TITO 3

1Viwusage avanu vavelage na choga ku vatema na vanyalulagi, ukuwogopa na ukwigelanisa mwa mbesili ukupiga inofu mbesili. 2Valongelage valamuliga umunu yeyeavesaga; pesi ulwa vikalilage uwikalakunoga na ulwipuliko, vavelage mbepali valele kwa yeyeavesaga. 3Pakuva, ulusika ulungi hwehwe twetwivapuva, avagaya kwipulika na avayasi. Twe twivanyawingi wa uwudobokesi na isa mung'i wewevuvesaga. Twikalige muwanangifu na mu gila; neke avanu vatuvipile swe nahwe tukuvavipila. 4Neke ulusika lwe uwunofu na uwende wa Nguluvi, Umupoki vetu wavewigubulwa. 5Atupokite si kwa ukwimila ulukani lwelweluvesaga ulwa uwunofu lwetwetupigite hwehwe, pesi ukuta atupokite ukwimila ulusungu lwakwe, ukukola Umuhe Umwelu yeatupelye imigendele mipya na ukutofuga na ululenga. 6Nguluvi atugimbite ukutupela hwehwe Umuhe Umwelu ukukola kwa Yesu Kilisito, Umupoki vetu, 7Sambi kwa uwuwuya wakwe twidikilwe ukuva vagolofu na ukwanukila uwumi wa mbepali wetwihuvye. 8Ulukani ulu lwa nachene. Ndisaka veve usikangasage hilo ing'ani isi, sambi vala vevakumufuuwa Nguluvi vadoboke ukukola ifilega fyawo ukupiga inofu, sila inofu isikuvatanga avanu. 9Neke ulwene wilegage mulubesa lwa uwupuva, ulwitakilo na ulubesa ukwimila indagilo. Iso ngaya kwambala kinu, iso sa malanga hela. 10Yula umunu yeisagasa ulwilekano mukenyelage pakomi wone ave peawila, mukenyelage ulwa kavili, pesapuliki kangi uyo swe mulekage, 11ukulukagula ukuta umunu va ndahihyo uyo yeayaje ng'ani, na inzanangifu sakwe sikumolelela ukuta nachene ayasile. 12Pendimutumite kwa veve Alitema nave Tikiko, wangupage ukusa ku Nikapoli umbone, pakuva ngalamwe ukwikala kuko ulusika lwa ikitungwi. 13Ginage ukumutanga umwimbi va indagilo Sena na Apolo sambi vahwane ukuvanga ingendo sawo, kangi lolelage hilo ukuta vavelage na mbefili, valaguluma kinu. 14Luvavaje avanu vetu viyigise ukukola ifilega fyawo ukupiga inofu sambi vatange mufinu fyetwiguluma nachene, na kangi imigendele jawo mbegili givelage ja kwambula inofu. 15Avanu mbevali pamwi na nene vakukuhungila. Vahungilage vanyawiyendi vetu mulufuuwo. Nguvasukila mbemuli uwuwuya wa Nguluvi.

will be added

X\