Mateas 2

1Maŋ ko̱ ne̱ ba te̱e̱ mò̱ ɛ Bɛte̱lahɛm ne̱ ɔ bo̱ Yude̱ya swe̱e̱re̱ se̱-ɔ-rɔ ne̱ Mariya a ko̱we̱ Yeesuu. Saŋ amo̱-ɔ ɔnyare̱ ko̱ ne̱ ba te̱e̱ mò̱ ɛ Hɛrɔd-ɔ e̱ gye̱ owure. A mo̱ŋ kyee ne̱ afɔ ko̱ a le̱e̱ kyɔwe̱ le̱e̱kpa a ke̱be̱gya-ɔ ba Yɛro̱salɛm. Afɔ mɔ gye̱ anyiase̱ŋpo̱ ko̱ ne̱ ba de̱e̱re̱ akye̱e̱kpagyi ba pini amo̱ ase̱ŋ-ɔ. 2Ne̱ baa bise Owure Hɛrɔd-ɔ fe̱yɛ, “Ŋke̱e̱ kayaagyi ne̱ baa ko̱we̱ mò̱ na ɔ bo̱ gyi Yudaa awuye kuwure-o. Bo̱ le̱e̱ fe̱yɛ ane̱ a ŋu ke̱kye̱e̱kpagyi ko̱ a le̱e̱ kyɔwe̱ le̱e̱kpa, ne̱ ke̱ e̱ kaapo̱ ane̱ fe̱yɛ baa ko̱we̱ owure. Ne̱ ane̱ a ba a ane̱ bo̱ suŋ mò̱.” 3Owure Hɛrɔd a nu amo̱-ɔ, ne̱ mò̱ aa Yɛro̱salɛm awuye pɛɛɛ iduŋ a te̱ŋ bamo̱. 4Ne̱ ɔɔ te̱e̱ Wuribware̱ alɔŋŋɔpo̱ abre̱sɛ na Wuribware̱ mbraa akaapo̱po̱ pɛɛɛ bo̱ gyaŋŋe̱. Bamo̱ a gyaŋŋe̱-ɔ, ne̱ oo bise bamo̱ fe̱yɛ mfe̱ne̱ ne̱ ba ba a bo̱ bo̱ ko̱we̱ ɔko̱ ne̱ ba te̱e̱ ɛ Kristoo ne̱ Wuribware̱ yɛ o suŋ a ɔ bo̱ kyo̱ŋwe̱ Yudaa awuye-o. 5- 6Ne̱ baa lee kanɔ fe̱yɛ, “Bɛte̱lahɛm ne̱ ɔ bo̱ Yude̱ya swe̱e̱re̱ mɔ se̱-ɔ-rɔ ne̱ ba ko̱we̱ mò̱. A le̱e̱ fe̱yɛ Wuribware̱ a akyaamɛɛ-ɔ ɔko̱ a kyo̱rɛɛ waa abware̱se̱ŋ wo̱re̱-ɔ-rɔ fe̱yɛ, ʻWuribware̱ yɛ, Bɛte̱lahɛm maŋ, hare̱e̱ fo̱ a gye̱ Yudaa swe̱e̱re̱ se̱ a e̱maŋ-ɔ-rɔ kagyingyii-o gbaa ooo, e̱mo̱ agye̱ŋkpɛɛpo̱-ɔ ase̱ fe̱raa fo̱ gye̱ ɔdabe̱, a le̱e̱ fe̱yɛ fo̱-rɔ ne̱ ɔko̱ ne̱ o kii ɔyaale̱ŋpo̱ na mò̱ ase̱sɛ Isireelii awuye pɛɛɛ ɔde̱e̱re̱se̱po̱-ɔ e̱ le̱e̱ a ɔ ba.