1 Mbəlyi kə mnə Yesu lə ká zəli paɗə tə hyə ká Yahudiya, ba hyá fatə nee, balə ká kyə kə́lə vəcə Hyalatəmwə dəwa. 2 Təmburi tsətsə, má vi kə Bitrus səmə Urushalima, ba ká Yahuda kə zəli wsi shi talala ɗa njə́ nee, "Ndərə mə wsi kə na mələtəa wə dye! 3 Təmburi waá nda dzəgə ya mbəlyi fafashəa hyi na, a ɗahwi wsi kə zəmə lə hyá ri?" əkwə. 4 Ba Bitrus wɗaratə wsi kə mələtəgwa tə́ hyá kə́rəpi; 5 kwə njə na, "Má vi ndza rá tə mələ adəwa kwa Yafa, ba rá nata wsi kala shikwə. Tsa"a kwə rá ná, tə səkwa wuntə wsi kapara mayafyi dabwaa tə mpwə—mbəlyi kəlala səkwa tamwə tə zəwə fwarə zalawwə, a ba njə tlətəyigwa vari rá. 6 Tsa"a kwə rá nata nkwa kwa wsie, lə wsha kə shintyi kwa, lə wsha kə ntsə́kəgwa lə hwi tə ka, lə yə "yə. 7 Má təɓa ná, ba rá fatə vəcə gəgwa tə́ rá nee, 'Bitrus, tlagwa ba na tlantə wulyə tə wsha ngyi, a na zəmə!' əkwə. 8 Ba rá gə nee, 'Awə, Tlamda! Ala rá ɗahwi wsha fafashə kala tsa tappə dzəmə tə mnyə-ra wə,' əkwə rá. 9 Ba vəcəa zhini gəgwa səkwa məɓa tamwə nee, 'Má wsi kə Hyalatəmwə fəyə ka tlyi ndangə, wá gə na nee, "wsha fafashə," kwə na wə,' əkwə. 10 Ka makənə zhigi və́ vəcəa gəgwa, a ba rá zhinitə tsətsə, nda səkə mbəlyi kələntə wsie dzəmə tamwə paɗə. 11 "Má təkwashə-təkwashə mwa, vəkkə mbəlyi makənə səkə ya ndza rá hankyə ɓa; səkwa mə Kaisariya mnəkəgwa hyá tazhe ka rá. 12 Ba Mambəli Hyalatəmwə gə sha rá nee, 'Mayi na li lə hyá; wá ghəpi na tá zəli hyá wə,' əkwə. Nggwasama nkwangə ngyi mwa, wuri hyá kə zəlitə yə́ dzəmə Kaisariya. Kə́rəpi-yə́, ba yə́ səkə jakə ya mdi shə məɓa. 13 Má vi kə yə́ səkə, ba njə gətə yə́ mbweghe tsá kə njə nata mdi kə mnə Hyalatəmwə məɓa tamwə hankyə ya-njə, tsá kə gə sha njə́ nee, 'Mnəkə nkwa dzəgwa Yafa tazhe ka na mdi ndza mbəlyi ka Siman Bitrus səmə, 14 a njə səkə gə na vəcə kə dzəgə mbə́tə na lə ya-nga paɗə,' əkwə mdi kə mnə Hyalatəmwə tsa sha njə́. 15 "Má tə gə vəcə rá tə́ hyá mwa ná, ba Mambəli Hyalatəmwə səkə dzəgwa mni-hya paɗə, kala tsá kə njə dzəgwa mni-myi tsəmi! 