TITO 1

1Nene Pawulo, umukami va Nguluvi na umwigendo va Yesu Kilisito, ngwandika. Nene ndimuhagule ukulukangasa ulufuuwo lwa avahagule va Nguluvi na uwukagule uwuling'ana na isa uwelu, 2lwe uluhuvi lwa ukupelwa uwumi wa mbepali we Nguluvi yesilongagi uwudesi, atuhuvise uwumi wuwo, pidaha hilo wesigilavanga imisika, 3na pegikwilye imisika, awuvisile pawelu ukukola ulukani lwakwe. Nene ndapelitwe ulukani ulo ndalike ukugendela mululagilo lwa Nguluvi, umupoki vetu. 4Ngukwandikila veve Tito ve mwanangu va nachene ukukola ulufuuwo lwetwihanga mbetuli. Ngukusukila uwuwuya na uwikalakunoga ukuhuma kwa Nguluvi Dada, na ukuhuma kwa Kilisito Yesu, umunyakutukombola. 5Ndakulesile ku Kilete sambi uwuyapise mbesili ise sisilawuyapwa wunofu, na ukuhagula avavina va amakanisa mu boma mbesili: Wiwukage uwulagise wangu. 6Umuvina va likanisa lumuvaje avelage munu yesimwananga kinu, avelage yeina umung'inetu yumwi swe, na avanakwe luvavaje vavelage yevafuuvitwe, vesivipulisa ukuta vanyamabatu nambi avagaya kwipulika. 7Pakuva umwimilisi va likanisa umwene ye muvisikisiwa va ikipigo cha Nguluvi, lumuvaje avelage munu yesimwananga kinu. Alava munyalwitupyo, munyalilakali, mugaasi, munyamabatu apangi muhatufu, 8Lumuvaje avelage mudeke na yeiwenda ing'ani ingolofu. Lumuvaje avelage mulele, mugolofu, munyanumbula nzelu, na munyachoga. 9Lumuvaje inatilage hilo lula ulukani ulwihuvilwa ndawe mwe lukwigwisiwa. Ipo pepene peahwana ukuvakangasa avangi imitima ukukola inzigiso isa nachene na ukuvawulila pawelu uwananzi wa vala avibesa inzigiso siso. 10Pakuva, povali avanu wolofu, na hilo vala vevapitwike ukuhuma mu lufuuwo lwa i Kiyudaya, vala avagaya kwipulika, vevakuvayasa avangi kwa uwupuva wawo. 11Lutuvaje tupese ing'ani sawo, pesi ndahihyo iva vakuvasasing'asa mbevali kwa ukwigisa ing'ani sesivivagilwa ukwigisa vipiga lulo si kwa lunofu nda, vihosa ulwa ukwambula amagobole. 12Na uyumwi va avavisi vawo, ye yumwene nave Mukilete, atige, “Avakilete vilongaga uwudesi mbepali vindawe amakoko amahambuka, vahatufu kangi vagata!” 13Nave alonzile neke atumbule ulwa nachene, na ukwimila lulo lukuvaje uvakalipilage hilo, sambi vave na ulufuuwo ulukwilaniche. 14Valava pevibatilisa isimo ingaya kinu sa Kiyudaya na uwulagise wa avanu uwukuvasila vala avibihila isa nachene. 15Mbefili fyesiwe kwa vala avanu avevesiwe; neke kisukuli chechesiwe kwa vala avaafu na vesivafuuvitwi, pakuva inziyiwuko na luluhala lwawo lwaafwike. 16Avanu avindawe iwo vakwiyigilisa nda vamusele Nguluvi neke ukwimila ifipigo fyawo vakumubihila. Iwo vanyakuvifya avanu pakomi kangi vagaya kwipulika nawo sivikwila mulukani lwa uwunofu lwelweluvesaga.

will be added

X\