1 Má hamashikə camənkwa vi kə shikwi ká Vwa ná, ba myə ngyi li dzəmə kúlə Yesu, lə wsha zəmwi zərə kə hyá hihitə tsa. 2 Má nda dzəmə hyá, tsa"a kwə hyá ná, məghulimi kúlə shə—wuri citli mnyə kúlə shə kə təngulintəgwa! 3 Ba hyá səkə dzəgwa kúlə tsa; a vá nata Yesu hyá kwa wə. 4 Má vi ndza myə ngyi ndayə, a zəzi wsi kə mələtəgwa tsa ná, həntəkkə wuntyi mbəlyi ɓwagə səkə tayə tá hyá, lə lə"use ɓya pwakkə mbweghe-hya. 5 Má va nggadləni mwa ná, ba myə ngyi gəliɓyi tə ka. Ba mbəlyi ɓwagə ngyi gə sha hyá nee, "Təmburi waá nda səkə yə və mdi lə mkyə mə kúlə mbəlyi kə mtə-mtə ri? 6 Njə́ tə nkwaa wə—wuri njə kə tlagwa lə mkyə! Ghi-yə za tá vəcə kə njə gətə yə, vi ndza njə lə yə kwa Galili tsa ná? 7 Má kwə njə sha yə nə, mbəlyi dzəgə tsərəshə Zəgwi ra Za tə pəla tə́ ká kyə, a hyá patlə njə́ tə wci dladlakə lə kusa, a njə mtə; a má tə kwá makənə hya-ranjə kwa kúlə, njə dzəgə tlagwa lə mkyə səmə kwa kúlə, əkwə huri?" əkwə mbəlyi ɓwagə ngyi. 8 Ba myə ngyi zəzitə vəcə-njə tsa. 9 Ba hyá zhinikəgwa səkwa mə kúlə tsa, a gərətə zaka wsha ngyi paɗə tə́ mbəlyi kə mnə Yesu mungə-kutəghitə ngyi, ba tə́ paɗə wuntyi mbəlyi kə zəli njə́. 10 (Má myə kə gərətə habarə wsi kə ɗatəgwa tsa tə́ mbəlyi kə mnə Yesu ná, hyá yə Maryamu wzha rə ká Magadaliya, ba Yuwana, lə Maryamu mama ra Yakubu, ba wuntyi myə məsəbə-hya.) 11 Má mbəlyi kə mnə-njə ngyi mwa ná, ba fəyə vəcə myə ngyi ka vəcə fashə; və́ hyá mbərəsa lə wə. 12 A má Bitrus kwa nganjə ná, ba tlagwa li dzəmə kúlə tsa lə huhwə; má vi kə njə ntsəkəshə mnyə kúlə tsa ba kurəngi ka nə nkwa kwa, tsa"a kwə njə ná, na tilimyi ɓya kə mbəlyi lántə Yesu lə tsa, kəlama mdi mə! Ba njə zhinikəgwa səkə ya, a ndayə va wsi kə mələtəgwa. 13 Má tə vəci shə mwa dəwa ná, ba mbəlyi ɓwagə mə mbəlyi kə zəli Yesu ngyi tlagwa dzəgwa wuntə mələmi ndza mbəlyi ka lə Imayas. (Tyi mələmi tsa tá Urushalima ná, kala ntərə zabəga mburəfungə.) 14 Má tə ntahə hyá kwa nkwa, tə ɓwa vəcə hyá mbweghe wsha kə mələtəgwa tsa paɗə mənə. 15 Má tə ɓwa vəcə tsa hyá ná, ba Yesu səkə dləvə hyá, a ntahə lə hyá kwa zərə́; 16 a vá tsamətə njə́ hyá ka Yesu wə. 17 Ba Yesu yiwi va hyá nee, "Waá vəcə kə yə ɓwa ala ɓayə tsa kwa nkwa ri?" əkwə. Ba hyá tayə, a hasətə kəma, a nənə njə́; 18 ba wuntə mdi patlə mə hyá (tsá ndza mbəlyi ka lə Kiliyobas) gə sha njə́ nee, "Mə paɗə mbəlyi tə Urushalima, waləka na kutəra-ranga tsá má sənata wsha kə mələtəgwa məɓa mə hya ngyi wa?!" əkwə. 