1 Ino nguvagongola vanyalukolo vangu, mwitawulage uwunu wenyu kwa Nguluvi, yive nambika iya mbepali, nzelu na iyikumunogela. Iyo ye ng'asi iyanachene ya ukumusunyalila. 2 Mulemwa ukwiga imigendele ja mung'i iyi, pesi ulwa mupitukage mugati mwenyu ukwa amahosa genyu. Ipo pepene pe muhwana ukwinatila uwende wa Nguluvi, ulo lwelulagila wunofu, ulukumunogela na ulukwilaniche. 3 Ukwimila uwuwuya weamelye Nguluvi nguvalongela nyenye mbemuli: mulidudumba ukuta mwina kinu ikilutye mwilutisa kwa lula uluvavaje luvelage. Amahosa genyu gavelage gakwilaniche ikigelo cha ulufuuwo lwe Nguluvi amugavye yeyeavesaga mumu. 4 Umuvili gwina mbali nzolofu, na ulubali lweluvesaga lwina kipigo chakwe. 5 Lwindahihyo nambi hwehwe twiwolofu, twimuvili gumwi pamwi na Kilisito, na yeyeavesaga munu iva lubali lwa umuyagwe. 6 Twinafyo ifipelwa ifiliwungi na wungi tufipigilage ukwimila uwuwuya wetwapelitwe; wone uyumwi ina kipelwa icha uwuvisi kivelage kigelela mulufuuwo lwetu. 7 Umunyakipelwa cha uwupisi nave akipigilage lulo. Uwunyakipelwa cha uwigisi avelage mwa lulo. 8 Umunyakipelwa cha ukukenyela avangi nave avelage mwa lulo. Umunyakugavila avangi che inacho nave avelage mu wudeke. Umutanzi nave Imililage mu wuwuya wuwo; na yeyeavesaga ipiga ulukani lwa ulusungu nave agendelage lulo muluhekelelo. 9 Uwende wenyu wuvelage wugaya wubuganisi uwewuvelaga. Mubihilage imbi mbesili, mwinatilage inofu mbesili. 10 Mwiyendage yinyenye kwa yinyenye nda vanyalukolo; yeyeavesaga mwa nyenye avelage na ichoga kulumuyagwe. 11 Muladedela mu wupifu, mumalavadikage munumbula mu mupigilage Umutwa. 12 Muhekelelage muluhuvi lwenyu: muvelage na uwusindile mulugudo na mwifunyage mbepali. 13 Muvatangage avelu va Nguluvi, mwipigila muwudeke. 14 Muvasukilage uwufunyilile mbevali vevakuvatesa nyenye; ena, muvasukilage uwufunyilile mulemwa ukuvasukila ululeko. 15 Muhekelelage pamwi na vala avihekelela muvembage na avivemba. 16 Muvelage na uwunofu wuwula kwa mbevali. Mulivahila uwuvina, pesi ulwa mwilevesage na mufidodo. 17 Muliwona nda mwivanyaluhala ukulutila. Mulihombela umukole mu sa uwanangifu. Mwinatilage inofu kwa mbevali. 18 Kwa lwe luhwana kwa ulubali lwenyu, muvelage na uwikalakunoga na avanu mbevali. 19 Vanyawende vangu, mulihomela umukole, pesi ulwa mumulekelage Nguluvi ulukani ulo; pakuva Uwandike Uwelu witigila, “Ukuhomela umukole ulo lwangu; nene ye nyomela umukole ilonga Umutwa.” 20 Nda wone, “Umutavangu vako peina nzala; mupelage ichakulya; na wone ave akelwike; mupelage anywe. Pakuva kwa ukupiga ulo pumuhongela inyoni hilo, uva nda umutwikite amakala ga umoto mu mutwe gwakwe.” 21 Ulidikila uwubi wukuleme, uwulemage uwubi ku wunofu.
Copyright © 1999 The Bible Society of Tanzania; ℗ 2010 Hosanna