AVALUMI 9

1Nene ndilonga ulwa nachene, sindideta kono we nyanzile na Kilisito. Inumbula yangu yisogoswa na Umuhe Umwelu, yikunzolelela ulukani ulu. 2Ndiwenda ukutigila de uwuhuguvafu wa nene wukomi hilo: uwuvafi wesiwisilagi munumbula yangu. 3Ikivalwa avanu vangu, avanyang'i vayangu! Wone kuke kuvelage na kwambula kinu kwa vene ngembwenda nene ng'otoke nu kuvikwa pataali na Kilisito wone ulo kekuvatanga kinu! 4Iwo ve vanu va Isilaeli ve Nguluvi avahagwe vavelage vanakwe, akuvahanza mundolo yakwe, afingine nawo, swe akuvapela indagilo sakwe, ulufuuwo lwanachene na inyuviso sakwe. 5Avene ve visukulu va vakuku, nave Kilisito, kuwunu wakwe, ahumite mulukolo lwawo. Nguluvi yeatemile mwa mbefili, alumbwagwe kitasila! Ena. 6Sinditigila ulwa uluhuviso lwa Nguluvi yelupitwike; pakuva siwita avanu mbevali va mu Isilaeli vahagule va Nguluvi. 7Nasi wita imbegalo mbeyili yakwe. Pesi ukuta ndawe Uwandike Uwelu wewitigila, “Imbegalo yakwe yihuma kwa Isaki.” 8Kwekutigila, ulwa sivala vevawonike kwa ukwegalwa kwa mbepali hela ve vana va Nguluvi, pesi vala avegalwa ukwimila uluhuviso lwa Nguluvi, ve vawo vevatambulwa vanakwe. 9Pakuva uluhuviso ulwene lwe ulu, “Sangusila ulusika ulukwilaniche, nave Sala saegala mwana mukwamisi.” 10Na kangi si lulo hela, pesi ulwa Lebeka nave egee vana vanyawendani kulu dadawo yumwi Isaki, yula ukukwetu. 11Neke sambi Nguluvi awoneke mutemapakwe pa kuhagula, nambi vala vanyalukolo vanyawendani pevevakaali sivalegalwa na sivalafikila pakulukagula ukuhagula ikinofu na ikibi, 12Uyuvawo Lebeka swe ilongelwa ulwa yula umwana umulongola amupigila yula va mumbele. Palulo uwuhagusi wa Nguluvi wakwimila lula lweigava yumwene, na siwukwimilagi mufipigo fya avanu. 13Ndawe Uwandike Uwelu we witigila: “Ndamwendite Yakobo neke ndimuvipile Esawu.” 14Ino ngali tutigile ndawuli? Ulwa Nguluvi munyaluhagu? Nangi na ludodo hela! 15Pakuva amutige Musa: “Ndimuwonela ulusungu yula yendiwenda, ukumuwonela ulusungu; ndimuwonela ulusungu yeyeavesaga yengumwenda.” 16Sweno, mbesili sakwimila mulusungu lwa Nguluvi, si wita mu wupifu nambi uwende wa umunu. 17Pakuva Uwandike Uwelu witigila de kwa Falawo: “Ndakuvisile uve Mutema sambi ukwimila veve, uludali lwangu salukagulanike, na ilitawa lyangu lidalikwe mung'i mbesili.” 18Lino, lulipawelu, ulwa Nguluvi akumuwonela ulusungu umunu yeyeavesaga iwenda ukumuwonela ulusungu, na wone awende ukumuwuyapa uyungi ave munyalubesa, nalo ahwanite alupige. 19Apangi umbusa witigila, “Wone luve ndahihyo, mbi Nguluvi ahwana wuli ukumutigila umunu mwananzi? Mbi nani yeahwana ukubesa cheavagite Nguluvi?” 20Neke, veve ve munu, winani mbaka wigelele ukumuwusa Nguluvi? Ngali ikitonga kihwanite kimuwuse umunyakukigada ulwa, “Mbi ndawuli ungadite de?” 21Umunyakugada ahwanite akole ililongo ukupiga mweiwendela, ahwanite agade fitonga fivili ikola ililongo lilyo hela, ikingi kiva kinyalulumbo, na ikingi kiva kigayalulumbo. 22Na lwindahihyo kwa Nguluvi. Awendige alagile ililakali lyakwe na ukulukagulanisa uludali lwakwe. Sweno; ali na uwusindile hilo, akuvakangalila vala veve vadonyitwe na ililakali lyakwe, veve vavagilwe ukwanangwa. 23Na awendige kangi alagile uwolofu wa indolo sakwe, seatuboholye hwehwe ye twe tudonyitwe ulusungu lwakwe, hwehwe yeatugelanise ukwanukila indolo sakwe. 24Pakuva ye hwehwe yeatukemelye si ukutigila uluhuma ku Vayudaya, pesi ukuhuma ku vamyanza. 25Ulu lwelwene lweilonga mukitabu cha Hoseya: “Vala veve si vanu vangu ndivakemela: ‘Vanu vangu!’ Avanu veve sindivenda ndivakemela: ‘Vende vangu!’ 26Na apono pevavalonje: Nyenye ‘Simwivanu vangu’ ipo vakemelwa ‘Vana va Nguluvi umumi!’ ” 27Nave Umuvisi Yesaya, kwa Isilaeli akwihuga liswi de; “Nambi avana va Isilaeli wolofu ndawe uluhanga lwa mumwani, neke hela vakefu avapokwa; 28pakuva Umutwa angufya ukukwisa uluhigilo lwakwe ulukwilaniche mung'i mbeyili. 29Lwindawe Yesaya lwealonzile pamwandi, “Wone Umutwa va amalugu ake aleke ukutulekela avamwi va avana va Isilaeli, twetusila ndawe ku Sodoma, twetusila ndawe ku Gomola.” 30Sweno, tutigile ndawuli? Tutigile de! Avanu avamyanza vesivifwahisigi ukwivika mu wugolofu, yevawuyipwe vagolofu ukukola ulufuuwo, 31neke avanu va Isilaeli vevasakige indagilo sa ukuvawuyapa ukuva vagolofu pa Nguluvi, sivayiweni. 32Mbi ndawuli? Pakuva vihuvyee ifipigo fyawo valemwe ukwihuvila ulufuuwo. Vikuve mwiganga linyakukuvasa. 33Ndawe uwilonga Uwandike Uwelu: “Lavage! Ndivika uko ku Sayuni iliganga ilinyakukuvasa ilitalawe ilinyakugwisa avanu. Neke yeamufuuwa sisaahongelwa inyoni!”

will be added

X\