AVALUMI 11

1Sweno, ndiwusa: Nguluvi avabihye avanu vakwe? Nangi na ludodo hela! Na yinene ipa ndi Mwisilaeli, mbegalo ya Abulahamu, va ulukolo lwa Benyamini. 2Nguluvi siavabihyi avanu vakwe, veavahagwe uluhuma pamuvango. Mukwiwuka Uwandike Uwelu wewitigila ulwa Eliya peamukalalilige Nguluvi ukwimila va Isilaeli: 3“Mutwa vakavawulige avavisi vako neke vadenye na pifunyo pako. Yinene hela yendiyena yesige, nawo vidaga ukumbulaga.” 4Mbi Nguluvi amupitwe kiki? Amutige, “Ndiviche avanu mbilima simufung'ati vesivakumusunyalila Baali.” 5Sweno, lwe lwiwali, na kulino de; poyili imbalilo iyifulwike vevasige ve Nguluvi avahagwe ukukola wuwuya wakwe. 6Uwuhagusi wakwe wukwimilaga mu wuwuya wakwe na si wukwimilagi mufipigo fyawo. Pakuva, wone uwuhagusi vakwe wuke wuvelage mufipigo fya avanu apo uwuwuya wakwe siwuke wuva wuwuya kangi. 7Lino ndawuli? Avanu va ku Isilaeli sivakiweni chevasakige; neke mbevali avahagule vakiwene. Avangi vadibise amapulikilo valemwe ukwidika. 8Ndawe Uwandike Uwelu wewitigila: “Nguluvi awuyipe inumbula sawo sive sito, mbaka neng'ino de sivahwaniti valave kwa amiho gawo, nambi ukupulika kwa amapulikilo gawo.” 9Nayi Dawudi itigila: “Lekage inyekelelo sawo sive lutego lwa ukuvagwilisa, vagwile neke vapume. 10Lekage amiho gawo gatilivale sambi valemwe ukulava. Neke imigongo jawo gidenyeke ukwimila uludugo lwa mbepali! ” 11Sweno nene ndiwusa, mbi Avayudaya vikuve nu kwanangika sukumwi? Nangi na ludodo hela! Ukwimila uwananzi wawo uwukombolwa uvafiche avanu avangi vesi Vayudaya, sambi Avayudaya vavawonele mbafya. 12Uwananzi wa Avayudaya waletite uwufunyilile wolofu kwa avanu va ing'i isingi, na uwutafuuwa wawo wa kinyamuhe wuletite uwufunyilile wukomi uwulutye kwa avanu va ing'i isingi. Sweno lulipawelu hilo ukuta ukwingila kwa imbalilo yawo iyikwilaniche sakuleta uwufunyilile wukomi uwulutye. 13Ino de nguvalongela nyenye nyevamyanza: Pakuva nene ngave mwigendo wa Avamyanza ngwivahila ikipigo changu, 14sambi nzambuse avanyang'i vayangu vavawonele nyenye imbafya na palulo sambi ndivapoke avamwi vawo. 15Pakuva wone ukubihilwa kwawo kukalesile ing'i yilamule na Nguluvi, luva ndawuli ulusika lwevidikilwa na Nguluvi? Avafwe vasilibuka! 16Wone ulubali ulumwi lwa umukate lufunyililwe, umukate mbeguli apo gwiva mufunyilile, wone indela sa umubiki nofu, na matagala nago gava manofu. 17Ena amatagala agamwinga ga umuseituni gwa mukinyungu gatotekilwe, neke amatagala ga umuseituni gwa mwihala gwanapikiswe baho. Nyenye nye vamyanza mwindawe umuseituni gwa mwihala neke lino mwihanga muludali na uwunono wa umuseituni ugwa mu kinyungu. 18Ino mulavabedala vala avatotekilwe ndawe amatagala! Mbino nave pokili cha ukwivahila, mwiwukage ukuta si nyenye ye umubiki gwisipye, pesi indela semwisipye nyenye. 