AVALUMI 15

1Hwehwe yetukange mulufuuwo lutuvaje ukuvatanga vala avahomefu, sambi vahwane ukulowoka mu nalamu sawo. Tuwulekage uwusatila petu. 2Yeyeavesaga munu mwa hwehwe lumuvaje amunogelage munyafivawo vakwe muwunofu, sambi uyo isenge mulufuuwo. 3Pakuva Kilisito sapigiti isikumunogela hela yumwene, Pesi ulwa ave ndawe Uwandike Uwelu wewilonga, “Amaligo mbegali gevakulisile gafiche nene.” 4Pakuva mbesili inzandike, sandikwe sambi sitwigise hwehwe nahwe tuve na uluhuvi na ulwikangaliso, na uwusikimafu wetwipelwa mu Wandike uwo Uwelu sambi tuve na uluhuvi. 5Nguluvi yula ye kilamuko cha ulwikangaliso na uwusikimafu mbewuli, avapelage nyenye uwulaganila kumwi ndawe ulwihwana mwa Kilisito Yesu, 6sambi nyenye mbemuli, kwa liswi limwi nu kulaganila kumwi mumupele indolo Nguluvi, Dada va Umutwa vetu Yesu Kilisito. 7Sweno, mwiyanukilage ukwimila indolo sa Nguluvi ndawe Kilisito nave lweavanuche nyenye. 8Pakuva nene nguvalongela nyenye ulwa Kilisito avapijee Avayudaya sambi alagile uwuhuvilwa wa Nguluvi, na sila inyuviso sa Nguluvi seavapelye avakukwetu sambi sikwile, 9sambi nawo avamyanza vamupele indolo Nguluvi ukukola ulusungu lwakwe. Ndawe Uwandike Uwelu wewitigila: “Palulo sangulumba, pagati pa avanu avamyanza sa nzimba ululumbo lwa ilitawa lyako.” 10Kangi Uwandike witigila: “Muhekelelage nyenye nye vamyanza pamwi na avanu vakwe Nguluvi.” 11Kangi witigila: “Mumulumbe Nguluvi, nye vamyanza mbemuli; mumulumbe, nye vanu mbemuli.” 12Kangi Yesaya itigila: “Umwisukulu va Yese saasa, saakang'ulwa ateme ku vamyanza; nawo savamwihuvila umwene.” 13Sweno Nguluvi ye kilamuko cha uluhuvi, avapelage nyeye uluhekelelo mbeluli na uwikalakunoga uwihuma mulufuuwo lwenyu, uluhuvi luginage ukoloka muludali lwa Umuhe Umwelu. 14Vanyalukolo vangu, nene yinene, ngulukagula nachene ukuta nyenye mumemile uwunofu, na uwimbi mbewuli, na muhwanite ukwiyisa yinyenye kwa yinyenye. 15Neke ulwene ndivandiche singi na singi mu balula iyi ngaya muhwehwe, sambi ndiviwuse isingi de. Migite ulo ukukola uwuwuya weamelye Nguluvi 16wukuva mukami va Yesu Kilisito kuvanu avamyanza. Icho che kipigo changu cha uwutambisi, ukudalika Ulukani Ulunofu lwa Nguluvi sambi avanu avamyanza vave nambika iyikwidikilwa na Nguluvi, inambika iyesiwe na Umuhe Umwelu. 17Sweno, kono wenyanzile na Kilisito nywanite nane ukwivahila ikipigo changu kwa Nguluvi. 18Singwigelela ukulonga ikinu kingi ichekivesaga pesi kila hela che Kilisito Yesu apigite ukunuma nene sambi avanu avamyanza vave na ichoga. Apigite ulo ukwimila ing'ani na ifipigo. 19Muludali lwa imiitu na uwuhulo na muludali lwa Umuhe va Nguluvi. Sweno, kwa ukugenda polofu ukuhumila ku Yelusalemu mbaka ku Iluliko, ngadalike hilo Ulukani Ulunofu lwa Kilisito. 20Na mbepali uwudobofu wangu wukave ukudalika Ulukani Ulunofu si pala pe ilitawa lya Kilisito likapulise, longanzenge mu lutu lwa umunu uyungi. 21Ndawe Uwandike Uwelu wewitigila: “Avanu mbevali vesivalongele isa umwene savalava. Na vesivalapulika, savalukagula.” 22Nambi ukwimila lulo, ngatanilwe kolofu ukusa ukwenyu. 23Neke pakuva lino yendusise ikipigo changu imbali isi, na pakuva kwa myaka myolofu ngave na amahosa gaga ga ukusa ukwenyu, 24ngwihuvila ukupiga ulo lino. Ngembwenda ukuvawona pendilutila mulugendo lwangu pesogwe ku Sipaniya na ukwanukila uwutanzi wenyu mulugendo ulo petutinasa kwa pelusika ludodo na nyenye. 25Neke, kulino sogwe ukuvapigila avanu va Nguluvi kula ku Yelusalemu. 26Pakuva amakanisa ga ku Makedoniya na ku Akaya galamwe ukutawula umuhangu gwawo ukuvatanga avanu va Nguluvi avamikaa kula ku Yelusalemu. 27Vavene vevalamwee ukupiga lulo, neke ulwene nachene icho che kipigo chawo kwa avayawo. Pakuva avanu avamyanza vakahanzile mu wufunyilile wa munumbula wa Avayudaya, luvavaje nawo lino ukuvapigila Avayudaya mwa fyevagulwime ifya mung'i. 28Pesinzile ikipigo icho nu kuvapela umuhangu ugo gwevakakong'ise ukwimila avene, pendivagendela nyenye pendilutila sogwe ku Sipaniya. 29Ngulukagula ukuta penzusile ukwenyu ndivasila mu uwufunyilile mbewuli wa Kilisito. 30Sweno, vanyalukolo vangu, nguvagongola ukwimila Umutwa vetu Yesu Kilisito, na uwimila uwende uwihumaga kwa Umuhe, munangage ukusukila kwa Nguluvi. 31Musukage hilo sambi mokwe ukuhuma mwa vala vesivafuuvitwi avali ku Yudaya, na kikipigo changu nacho uko ku Yelusalemu, sambi nzidikilwe na avanu avelu avali kuko. 32Sweno, wone Nguluvi awende, nywana ukusa ukwenyu na mutima mwelu, suupe pamwi na nyenye. 33Nguluvi yula yemwene ikilamuko cha uwikalakunoga avelage na pamwi na nyenye mbemuli! Ena!

will be added

X\