AVALUMI 14

1Mumwanukilage umunu umuhomefu mulufuuwo, neke ulwene mulahwa mukwidadisa ulwa amahosa gakwe. 2Ulufuuwo ulwa umunu uyumwi lukwidikila ukulya mbefili, neke umunu umuhomefu mulufuuwo ailya simboga sa amahamba swe. 3Umunu yeailya mbefili alamubedala yesiailya; na yula yeailya simboga sa mahamba swe alamuhiga yula yeailye mbefili, pakuva Nguluvi amwanuche uyo. 4Mbi veve winani, yewihiga umukami va umunu uyungi? Wone ave imile apangi agwe ulo lwa umuvina vakwe; ahwana ukumwimya. 5Umunu uyumwi aitigila ikimunyi ikimwi kilutye kufiyafyo, na uyumwi itigila ifimunyi mbefili filing'ene. Yeyeavesaga munu ibatililage amahosa gakwe geinago. 6Yula yeakwinatila ikimunyi ikimwi wita kimunyi ikiliyena, ipigila lulo mulu Mutwa, yeilya inyama ilila mulu Mutwa, pakuva ahele akumulumba Nguluvi; na yula yakwiyima ipigila lulo mulu Mutwa nave ahele akumulumba Nguluvi. 7Pakuva asukuli umunu mwa hwehwe yeakwinanila yumwene hela, na asukuli yeayikwifwila yumwene, 8Pakuva wone tuve twinana twinanila mulu Mutwa, na petwifwa, tukumufwila Umutwa. Sweno, wone twinana nambi twifwa, hwehwe twi wunono hela wa Umutwa. 9Pakuva Kilisito afwe, asilibwike, sambi ave Mutwa va awumi na avafwe. 10Mbi ndawuli lino veve, ukumuhiga umunyalukolo vako? Nave ndawuli ukumubedala umunyalukolo vako? Hwehwe mbetuli satwima pa kigoda cha uluhigilo cha Nguluvi. 11Pakuva Uwandike Uwelu witigila: “Ndawe nene lwe ndi mumi ilonga Umutwa, umunu yeyeavesaga saafugamila. Na umunu yeyeavesaga saidikila ukuta nene ye nene Nguluvi.” 12Pakuva, hwehwe mbetuli satwilongela pa Nguluvi umunu na sakwe. 13Sweno, tulekage ukwihiga, pesi ukuta sugunalage hela, ulwa tulongatuve fikuvaso ku munyalukolo na munyalukolo nambi ukumwambusa agwe mu nzanangifu. 14Ngulukagula na kangi ndiginalisiwa na Umutwa Yesu, ukuta kisukuli ikinu chechekivesaga ikinyawinya ku kilamuko chakwe; neke wone umunu ahose ukuta ikinu ikingi kinyawinya, sweno, kulumwene chakiva kinyawinya. 15Wone umuhuguvike umunyalukolo vako uwimila ichakulya, apo veve imigendele jako sigilongoswa mu wende. Pogole widikile ichakulya chako chambuse uyungi ayage ye Kilisito amufwilye! 16Sweno, mulidikila ikinu chemwiwona kinofu sambi kibedalwe. 17Pakuva Uwutwa wa Nguluvi si wukwimilagi mu kulya na mu kunywa, pesi ukuta wukwimilaga mu wugolofu, muwikalakunoga na luhekelelo ulwiletwa na Umuhe Umwelu. 18Na yeyeavesaga munu yeakumupigila Kilisito ede uyo akumunogela Nguluvi nu kwidikilwa na avanu. 19Sweno, twinatilage mbepali ing'ani isiletaga uwikalakunoga na isikututanga ukwisenga yihwehwe kwa yihwehwe. 20Ino ulananga seapigite Nguluvi ukwimila ulubesa lwa ukulya. Ifyakulya mbefili finofu, neke silwinoga ukulya ichakulya ikikwambusa umunu agwe mu nzanangifu. 21Ikiba peulesile ukulya inyama, na ukunywa idifayi nave ukupiga lweluvesaga lukani ulukwambusa umunyalukolo vako agwe. 22Sweno, wibatililage chewifuuwa pagati ya veve na Nguluvi vako. Mufunyilile yula ye akwilamulila cheapiga neke inumbula yakwe yilemwe ukumuhiga. 23Neke wone umunu ave isina peilya, Nguluvi amuhiga wone alye, pakuva ikipigo icho sikikwimila mulufuuwo. Na chechekivesaga kipigo chesikikwimila mu lufuuwo icho cha wanangifu.

will be added

X\