19 "Waá wsi kə mələtəgwa ri?" əkwə Yesu. Ba hyá gə nee, "Ala na fatə habarə Yesu mdi ká Nazarat huri? Mdie nə, zakuri kə gə vəcə Hyalatəmwə njə! Zaka mbwara vəcə-njə lə wsha mələ njə paɗə, lə dənama ra Hyalatəmwə mələ njə, a ka wsi kwatsəka tə́ mbəlyi mwa. 20 Ba mbəlyi kukulə-myi hyá lə mbəlyi kukulə mə ká mələ sarəka tsərəshə njə́ tə́ ká Roma ka pətlə njə́, a ba hyá patlətə njə́ tə wci lə kusa. 21 Má Yesu tsa, njə́ tsá kə yə́ fətə ghi tə nee, njə dzəgə dləgwə ká Isra"ila va ká Roma mwa; a na njə́a, mbəra humbəra pətləshə njə́ hyá. 22 Ba wuntyi myə mə yə́ ká zəli njə́ gətə yə́ wsi kwatsəka: vi kə hyá dzəmə kúlə-njə ɓayə hamashikə, 23 vá nata njə́ hyá kwa kúlə shə wə. Ba hyá zhinikəgwa səkwa mə kúlə tsa, a gə sha yə́ nee, hyá nata mbəlyi kə mnə Hyalatəmwə məɓa, ngyí kə gə sha hyá nee, lə mkyə njə, əkwə sha hyá! 24 Ba wuntyi mbəlyi mə yə́ ká zəli njə́ tlagwa dzəmə kúlə-njə tsa; má nda dzəmə hyá mwa ná, mdi shə kwa kúlə, kala tsá kə myə ngyi gətə wə; a vá nata njə́ hyá wə," əkwə mbəlyi ɓwagə kə ntahə ngyi. 25 Ba Yesu gə sha hyá nee, "Kala bata yə dye! Mbəlyi má mbərəsa lə vəcə zakuri hyi Hyalatəmwə yə handa; nkərətətəkki mni-yə! 26 Vá sənata yə ndangə mə́ nee, də́walə ba Kristi Mdi kə mnə Hyalatəmwə savə bwanyə kala tsa shə, nda səkə njə dzəmə kulə-njə huri?" əkwə Yesu. 27 Ba njə gərətə wsi mə zaka mbwara wsha kə ɗafətəgwa kwa Dləparamə Hyalatəmwə mbweghe ghi-njə tə́ hyá, tsəshə tə dləparamə kə Musa ɗafətə lə zaka wsha kə zakuri hyi Hyalatəmwə gətə. 28 Má vi kə hyá hələgitəgwa tá mələmi ndza hyá dzəgə tsa, má Yesu kwa nganjə ná, ba tlagwa ka dzəgə wuntə nkwa damə; 29 ba mbəlyi ɓwagə ngyi gə sha njə́ nee, "Wá li na wə; ndə hya tə nkwaa tá yə́, təmburi tikwari nkwa ndzaranjəa; hələgi vərə səkə," əkwə hyá sha njə́. Ba Yesu ɗatə yə tə́, ba zəlitə hyá jakə. 30 Má vi ndza hyá zəmə ɗafa ná, ba njə kətə ɗafa tsa, ba "usa Hyalatəmwə, a ba wtləwtləlyə, a nggərəkə tə́ hyá; 31 má təɓa ná, ba hyá tsamətə njə́ nee, ndana Yesu mdi tá hyá tsa! Má təkwashə-təkwashə dəwa ná, rayyə Yesu za kwa ntsə-hya. 32 Ba hyá gə sha ghi-hya nee, "Vá ɗatə wuɗikki hwi-myi ɓayə, a na njə gə myi vəcə kwa hunkwa səmə kwa Dləparamə Hyalatəmwə huri?" əkwə hyá. 33 Ba hyá tlagwa tə nkwa shə dəwa tə vərə shə, a zhinikəgwa dzəmə Urushalima; ba hyá tawa mbəlyi mungə-kutəghitə kə zəli Yesu ngyi tə nkwa kutə, lə wuntyi mbəlyi tá hyá məɓa. 34 Ba mbəlyi məɓa gə sha mbəlyi ɓwagə ngyi nee, "Wuri