1 TIMOTEO 2

1Fueñe ona dáùitùcue: Mai nana comùnù íena Juzíñamuimo o jùcáfùreiri. Afena Juzíñamuimo àùnotùnona o lloiri. Iemo jùáù, izire comànùmo ie dúecailleza mai jùcari. Daùí nana comùnù íena Juzíñamuimo o úrifùreiri. Afe llezica nana comànùdo afémùena ùere fùgora o daùífùreiri. Daùí féitañeno nana comànùdo Juzíñamuimo ñue úrifùreiri. 2Gobierno oreca omoù úiñotùmùe íena Juzíñamuimo jùcáredùo, naa jùáùe jaboide illaùnù dùga. Afémacù íena izire o jùcari, áfedo nàfuenino caùmare caù íllena. Daje izói comecù ñue uái illáfuemo íredùcaù. Afe daùí caù jàcamona nana caù illáfuena Juzíñamuimo ñue mámeitùcaù. Daje izói conima dùga comécùna ñúeitùcaù. 3Bifue ùere ñuera, caù jíllotafùrede Juzíñamuina ñue ióbitade. 4Mei afémùe comecù jitáinafue nana comànùna jílloiri, daùde. Daje izói afémacùna ua ráfuena onoiri, daùde. 5Caù Juzíñamui jaca dáadeza. Daje izói Juzíñamui eróicana caùna ñue fùnódùmùe caùdo úritùmùe daade. Afémùe Jesucristo. Afémùe àaùfuenidùmùe íadù, caù izóidùmùe. 6Juzíñamui mamécaruimo dúcùamona Jesucristo ie abùna éeruiñeno nana caù jílloillùno ùbana izájiga. 7Iemona nana judíoñedùnomo afe Juzíñamuimo àùnolle ua ñúefue cue llófuiaillena orécacue. Daùí jíllona uai lluájifùredùmùena jóonegacue. Crístomo cue àùnuamona táùnofue lloñédùcueza, uafue llotùcue. 8Ie jira nágagobiaùdo naga cómena: Juzíñamuimo omoù úrifùreiri, daùdùcue. Ñue nàfuenide comécùdo omoù jùcari. Jùáùmamo ràicaiñeno comécùdo Juzíñamuimo omoù úriri. Daje izói danù ómoùmo júfidoñeno comécùdo íemo omoù jùcáfùreiri. 9Daje izói rùngónùaù ùniroi jùtállùfue llóitùcue. Jabóidùngo rùngo jùta izói, naga rùngo jàtaiteza. Ùima jùruídollena jùtaca abùna càoitate ùníroina, jùtáñeno iri. Daje izói comùnù càodollena ùfótùraù jamánomo ebire fùnóñeno iri. Jabo ùfo jua fùgona. Daje izói quenírede raana aillo jùróñeno iri, naa jamánomo ráifide ùniroi dùga. Jámaicuiro jùtáoirena. 10Mei jùáùfodo comànùmo dúecailla ñúefuiaùdo naga rùngo fùnóbiri, naa jùáùe caùmare uáiduafuiaù dùga. Mei nana Juzíñamui íeùena ñue fùnódogango bie izói íteza. 11Rùngónùaù llófueinamo uai oñeno cacáreitiaùoùza. Comecù mánaùnafuedo afe uaina onóicaitiaùoù. 12Naùraù càgùri rùngo llófuellena rairuídùcue. Rùngo ùímana anáfenotañedùcue. Mei jùáùfodo, rùngo ùima anamo úriñeno uái iri, daùdùcue. 13Mei Juzíñamui nano fueñe Adán fùnódeza, afe méifomo Eva fùnode. 14Adán jàfueñega, mei íadù rùngo Taùfe jàfuega. Iemo jàfuefillamona afengo fùénidùfuemo baùíde. 15Mei íadù naga rùngo Juzíñamuimo àùnogafuemo jeire oíadù, íemo ei ocuícafuiaù ñue àcoùmo fuitáadù afengo jílloite. Afe llezica afengo naga cómena izíruirede. Iemo comecù ñue fànuafue dùbénemo írede. Daje izói ñue jaàcùna macállùfuemo írede.

will be added

X\