza: Cue comecù ifue illa izói, mai meine afe izói omoù iri. Mei cue omoù illa izói jae itàcueza. Mei omoù cuemo mùnàca fùénidùfuena fùnóñedùomoùza. 13Cue omoù càgùri nano illáfuena onódùomoùza. Aféruillaùdo, cuemo comuide duícori duere cue zefuíllamona afe jíllona uai jino ómoùmo llotùcue. 14Afe cuemo ite duico cue facátaina, mei íadù afe jira cuena jámairuiñedùomoù. Daje izói cuena ruifíruiñedùomoù. Mei jùáùfodo Juzíñamui abù ímùe izói caùmare cuena llàùnotùomoùza. Ua Jesucristo omoù llàùnolle izói cuena caùmare llàùnotùomoù. 15¿Nee mei afe omoù cacana cáùmafuiaù? Afe cue ùrárenaruimo cuena ùere izíruillano, danù omoù uíjùna jùrénota cuemo fecáacadùomoù, íadù fecánide. Afe ñúefue omoù dùbénemo nitáredùcue. 16Ja ua uai ómoùmo cue llúamona ¿Meita ja birui omoù bacáuai ímùena jáidùcueza? ¡Ieñedeza! 17Afe baie jùcana bite comùnù ómoùmo ùere caùmare comécùidiaùoù. Mei íadù comecù ñue jítaillamo comécùñediaùoù. Omoù bífuellena caùmare úritiaùoù. Afémacù cúemona ómoùna baùróacadiaùoù, uire íaùoùmo omoù jaùnáillena. 18Jùáùmacùmo ñue íllena caùmare comécùillana ñuera. Mei íadù cue illa llezica daje izói cue iñena llezica come comecù ñue jítaillamo daùí comécùirede. Daùítadeza. Naui omoù càgùmo cue illa llezica, afe onínemacùdo daùí jàfuefiñedùomoù; mei íadù birui omoù càgùmo cue iñena llezica nágarui jaca daùí jàfuegaomoù. 19Cue úruiaù, rùngo úrue jocóacania duere zefuilla izói, nane ómoùri duere zefuídùcue. Ua Cristo comecù ifue naù omoù ñue ónoñeille dùno, naù ómoùri duere zéfuitùcue. 20Birui izire omoù càgùri íacadùcue, jùáùfodo ómoùmo cue úrillena. Onóñedùcueza, nùé izói ómoùri comécùitùcue. 21Ja birui Moisés ocuica uai anamo íacadùnomo úritùcue. Mai bifue cuemo omoù llone: ¿Afe ocuica uai dáùnana cacáñedùomoù? 22Afe uai daùde: Abraham mena jitórede. Daa jitó ie táùjùtafùregango ie. Jùáùe jitó ie nahí aù ie. Afengo buna ócuiñegango. 23Ocuífùregango jocócato nana bínùemo ite úruiaù jócua izói jococa. Mei jùáùfodo nahí aù jocócato Juzíñamui uícodo daùnáuai fuitállena jococa. 24Bifue caù onoiga ráamona Juzíñamui caù fùdàtafue. Afe mena rùngo mena contrátomo táùjùna izóidiaùnguaù. Iaùnguaùmona daa Sinaí idu ie contrato izoide. Afe ocuífùregango jitótùaù ocuífùreillùnona jocócaiaùoù. Afe ocuífùregango mámecù Agar. 25Afe Agar Juzíñamui Sinaí ídumo lloga uai izoide. Afe Sinaí idu Arabia énùemo ite. Afénomo Juzíñamui contrato comànùdo fùnode. Biruillaù Jerusalén jofue afe jaiai Sinaí idu izoide, . Ie ocuica uai anamo llavécanona itíaùoù, naa aféfuemo jaùnáiacadùnori. Ocuífùregango Agar úruiaù izóidiaùoù. 26Mei íadù monamo ite Jerusalén comùnù lláveñegaiaùoù. Afe jofue caù ei izoide, mei caù bie afe Jerusalemo jaùnáidùnodùcaùza. 27Juzíñamui Cuegáuai bie izói daùde: Oùniño, úruenidùo íadù, mai caùmare o iri; Urue jócua izírenafuena onóñedùngo, mai caùmare o róiri. Mei úrue jocóñena jira dotácango, ñue ogángo baùmo jitótùaùreitùo, daùde 28Amatùaù omoù cácarei, caù bie Sara jitó Isaac izóidùnodùcaù. Juzíñamui uícodo lloga jitótùaùdùcaù. 29Mei jaiai aféruillaùmo íaillùnoù illa izói, birui afe izói itùcaù. Aféruimo come comecù jítainamona jocócamùe Ismael, afe Juzíñamui Joréñodo jocócamùe Isaac fùénidùfuena racade. Biruillaù afe izói itùcaù. 30Mei Juzíñamui Cuegáuai ¿nùé izói daùde? Afeuai daùde: “Afe jofo ero ocuífùregangona ie jitó dùga oni oreri. Mei ocuífùregango jitó, afe ócuiñegango jitó dùga dájena jofo naama fecù ráanùaùna maiñónideza.” 31Amatùaù, bífuemona onódùcaùza: Caù bie ocuífùregango jitó izóiñedùcaù, mei jùáùfodo caù bie buna ócuiñegango jitó izóidùcaù.

will be added

X\