AVALUMI 6

1Sweno, tutigile ndawuli? Ngali tuvelage petugina ukwikala munzanangifu sambi uwuwuya wa Nguluvi woloke? 2Nangi na ludodo hela! Kulubali lwa inzanangifu hwehwe yetufwe, luva ndawuli tuvelage petugina ukwikala kangi mu nzanangifu? 3Pakuva, mukulukagula ulwa hwehwe yetwabatisiwe twave kinu kimwi na Kilisito Yesu, twabatisiwe nu kuhanga mufwa yakwe. 4Twavelige twibatisiwa twahanzile mufwa yakwe, nu kutagwa pamwinga nave, sambi ndawe umwene Kilisito lweasilibwike uluhuma kuvafwe ukukola ikipigo ikinyandolo cha udade, sambi nahwe tuve na imigendele imipya. 5Pakuva, ndawe hwehwe yetuhanzile nave mufwa ndawe umwene, lwindahihyo twihanga nave mu kusilibuka ukuhuma kuvafwe ndawe Umwene. 6Tukulukagula ulwa uwunu wetu uwulovela watumbikwe pamwinga na Kilisito sambi wula uwunyanzanangifu wanangwe, sambi tulemwe ukuva vanyawingi va inzanangifu. 7Pakuva, umunu yeafwe inzanangifu yigaya ludali kulumwene. 8Sweno, wone yetufwe pamwinga na Kilisito, tufuuwagwe ulwa satwikala kangi pamwinga nave. 9Pakuva, tukulukagula ulwa Kilisito yeasilibwike uluhuma kuvafwe na sisaafwa kangi, ifwa ngaya ludali kulumwene. 10Sweno, pakuva afwe sukumwi hela, inzanangifu ngaya ludali kulumwene, kangi na lino de akwikala muminanile jakwe mu wulilumwi na Nguluvi. 11Lino, lwindahihyo na nyenye luvavaje mwikagulage ulwa kulubali lwa inzanangifu yemufwe, neke yemuve mwi wumi mu wulilumwi na Nguluvi ukukola kwa Kilisito Yesu. 12Sweno, inzanangifu silatema mu mivili jenyu iginya kufwa, nambi mwidikile ukutemwa mu wudobokesi wayo. 13Mulatawula nambi ikigawa muvili chenyu sambi kipigikage mu wanangifu na inzanangifu. Ulungi na lulo, mwitawulage yinyenye kwa Nguluvi nda avanu vevasilibwike uluhuma kuvafwe, muwuhumyage uwunu wenyu mbewuli kwa Nguluvi ukwimila uwugolofu. 14Pakuva, inzanangifu sisasivatema nyenye kangi, pakuva simulipasi ya indagilo, pesi ulwa mulipasi pa uwuwuya. 15Sweno, tutigile ndawuli? Ngali tupigage inzanangifu pakuva situlipasi ya indagilo, pesi ulwa tulipasi ya wuwuya? Nangi na ludodo hela! 16Mukulukagula ulwa wone mwitawule yinyenye nda mwivanyawingi nu kumogopa umunu yungi, mwiva nachene mwivanyawingi vakwe umunu yuyo. Na apangi mwiva vanyawingi va inzanangifu, na chekiwoneka baho ye ifwa, na apangi mwiva vanyawingi vaichoga, na chekiwoneka ipo kwe ukuwuyapwa ukuva vagolofu. 17Nambi pamwandi mwe mwivanyawingi va inzanangifu, neke lino ngumulumba Nguluvi mukinatye kwa inumbula mbeyili uwulagile na inzigiso semukanuche. 18Mwakombolilwe ukuhuma mu wunyawingi wa inzanangifu, nu kuva vanyawingi va uwugolofu. 19Lino ipa ndilonga indongele ya kiwunuwunu iya mbepali hela, ukwimila uwuhomefu wenyu yunyenye. Ndawe ulusika ulungi lwemwitawe yunyenye ukuwupigila uwaafu na uwananzi uwimila uwanangifu, lwindahihyo lino mwitawulage uwunu wenyu yunyenye muwupigile uwugolofu uwimila uwelu wi migendele. 20Pemwevanyawingi wa inzanangifu, mwe mwivatemapenyu mwe pataali na uwugolofu. 21Lino, mwambulyee kiki ulusika lulo ukuhumila mwasiso se kulino mwiwona sihonga inyoni? Pakuva chekiwoneka mwasiso ye fwa! 22Neke lino yemukombolilwe uluhuma mu wunyawingi wa inzanangifu, na yemuve mwivakami va Nguluvi, chemukwambulila umo lino we uwelu wa imigendele, na chekiwoneka baho we wumi wa mbepali. 23Pakuva amahombo ga inzanangifu ye fwa, neke ikipelwa cheitawula Nguluvi we wumi wa mbepali mukuva kinu kimwi na Kilisito Yesu Umutwa vetu.

will be added

X\