ʼ” 7Owure-o a nu amo̱-ɔ, ne̱ ɔɔ te̱e̱ anyiase̱ŋpo̱-ɔ lee keri si, ne̱ oo bise bamo̱ saŋ ko̱ŋko̱ ne̱ ke̱kye̱e̱kpagyi amo̱-ɔ a le̱e̱-ɔ. 8Ne̱ baa tɔwe̱ saŋ-ɔ gywii mò̱. Mò̱ a nu bo̱ le̱e̱ bamo̱ ase̱-ɔ, ne̱ ɔɔ tɔwe̱ gywii bamo̱ fe̱yɛ, “Mo̱n' ya buwi kpa kayaagyi-o Bɛte̱lahɛm maŋ-nɔ. Mo̱ne̱ ya de̱ŋ ŋu mò̱, na mo̱n' sa a n nu, na mo̱-ɔ mɔ ŋ nya ya suŋ mò̱.” Ne̱ ɔɔ sa bamo̱ kpa a bo̱ yɔ. 9- 10Bamo̱ a me̱raa se̱ ba yɔ-ɔ, puri-ro ne̱ baa be̱e̱ ŋu ke̱kye̱e̱kpagyi ne̱ baa dɛɛ ŋu kyɔwe̱ le̱e̱kpa a ke̱be̱gya-ɔ, ne̱ bamo̱ akatɔ a gyi bwe̱e̱tɔ. Ne̱ ke̱kye̱e̱kpagyi-o a gye̱ bamo̱ ŋkpɛɛ ane̱ŋ-aaa ya fo̱ lɔŋ ne̱ kayaagyi-o bo̱ mò̱-rɔ-ɔ, ne̱ kaa sii ye̱re̱ awo̱re̱-rɔ lɔŋ amo̱ so̱so̱ kyɛɛkyɛɛ. 11Bamo̱ a lwee lɔŋ-ɔ-rɔ-ɔ, ne̱ baa ŋu kayaagyi-o na mò̱ nyi Mariya. Ne̱ baa kpuni aŋuri suŋ kayaagyi-o, ne̱ baa buŋŋi bamo̱ adakaa se̱, ne̱ baa lee atɔ dame̱naŋsɛ ne̱ amo̱ yawo̱ kyɔ-ɔ bo̱ ke mò̱. Amo̱ e̱ gye̱ atanne̱ pipee, na laŋpe̱ŋtaa kywɛɛsɛ, na laŋpe̱ŋtaa ne̱ ɔ gya fe̱yɛ kakyanne̱-ɔ. 12Ne̱ Wuribware̱ a tɔwe̱ gywii bamo̱ dee-ro fe̱yɛ bo̱ ma lɛɛ kiŋŋi yɔ Owure Hɛrɔd ase̱ ya tɔwe̱ ke̱tɔ ne̱ baa ŋu-o gywii mò̱. Amo̱se̱se̱-ɔ, ne̱ baa kiŋŋi bo̱rɔ kpa baŋbaŋ yɔ bamo̱ aye̱. 13Anyiase̱ŋpo̱-ɔ a yii-o, kamɛɛ-rɔ ne̱ Wuribware̱ kabɔɔ ko̱ a le̱e̱ Yo̱sɛf si dee-ro, ne̱ ɔ yɛ, “Ko̱so̱, taa kayaagyi-o na mò̱ nyi na fo̱ se̱re̱ yɔ Igyipiti swe̱e̱re̱ se̱. Mo̱n' kye̱na mfe̱ŋ ane̱ŋ-aaa bo̱ fo̱ saŋ ne̱ m be̱e̱ mo̱ e̱ tɔwe̱ a n gywii mo̱ne̱ fe̱yɛ mo̱n' le̱e̱ mfe̱ŋ-ɔ, a le̱e̱ fe̱yɛ Owure Hɛrɔd e̱ ba a ɔ bo̱ buwi kpa kayaagyi-o na ɔ mɔɔ mò̱.” 14Amo̱se̱-ɔ, Yo̱sɛf a ko̱so̱ kanye amo̱, ne̱ mò̱ aa kayaagyi-o na mò̱ nyi a yɔ Igyipiti swe̱e̱re̱ se̱ ya kye̱na. 15Ne̱ baa kye̱na mfe̱ŋ ne̱ Hɛrɔd a bo̱ wu, na ane̱ŋ ne̱ Wuribware̱ a bo̱rɔ mò̱ akyaamɛɛ-ɔ ɔko̱ se̱ tɔwe̱-ɔ nya waa kase̱ŋtiŋ fe̱yɛ, “Igyipiti swe̱e̱re̱ se̱ ne̱ mo̱ a te̱e̱ mo̱ gyi-o le̱e̱.” 