16 Má vi kə wsie ɗatəgwa tsətsə, ba rá zəzitə vəcə kə Tlamda gətə myi nee, 'Lə yemyi mələtə batizəma Yohana; a má yə ná, lə Mambəli-njə dzəgə Hyalatəmwə mələ yə batizəma kwa mni-yə,' əkwə. 17 Má kala tsá ndza njə nee, wuri Hyalatəmwə kə nggərəkə Mambəli-njə tə́ mbəlyi ngyi kala tsá kə njə nggə myi vi kə myi mbərəsa lə Tlamda-myi Yesu Kristi, á rá nkatə Hyalatəmwə kə mələ ná?" əkwə Bitrus sha hyá. 18 Má vi kə hyá fatə vəcə Bitrus tsa ná, ndyarə hyá va vəcə kə zhini; ba hyá fali Hyalatəmwə, a gə nee, "Balə tə́ ká kyə ɗaravə nkwa kə wtubyi Hyalatəmwə, a hyá mbə dəwa ɓa!" əkwə. 19 Má vi kə mbəlyi pətləshə Istifanus ná, ba hyá və nkwa kə ɗa ká zəli Yesu kúkulə. Ká zəli mwa, ba tla kutikutyanggə, a mbə́lə səkwa mə Urushalima. Má wuntyi mbəlyi mə hyá, ba mbə́lə dzəgwa hyə ká Finikiya; má wuntyi ná, ba mbə́lə jilyə Kubrus lə dzəgwa Antakiya. Má venkwashə, waləka tə́ ká Yahuda və́ hyá gə habarə Yesu kalə; 20 a má wuntyi ká Kubrus lə ká Kurane kə zəli, ba hyá dzəgwa Antakiya, a gərətə habarə Yesu tə́ mbəlyi má ka ká Yahuda dəwa. 21 Ba Tlamda fəyə barəka dabwaa mə vəcə gə tsa hyá; mbəlyi kúkulə tsá kə mbərəsa, a səkə zəlitə Tlamda. 22 Má vi kə ká zəli mə Urushalima fatə nee, wuri ká Antakiya kə kə́lə vəcə Hyalatəmwə kúkulə, əkwə, ba hyá mnəkə Barnabas dzəgwa. 23 Má vi kə njə ntsəkəshə Antakiya, a ba nata barəka kə Hyalatəmwə nggərəkə tə́ mbəlyi kwaɓa ná, ba njə dlama tə́ dabwaa; ba njə tləkəshə hyá nee, "Njiwegwa lə jiri mə zəli Tlamda lə mni kutə, paɗə-yə; washə yə hwə tə́ wə!" əkwə. 24 (Təmburi Barnabas, mdi tsapə njə, tsá lə mbərəsa dabwaa; a wuri mni-njə kə ləhə va Mambəli Hyalatəmwə mwa.) Mbəlyi kúkulə tsá kə dzəmə zəli Tlamda venkwashə. 25 Təmburi tsətsə, ba Barnabas tlagwa dzəgwa Tarsus tazhe və Shawulu. 26 Má vi kə njə vətə njə́, ba njə kələkə njə́ səkə Antakiya; va tassə hyá mələtə lə mbəlyi kə zəli tə nkwa shə, a tətəkərəshə wsha tə́ mbəlyi kúkulə. (Kwa Antakiya atə ka ká zəli mbəlyi lə Krista.) 27 Má venkwashə, ba wuntyi zakuri kə gə vəcə Hyalatəmwə səkwa mə Urushalima, a dzəgwa Antakiya. 28 Má wuntə mdi patlə mə hyá (tli-njə Agabas), ba tlagwa gə nee, "Má kwə Mambəli Hyalatəmwə, má dzəgə ɗagwa tə wdunya paɗə," əkwə. (Ba máa ɗatəgwa handanda mə vi ndza Kalaudiyas ka mbəgə ká Roma.) 29 Má mbəlyi kə zəli kwa Antakiya, ba hyá gə nee, "Kə hyi-hyi ba myi mnəkə "u"wi dzəmə tə́ nggwasama-ramyi mə Yahudiya; wamara mdi, ba njə tsəni kwaba tazhe vwi hyá, kala tsá ndza dənama-ranjə tə́," əkwə. 30 Ba hyá tsənitə "u"wi tsa, a nggərəkə tə́ yə Barnabas hyá lə Shawulu, a hyá kə́lə dzəmə Urushalima, a nggərəkə tə́ mbəlyi kukulə mə ká zəli məɓa.