Tlamda kə tlagwa lə mkyə səmə kwa kúlə handa! Wuri njə kə ncərətə ghi-njə tə́ Siman!" əkwə. 35 Ba mbəlyi ɓwagə ngyi gətə wsi kə mələtəgwa tə́ hyá kwa hunkwa dəwa, lə tsamə kə hyá tsamətə Tlamda, vi kə njə wtləwtləlyə ɗafa, a nggərəkə tə́ hyá. 36 Má tə gə vəcə tsa hyá ná, vəkkə Yesu səkə tlətə kwalyə hyá mə mpyaa: "Wuri rá kə cika yə!" əkwə njə. 37 Ba nggadləni tsəshə hyá dabwaa; má təkə ghi-hya ná, hyala tsá kə ncərətəgwa tə́ hyá. 38 Ba Yesu gə sha hyá nee, "Təmburi waá nda nggadlənishəgwa yə ri? A waá labari nda mələ kanashə-kanashə yə kwa mni-yə fashə mwa ri? 39 Nata wa pəla hyi-ra lə səra hyi-ra—yira wuna? Fata rá wa, a yə sənata ndangə! Təmburi hyala nə, tlyi gwa ba "itlə va njə́ wə; a má yira tə nkwaa, tlyi gwa ba "itlə va rá wuna?" 40 Ba njə ncərətə pəla hyi-njə lə səra hyi-njə tə́ hyá. 41 Má səfə hyá mələ kanashə-kanashə kwa mni-hya, a ndayə va dlama, ba Yesu gə sha hyá nee, "Wsi shə va yə tazhe zəmə tə nkwaa ná?" əkwə. 42 Ba mbəlyi kə zəli njə́ ngyi nggərəkə kələpə kə ta-ta; 43 ba njə kətə, a ɗahwi kwa ntsə-hya təɓa. 44 Ba njə gə sha hyá nee, "Má wsha kə mələtəgwa ɓayə ngyi ná, njə́ tsá kə rá gətə yə, vi ndza rá lə yə tə nkwa kutə. Má kwə rá sha yə, zaka mbwara wsha kə ɗafətəgwa mbweghe-ra kwa wada ra Musa lə kwa dləparamə zakuri hyi Hyalatəmwə ba kwa Zabura dzəgə ndza jiri," əkwə Yesu. 45 Ba njə mnəntə mni-hya tazhe sənata wsha kwa Dləparamə Hyalatəmwə, 46 a ba gə sha hyá nee, "Má wsi kə ɗafətəgwa nə, də́walə ba Kristi Mdi kə mnə Hyalatəmwə savə bwanyə; má tə kwá makənə hya-ranjə kwa kúlə ná, njə dzəgə tlagwa lə mkyə! 47 Má kwə njə dəwa, se ba mbəlyi gərəshə habarə ndərə tsa tə́ paɗə mbəlyi kwa wdunya (tsəshə tə Urushalima), a hyá wtubyi, a Hyalatəmwə ntivirəntə bikyi-hya. 48 Má yə nə, yə dzəgə ndza ka sakida ra wsha ngyi paɗə. 49 Na njə́a mwa, yira dzəgə mnə yə wsi kə Ta-tara mputə aləkawalə-njə tə́ yə; ghətə wa mə mələmie nda səkə dənama ra Hyalatəmwə səkwa məɓa tamwə tsa dzəgwa mni-yə," əkwə Yesu sha hyá. 50 Ba Yesu kələkə mbəlyi-njə shilyə mə mələmi, a li dzəgwa Baitanya lə hyá; ba njə tlanata pəla hyi-njə, a fərəmbwi barəka tə́ hyá. 51 Má vi və́ njə fərəmbwi barəka tsa tə́ hyá ná, ba njə hwə tá hyá, a li lə mbəlyi kə səkə kə́lə njə́ dzəmə tamwə. 52 Ba mbəlyi kə zəli njə́ ngyi nggərəkə həwə dabwaa tə́ njə́, a zhinikəgwa səmə Urushalima lə dlama dabwaa ndangə; 53 wamara vi dzəgwa mpya Hyalatəmwə hyá mwa, a fali Hyalatəmwə.
