1 Má myi mbəlyi kə zəli, wuri Hyalatəmwə kə "intə myi dabwaa—wuri kə ncətəgwa səkə kə tsá kə njə ka myi ka nggwasə-njə (a nggwasə-njə shə myi handanda). A má mbəlyi ka nga wdunya, vá sənata Hyalatəmwə hyá wə; təmburi tsətsə, vá sənata myi hyá ka nggwasə Hyalatəmwə dəwa wə. 2 Ka nggwasə-njə myi ndzaranjəa, nggwasama; má ndza-ramyi dzəgəndza tə kəma, vá sənata wsi myi kúkulə mbweghe-njə wə. Má wsi kə myi sənata njə́ nə, má vəcirəvi kə Yesu dzəgə səkə, myi dzəgə ndza kapara njə́, a myi dzəgə vərahə njə́ kapara ndza-ranjə ndangə. 3 Wamara mdi kə fətə ghi tə nə Yesu a ndza kapara njə́ vəcirəvi kə njə dzəgə səkə tsa mwa, ba mdi shə njigwe ka mdi tsapə, kala ndza ra Yesu ka mdi tsapə. 4 Wamara mdi kə mələ bikyi, mdi "yagarə mdi shə—təmburi bikyi tsá mələ mdi "yagarə. 5 Wuri yə kə sənata nee, Yesu səkə tazhe kələhwi bikyi-myi; njə́ lə ghi-njə mwa, bikyi va njə́ mandara batlyə wə. 6 Təmburi tsətsə, má mdi kə njigwe mə zəli Yesu, ka mələ tlə́nə bikyi njə wə; má mdi təkwarə kə mələ tlə́nə bikyi, ala mdi shə kəmə lə Yesu a sənata njə́ wə. 7 Á yə ya ghi-yə vashə mdi nggutə yə, mbəlyi-ra! Wamara mdi kə mələ tlə́nə tsapə, mdi lə jiri mdi shə, kala ndza ra Yesu ka mdi lə jiri. 8 Má wamara mdi təkwarə kə mələ tlə́nə bikyi akə, ka nga Shatari njə—təmburi ala zamə, bikyi tsá mələ Shatari; a njə́ tsá kə kələkə Zəgwi ra Hyalatəmwə səkə wdunya mwa, tazhe zantə tlə́nə Shatari. 9 Má wamara mdi ka zəgwi ra Hyalatəmwə, ka mələ tlə́nə bikyi njə wə—təmburi məhələ Hyalatəmwə tsá va njə́; má va ndza ra Hyalatəmwə ka Ta-ranjə, kandə njə mələ tlə́nə bikyi wə. 10 Na wsi kə ncətə dadamə kwalyə nggwasə Hyalatəmwə lə nga Shatari tsa: wamara mdi má mələ tlə́nə tsapə lə "i kwavati-njə, zəgwi ra Hyalatəmwə mdi shə wə. 11 Má vəcə Hyalatəmwə kə yə fatə alandza, njə́ nee, ba myi "i kwavati hyi-myi. 12 Washə myi ndza kala Kayinu zamə wə; nga Shatari njə, a ba pətləshə dagwama-ranjə. Təmburi waá nda pətləshə dagwama-ranjə Kayinu ri? Təmburi tlə́nə tsapə tsá mələ dagwama-ranjəa; a má nganjə tlə́nə, ntimye. 13 Tsətsə mwa, washə njə ndza ka wsi kwatsəka tə́ yə, a na mbəlyi ka nga wdunya kə "imye yə wə, nggwasama wə. 14 Má wsi kə myi sənata, wuri myi kə mbə́lə va mtə, a ba tlayi mkyə má kəri; wuri myi kə sənata tsa təmburi tsá kə myi "i kwavati hyi-myi. Má mdi má "i kwavati-njə, səfə mdi shə má nakə mbə va mtə. 15 Má mdi kə "imye kwavati-njə, kala mdi kə pətlə nkwa njə; kə sənata yə mwa, mdi kə pətlə nkwa shə lə mkyə má kəri wə. 16 Má wsi kə ncətə myi "ighi jiri, njə́ mtə Yesu səkwa təmburi myi; kə hyi-hyi mwa ba myi ɗatə yə tá mtə səkwa təmburi nggwasama-ramyi. 17 Má ba mdi lə "u"wi va njə́ nkələtə ntsə-njə, a kə́lyə kə vwi kwavati-njə má wsi kə zəmə və, tsəma gə njə fashə nee, "Tə "i Hyalatəmwə rá kwa mni-ra," əkwə ri? 18 Kandə "i-myi "i Hyalatəmwə njigwe waləka gə vəcə lə wtá ra mnyə kalə wə, mbəlyi-ra wə. Ba "ighi-myi njigwe jiri, a ncətəgwa səkə kə tlə́nə tsapə ndza myi mələ. 19 Má ba "ighi-myi ncətəgwa səkə kə tlə́nə tsapə ndza myi mələ mwa, njə́ hunkwa ndza myi sənata nee, ndana tə zəli hunkwa ra Yesu myi jiri, a ndaka tləkəshəgwa myi kwa kəma ra Hyalatəmwə. 20 Má wamara vi kə mni-myi kə́lyə kə hinigwe va zəzi bikyi kə myi mələtə, ba myi sənata nee, Hyalatəmwə mdashə mni-myi lə sənata—wuri njə kə sənata zaka wsha paɗə. 21 Təmburi tsətsə, nggwasama, má və́ mni-myi mpa lə mambəli-myi va bikyi wə, ndaka tləkəshəgwa myi kwa kəma ra Hyalatəmwə kəlama nggadləni. 22 Ndaka tlayi wamara wsi myi səkə va Hyalatəmwə, a na myi kə yiwi va njə́, təmburi tsá kə myi yatə vəcə-njə a ba mələ wsi kə njə "i. 23 Na wada kə njə nggə myi tsa mwa: ba myi mbərəsa lə Zəgwi-ranjə Yesu Kristi, a ba myi "i kwavati-myi, kala tsá kə Yesu gə sha myi. 24 Wamara mdi kə yatə vəcə Hyalatəmwə, mə Hyalatəmwə njə; wuri Hyalatəmwə kə dzəgwa mni-njə mwa. Má tsá kə ncətə myi nee, wuri Hyalatəmwə kə dzəgwa mni-myi, njə́ Mambəli-njə kə njə nggə myi.