16Amɔ Yo̱sɛf na kayaagyi-o na mò̱ nyi a yɔ Igyipiti pwɛɛ ne̱ Owure Hɛrɔd a dɛɛ ŋu fe̱yɛ anyiase̱ŋpo̱-ɔ a pe̱nna mò̱. Amo̱se̱-ɔ ne̱ mò̱ duŋ a fwii bwe̱e̱tɔ, ne̱ ɔɔ sa kanɔ fe̱yɛ mò̱ asoogyaa awuye mɔɔ ŋnyaŋsɛɛ pɛɛɛ ne̱ bo̱ bo̱ Bɛte̱lahɛm maŋ-nɔ na e̱maŋ ne̱ e̱ maa mfe̱ŋ-ɔ, ne̱ bo̱ mo̱ŋ tɛɛ kyo̱ŋ nsu ŋnyɔ-ɔ, nsu ne̱ ɔ fa fe̱yɛ kayaagyi-o a gyi-o, le̱e̱ saŋ ne̱ anyiase̱ŋpo̱ amo̱ a bo̱ tɔwe̱ gywii mò̱ fe̱yɛ baa ŋu ke̱kye̱e̱kpagyi-o a le̱e̱-ɔ. 17Ne̱ ke̱tɔ ne̱ Wuribware̱ a akyaamɛɛ-ɔ ɔko̱ ne̱ ba te̱e̱ mò̱ ɛ Yɛrɛme̱ya-ɔ a kyo̱rɛɛ waa abware̱se̱ŋ wo̱re̱-ɔ-rɔ-ɔ a waa kase̱ŋtiŋ fe̱yɛ, 18“Baa nu bo̱re̱ ko̱ a le̱e̱ Rama maŋ-nɔ, bo̱re̱-ɔ de e̱lawo̱ bwe̱e̱tɔ. Rakyɛl i su ɔ sa mò̱ gyi-ana. O kine fe̱yɛ ɔ ma lɛɛ nya kakpo̱nɔkya a le̱e̱ fe̱yɛ mò̱ gyi-ana a wu.” 19Ne̱ Owure Hɛrɔd a wu. Mò̱ a wu-o, ne̱ Wuribware̱ kabɔɔ ko̱ a be̱e̱ le̱e̱ Yo̱sɛf se̱ dee-ro Igyipiti swe̱e̱re̱ se̱. 20Ne̱ ɔɔ tɔwe̱ fe̱yɛ, “Ko̱so̱, taa kayaagyi-o na mò̱ nyi, na mo̱n' kiŋŋi yɔ mo̱ne̱ aye̱ Isireelii swe̱e̱re̱ se̱, a le̱e̱ fe̱yɛ mò̱ ne̱ ɔɔ kpa kayaagyi-o ke̱mɔɔ-ɔ a wu.” 21Ne̱ Yo̱sɛf a ko̱so̱ taa kayaagyi-o na mò̱ nyi, ne̱ baa kiŋŋi yɔ Isireelii swe̱e̱re̱ se̱. 22Bamo̱ a fo̱ mfe̱ŋ-ɔ, ne̱ Yo̱sɛf a ŋu fe̱yɛ Aakilayus a ye̱re̱ mò̱ se̱ Hɛrɔd ayaa-rɔ gyi Yude̱ya kuwure. Amo̱se̱se̱-ɔ kufu a nya mò̱ mfe̱ŋ ke̱kye̱na. Ne̱ Wuribware̱ a yii mò̱ se̱ dee-ro fe̱yɛ bo̱ ma kye̱na Yude̱ya mfe̱ŋ. Amo̱se̱-ɔ ne̱ baa kiŋŋi ya bo̱rɔ to̱ŋ ko̱ ya fo̱ Galile̱ya swe̱e̱re̱ se̱. 23Ne̱ baa ya kye̱na maŋ ko̱ ne̱ ba te̱e̱ mò̱ ɛ Nasarɛt-ɔ-rɔ, na ane̱ŋ ne̱ Wuribware̱ a akyaamɛɛ-ɔ bo̱ko̱ a tɔwe̱-ɔ nya waa kase̱ŋtiŋ fe̱yɛ, “Ba ba a bo̱ te̱e̱ mò̱ ɛ Nasarɛte̱nyi.”

will be added

X\