19Ino mutigila, “Ena, ino amatagala gatotekilwe sambi nyalile nene.” 20Ena gatotekilwe pakuva lwagayite ulufuuwo, neke veve wimye mu lufuuwo lwako. Neke ulwene ulivahila; wikomalilage. 21Lino wone Nguluvi siavalesili Avayudaya, vevindawe amatagala amalovela mumubiki, mwitigila avaleka nyenye? 22Lino wiwukage, ukuta Nguluvi munofu kangi mukali. Umwene mukali kwa vala avagwe, kangi munofu kwa veve wone uve peuvelaga mu wunofu wakwe; neke wone sindahihyo nayiveve nave utotekelwa uwuuke. 23Nawo Avayudaya lwindahihyo, wone vawuleke uwutafuuwa, kangi vapilulwa pevevipwali. Pakuva Nguluvi ina uludali lwa ukuvapilula kangi. 24Nyenye mwevanu va ing'i isingi, kwa uwulovela mwindawe amatagala ga umuseituni gwa mwihala, lino mwahesiswe kuko, neke munapikisiwe mu museituni umulimilile gwa mu kinyungu, apono pe kwa uwulovela sipe penyu nda. Neke Avayudaya kwa uwulovela vindawe umuseituni gwa mu kinyungu, na salulava lukani lupefu hilo kwa avene ukunapikisiwa kangi mu mubiki gugula. 25Vanyalukolo vangu, ndiwenda muyikagule inachene iyi yiyeyifihime samulonga mwitigile mwivanyaluhala ukulutila. Ulubesa lwa Avayudaya lwelwa lusika ludodo hela, mbaka avanu va ing'i isingi pevave yevamufiche Nguluvi. 26Ipo pepene pe ulukolo mbeluli Isilaeli pesalukombolwa, ndawe Uwandike Uwelu wewitigila: “Umukombosi ahuma ku Sayuni, awuhesa uwanangifu wa avana va Yakobo. 27Ulu lwelufingano lwefingana nawo. Ulusika lwendivahesekesa inzanangifu sawo.” 28Pakuva Avayudaya vakulubihila Ulukani Ulunofu, Avayudaya yevave vatavangu va Nguluvi, neke ulwene lukwimila ukwambula kwenyu nyenye mwe vanu va ing'i isingi. Neke pakuva vahagule vakaali pe vanyawiyendi va Nguluvi ukwimila avakukwawo. 29Pakuva Nguluvi peavapelye avanu ifipelwa fyakwe na ukuvahagula, siayihuguvala peapigite ulo. 30Pamwandi nyenye mwe mugayite ichoga kwa Nguluvi, neke lino mwanuche uwudeke wakwe ukwimila uwugaya ichoga wawo. 31Ndahihyo, ukwimila ulusungu lwemwanuche nyenye, Avayudaya vakumubesa Nguluvi lino, sambi nawo vanukile ulusungu lwa Nguluvi ndahihyo. 32Pakuva Nguluvi avadindye avanu mbevali mundinde iya imbedasi sambi avalagile mbevali ulusungu lwakwe. 33Uwunono na uluhala na uwuseela wa Nguluvi uwukomi ukulutila! Na ulusungu lwakwe silwawulongo! Na ing'asi sakwe nalamu ukukagulanika! Ndawe Uwandike Uwelu wewitigila: 34“Yenani yahwana ukugakagula amahosa ga Umutwa? yenani yahwana ukumwiyisa Nguluvi? 35Na apangi yenani yeamupelye kinu tandi sambi ahwane ukupilulilwa kangi ikinu kicho?” 36Pakuva ifinu mbefili fyagafilwe na umwene na ifinu mbefili fihumaga kulumwene, mbefili finu fyakwe na fili muludali lwakwe. Indolo sivelage kulumwene mbaka ku mbepali na mbepali! Ena.

will be added

X\