AVALUMI 16

1Ndiwenda ukumukagulisa ukwenyu Umuhasa vetu Fwebe umukami va ilikanisa lya ku Kengeleya. 2Mumwanukilage ukwimila Umutwa ndawe ulwinogela avanu va Nguluvi. Mumutangage mwa fyeava agulwime, pakuva umwene akave munu munofu hilo kwa awolofu na kwa nene kangi. 3Ndihungisa kwa Pilisika na Akila, avanyakupiga vayangu mufipigo fya Kilisito Yesu. 4Avene vevitawe uwumi wawo ukwimila nene. Vinogela ukulumbwa, si ukuta ulo lwa nene hela, pesi na kwa amakanisa mbegali ga avanu avamyanza. 5Ndihungisa kangi na ku likanisa ilikong'ana mukaye yawo. Ndihungisa kwa munyawiyendi vangu Epayineto yula uva ukutala ukumufuuwa Kilisito mulutanana lwa mu Asiya. 6Mumuhungilage nayi Maliya yeapigite kwa wupifu ukwimila nene. 7Ndihungisa kwa Anduloniko na Yuniya avanyang'i avayangu vevasopitwe mundinde pamwi na nene; nawo vakagulanike hilo mwa avigendo, kangi vatasile ukwingila mu wukilisito nene pesindilava nzingila. 8Ndihungisa kwa Ambulyato, munyawiyendi vangu mu kuhanga na Umutwa. 9Ndihungisa kwa Ulubano, umunyakupiga muyangu mu wupisi wa Kilisito, kangi ngumuhungila Sitaku. 10Mumuhungilage nayi Apele ye uwufuuwa wakwe kwa Kilisito uwukawonike pelu. Ndihungisa kwa mbevali avali mukaye ya Alisitabulo. 11Ndihungisa kwa Helodiana, munyang'i muyangu; na kwa mbevali avali kwa Nalikisi yeakamwidiche Umutwa. 12Mumuhungilage Tilifena na Tilifosa avipiga ifipigo mu wupisi wa Umutwa, na umunyawiyendi vangu Pelisi ye akapigite nzolofu ukwimila Umutwa. 13Mumuhungilage Lufo, munu umupifu hilo mu kumupigila Umutwa, nayu yuve kangi ye yuvangu nayinene, 14mumuhungilage nayi Asungilito, Filegoni, Helena, Patuloba, Helima na avanyalukolo mbevali avali pamwi nawo. 15Mumuhungilage Filologo nayi Yuliya, Neleya na umuhase, nayi Olimba pamwi na avanu mbevali va Nguluvi avali pamwi nawo. 16Mwihungilage mukwinonela muwende wa kinyalukolo mbemuli. Kamwene mbemuli nguvahungila ukuhuma ku makanisa mbegali ga Kilisito. 17Vanyalukolo vangu, nguvagongola muvawuulilage pawelu mbevali avakwambusa ukusutana na ukwambusa avangi vagwe, visutana na inzigiso semwigisiwe. Mwilegage na avanu avindawe iwo, 18pakuva avanu avindawe iwo sivakumupigila Kilisito Umutwa vetu, pesi vakugapigila amaleme gawo vavene. Vilonga inofu na ukudalika kwa ukugongolesa viyasa inumbula sa avanu avagolofu. 19Pakuva ichoga chemwinacho kikapulise kuvanu mbevali, nambi nene mbe na luhekelelo kwa nyenye, ngembwenda muvelage na uluhala ulukwilaniche mufinu ifinofu na muvelage simwivanga kinu mung'ani imbi. 20Nave Nguluvi ikilamuko cha uwikalakunoga sahaava ukumukinya setani nu kumuvika pasi pa magulu gakwe. Uwuwuya wa Umutwa vetu Yesu Kilisito wuvelage nanyenye. 21Timoti, umunyakupiga pamwi na nene akuvahungila, nayi Lukio, Yasoni na Sosipatulo Avayudaya vayangu vakuvahungila 22Nayi nene Telitio ye ngwandika seilonga Pawulo mubalula iyi nguvahungila. 23Gayo, yeanzanuche mukaye yakwe na likanisa mbelili ilyalikong'ana kulumwene, likuvatigila kamwene, Elasito, umulolesi va uwunono wa iboma iyi pamwi nayi Kwalito, vakuvahungila. [ 24Uwuwuya wa Umutwa vetu Yesu Kilisito wuvesage na nyenye mbemuli. Ena.] 25Sweno, lino tumulumbage Nguluvi! Ye mwene yeahwanite avakangase mu lukani ulunofu lwe ndadalike ulukani lwa Yesu Kilisito, na mwa kila ikinyele ikigubwilwe na ichekifihitwe uluhuma pidaha. 26Sweno, inachene iyo yiletitwe pawelu na ukuhuma muwandike uwa avavisi lukagulanike ku wutwa wa ing'i mbesili, ukwimila ululagilo lwa Nguluvi uva mbepali sambi vapelwe ichoga cha ukufuuwa. 27Kwa Nguluvi yeiyena umunyaluhala ulukwilaniche, sivesage indolo kwa ukukola kwa Yesu Kilisito, mbepali na mbepali! Ena.

will be added

X\