AVALUMI 7

1Vanyalukolo vangu, nditigila wanda mukulukagula lwengwenda ndonge, pakuva nguvalongela avanu avasisele indagilo. Indagilo sakumutema umunu peiva mumi. 2Tutigile umung'inetu umugomwa, aiva apinzilwe na indagilo ulusika mbeluli pe uvakwe iva mumi, neke wone uvakwe afwe, indagilo iyo sipeyimupinga kangi umung'inetu uyo. 3Sweno, umung'inetu uyo wone ikalase na umugosi yungi ulusika lwe uvakwe we pe mumi, ava mugoni, neke wone uvakwe ave yeafwe, umung'inetu uyo ava mutemapakwe mu ndagilo, nambi agomwe na umugosi yungi saava mugoni. 4Na lwindahihyo kwa nyenye vanyalukolo vangu, nyenye nanye kulubali lwa indagilo mufwe pakuva nyenye mwilubali ulumwi lwa umuvili gwa Kilisito; lino mukave vanu vakwe umwene yeasilibwike ukuhuma kuvafwe sambi muveleke amaveleko amanofu ukwimila Nguluvi. 5Pakuva, pe twikalige mumigendele ja uwunuwunu hela, uwudobokesi wa inzanangifu ise sipwali ukukola mu ndagilo, sapigige ikipigo mu mivili jetu nu kutuletela ifwa. 6Neke lino tukave vatemapetu ukuhuma mundinde ya indagilo, pakuva yetukafwe mu sa inzanangifu, inzanangifu ingaya ludali kangi kwa hwehwe, lino tuhwana ukumupigila Nguluvi mu mikalile imipya ja Umuhe, na si ndawe ukwiga indagilo inzandike. 7Sweno, tutigile ndawuli indagilo isene nzanangifu? Nangi na ludodo hela! Neke ulwene wone pagaye indagilo, nene sindendisikagula inzanangifu che kiki. Pakuva sindendilukagula ukuta che kiki ukudobokela imbi, wone indagilo sike silemwe ukutigila, “Uladobokela.” 8Kwa ukukola ululagilo ulo, inzanangifu save na ikilega cha ukulamusa uwudobokesi uwubi mugati mwanene. Pakuva apagaya indagilo inzanangifu yayiva yifwe. 9Ulusika ulungi nene nde mumi nde pataali na indagilo, neke pesusile indagilo inzanangifu sasilibwike, 10nane ndafwe, sweno indagilo iyadonyige ukuleta uwumi, kwa nene iyo yikandetye ifwa. 11Pakuva inzanangifu yave na ikilega cheyapelitwe na ulo ululagilo, ulo lwanzanzile nu kumbulaga. 12Sweno, indagilo isene nzelu, na ululagilo nalo lwelu lwa wugolofu kangi lunofu. 13Ngali ulu kwekutigila kila ikinofu che kikwambusa ifwa yangu? Nangi, na ludodo hela! Ulwa nachene lwe ulu, ulwa sambi inzanangifu yiwoneke ukuta ye yene hilo, gendye mu ikinu ikinofu kila, swe yikumbulaga. Mwa ulo inzanangifu yiyelelwe ukuta mbi hilo. 14Tukulukagula ulwa indagilo ya kinya umuhe; neke nene ndivamung'i hela ndagusiwe mbe munyawingi va inzanangifu. 15Singukikagula chendandipiga, pakuva kila chendiwenda ukupiga sindipiga, neke kila chengukivipila chendipiga kicho. 16Lino wone, ndipiga ikisutine na chendiwenda nene, sweno ulu kwekutigila kumbi ngwidikila ukuta indagilo nofu. 17Kumbi si yenene nachene yendipiga ulo, pesi yila inzanangifu iyilimugati mwanene. 18Ngulukagula ulwa lusumuli ulunofu ulweluvesaga mugati muwunu wangu. Pakuva nambi ndiwenda ukupiga ulunofu, na baho ndilemwa. 19Pala, apanoje mige ulunofu lwendiwenda, ndipiga lula ulubi lwesimbwendigi. 20Lino wone, ndipiga isisutine na sesindiwenda nene, sweno ulu kwekutigila si yenene yendipiga iso, pesi sila inzanangifu iyilimugati mwanene. 21Lino, yendigukagwe umusimu ugu; ndiwenda ukupiga ulunofu, neke ngulufika lula ulubi lwenyagwe. 22Mugati mwanene hilo munumbula yangu ngusihekelela indagilo sa Nguluvi. 23Neke ndiwona ulwa kololi ululagilo ulungi ulwipiga mu muvili gwangu, ululagilo ulukwihoma na lula lwe uluhala lwangu lukulwidikila. Ulo lukumbika nene muwunyawingi wa ululagilo lwa inzanangifu ulwipiga mumuvili gwangu. 24Ndinalyo nene ndemumikaa! Yenani ye amoka ukuhuma mumuvili ugu ugukusindika nene kufwa? 25Ululumbo luvesage kwa Nguluvi, yeipigaga iso ukukola kulu Mutwa vetu Yesu Kilisito! Sweno, ulu lwendiwali nene; mu luhala lwangu ngulupigila ululagilo lwa inzanangifu neke mu wunu wangu ngulupigila ululagilo lwa inzanangifu.

will be added

X\