UWUGUBULILWE WA YOHANE . 8

1Na Umwanang'olo ave ihesa indoni iya mufung'ati, kwave sili kuchanya kwa lusika lwa ilipinga lya ikivalilo kimwi de, 2ndawe ndavawonige vala vanyivaha avimufung'ati avakwimaga pa Nguluvi vapelitwe imembe isimufung'ati. 3Umunyivaha uyungi afikite, weakolye ikifung'lisiso ikiwuyapile isahabu, iimite pifunyo. Nave apelitwe uwufumba wolofu ahanze pamwinga na ulwifunyo lwa avanu mbevali va Nguluvi, pala pifunyo apawuyapile isahabu apali pawulongolo wa ikigoda cha uwutwa. 4Ilisusi lya uwufumba lyahele kiting'a kuchanya, pamwinga na ulwifunyo lwa avanu va Nguluvi, ukuhuma mumawoko gakwe uyo munyivaha yee pa Nguluvi. 5Ndawe umunyivaha ategulige ikifung'ilisiso icho, akukisopa umoto gwa pifunyo akukimemya, swe akukitosa kung'i. Swe kwave na umubumo, limadadama, limemi na ikitulo cha ing'i. 6Ndawe vala avanyivaha avimufung'ati avakolye amapembe agimufung'ati swe vakwigelanisa ukugakuva. 7Umunyivaha uva kutala akufile lipembe lyakwe. Swe indonya iyihanging'ine na amaganga na idanda fyatoosiwe mung'i. Swe iyimwi kwa isidatu ya ing'i yaapye. Na iyimwi kwa isidatu ya imibiki jaapye, na amahamba mbegali amadodi gaapye. 8Umunyivaha uva kavili akufile lipembe lyakwe. Na ikinu wita ikidunda kikomi ikikwaka umoto chatoosiwe mubahali, 9iyimwi kwa isidatu ya ifigawa mbefili fya mubahali fyaafwe, na iyimwi kwa isidatu ya ifipugu ifikomi fyanangike. 10Ndawe umunyivaha va wudatu akuvige lipembe lyakwe. Na ing'eng'esi ingomi yeyaakige wita moto, yaagwe ukuhuma kuchanya, na ukwika mu yimwi ya isidatu ya imikoga na imifwilo ja ululenga. 11Ing'eng'esi iyo yitambulwa, “Wukali.” Sweno, iyimwi ya isidatu ya indenga save ng'ali, avanu wolofu vaafwe ukwimila ululenga lulo, pakuva lwapitwike ukuva lukali. 12Ndawe umunyivaha va wutayi akuvige lipembe lyakwe. Iyimwi ya isidatu ya ilisuva, na ya umwesi na ya ing'eng'esi yatofilwe; mbaka lulung'ali lwayo lwayasile ulumwi lwa isidatu lwa uwumalavadifu wayo. Iyimwi kwa isidatu ya ikimunyi nayo yagayike, lwendahihyo na iyimwi ya isidatu ya ikilo nacho. 13Ndawe ndalavige, swe ndipulika imbungu yiguluka kuchanya hilo kwilanga yilonga yihugite, “Mwinalyo, mwinalyo, mwinalyo yemukwikala mung'i ulusika lwe avanyivaha avadatu vevasige pevava vakufile amapembe gawo!”

will be added

X\