AVALUMI 3

1Ino, Umuyudaya inakiki ikilutye kuvanu vangi? Mbi ukuwoolwa kwileta kiki? 2Ena, kokuli ukwambula mu nzolofu, ukutala Nguluvi avavisikise Avayudaya ulukani lwakwe. 3Mbi ino luva ndawuli wone avangi vawo sivevafuuwa? Mbi lino ndawuli ulukani ulo luhesa uwufuuwa wa Nguluvi? 4Nangi na ludodo! Nguluvi isigala mufuuwa mbepali, nambi luve avanu mbevali vadesi. Ndawe uwandike uwelu wewitigila, “Peuvesaga wilonga, ing'ani sako sa nachene na pewihiga mbepali wakuvalema.” 5Neke, wone uwanangifu wetu wukolelela ulwa Nguluvi aipiga kwa wugolofu, tutigile ndawuli? Mbi tutigila ulwa igaya uwugolofu pe akututova? (Ipa ndilonga kiwunuwunu.) 6Nangi na ludodo! Luke luvelage ndahihyo, Nguluvi ake ahwana ndawuli ukuyihiga ing'i? 7Napo utigila, “Wone uwutafuuwa wa ulubali lwa nene wukumulagila Nguluvi ulwa mufuuwa ukulutila, na palulo lukumupela indolo, sweno siluke lumbaji nyigwe ukuta ndimunyanzanangifu.!” 8Luli ndawe ukutigila tupigage inzanangifu sambi tupelwe uwunofu lwe vakatufilite ukuta tukwigisa ndahihyo. Nguluvi saavahiga uluvavaje 9Mbi tutigile ndawuli lino? Ngali hwehwe twe Vayudaya twivanofu hilo ukulutila avangi? Nangi na ludodo hela! Pakuva yengaluwene uluhuma pamwandi ulwa Avayudaya na avamyanza mbevali vali muwutema wa inzanangifu. 10Ndawe Uwandike Uwelu wewitigila: “Asukuli umugolofu na yumwinga! 11Asukuli umunu yeakulukagula nave yeakumusaka Nguluvi. 12Mbevali vayasile, mbevali vananzile; Asukuli yeaipiga inofu, asukuli na yumwi. 13Imibeta jawo gindawe uwuvi uwulimwasi, indimi sawo simemile uwudesi (uwusanzi) Mumilomo jawo sihuma ing'ani sa uwuwulasi ndawe uwusungu wa inzoka. 14Ing'ani sawo simemile ing'ooto ing'ali. 15Amagulu gawo ginaluvilo kukuwulaga, 16kukwevabitaga vakwananga na ukutesa. 17Ing'asi iya uwikalakunoga sivayiseli, 18sivihosagi ulwa ukumogopa Nguluvi.” 19Tukulukagula ulwa indagilo savisilwe kwa vala avali mundagilo, sambi valemwe ukuva na ulukani lwa ukwikanila. Na ing'i mbeyili yili pasi ya uluhigilo lwa Nguluvi. 20Pakuva asukuli umunu yeyeavesaga yeakwidikilwa ukuva mugolofu pa Nguluvi uwimila ukwinatila indagilo; ikipigo cha indagilo kilagila umunu ulwa apigite inzanangifu. 21Neke lino ing'asi ya Nguluvi iya ukuvidikila avanu ukuva vagolofu yeyive pawelu, kangi siyikwimila indagilo. Indagilo na avavisi vakolelela lulu. 22Nguluvi akuvidikila avanu ulwa vagolofu kwa ing'asi ya ulufuuwo lwawo kwa Yesu Kilisito; Nguluvi ipigaga ndahihyo kwa vala mbevali avifuuwa; kugaya luhagu lweluvesaga. 23Avanu mbevali vapigite inzanangifu na vagayite indolo sa Nguluvi. 24Neke pa ikipelwa icha uwuwuya wa Nguluvi, avanu mbevali vakwidikilwa ulwa vagolofu kwa ing'asi ya Yesu Kilisito yeakuvakombola. 25Nguluvi amutawe Yesu sambi kwa idanda yakwe ave ng'asi ya ukuvahesekesa avanu inzanangifu sawo ukwimila ulufuuwo lwawo kulumwene. Agisile ndahihyo sambi alagile ulwa umwene mugolofu. Pidaha Nguluvi akangalilige satugigi ulwa inzanangifu sa avanu; 26Neke lino de akwihoma na inzanangifu sa avanu sambi alagile uwugolofu wakwe. Pakugita ndahihyo umwene Nguluvi ailagila ulwa umwene mugolofu, na ulwa akumunosa ukuva mugolofu umunu yeyeavesaga yeakumufuuwa Yesu. 27Sweno tuva na kiki cha ukwivahila? Kisukuli! Mbi ndawuli kisukuli? Ngali! Pakuva twikwisa indagilo? Nangi! pesi kwa ukukola ulufuuwo. 28Pakuva umunu akwidikilwa ulwa mugolofu uwimila ulufuuwo, na siwimila ukukwisa indagile mu ndagilo. 29Ngali Nguluvi ye Nguluvi va Avayudaya viyena apangi na va avamyanza nawo? Ena na vamyanza vawo. 30Nguluvi yeiyena, nave avanosa Avayudaya vave vagolofu kwa ulufuuwo lwawo na avamyanza nawo kwa ulufuuwo lwawo. 31Ngali twikola ulufuuwo sambi twanange indagilo? Na ludodo; pesi ulwa tukusipela indagilo na uludali lwayo.

will be added

X\