UWUGUBULILWE WA YOHANE . 6

1Ndawe ndamuwonige umwanang'olo ihesa indoni iyimwi ya sila indoni isimufung'ati. Ndakipulike ikimwi cha fila ifigawa ifinyawumi ifitayi kilonga kikwihuga wita limadadama, “Wusage!” 2Nene ndawe ndalavige, na kumbi pepoyili ifwalasi yimwi yinya livala lyelu baho. Na yeayihofile alakolye uludibulo, swe ipelwa na ingela. Sweno, ahesile wita idwesa kangi aginage ukudwesa. 3Ndawe, umwanang'olo ahesise indoni iya kavili. Ndakipulike kila ikigawa ikinyawumi kitigila, “Wusage!” 4Nane ndalafile na kumbi pepoyili ifwalasi iyingi baho, dung'u. Yeeayihofile apelitwe ikipigo cha uwusoming'asa sambi uwikalakunoga wugaye mung'i, avanu viwulagage, apelitwe limage likomi. 5Ndawe umwanang'olo ahesige indoni ya wudatu. Ndakipulike kila ikigawa ikinyawumi icha wudatu kitigila, “Wusage!” Lavage kumbi pepoyili ifwalasi iyimwi baho initu. Na yealayihofile eakolye ifigelelo fivili ifya ukugelela uwusito mwiwoko lyakwe. 6Ndapulike nda kinu wita liswi ilihuma mugati mwa fila ifigawa ifinyawumi ifitayi, nalyo lyatige, “Ulukongo lumwi lwa uwuse uwufulwike amagobole dinali yimwi wa ingano, na ing'ongo sidatu sa isayili kwa amagobole dinali yimwi, neke ulwene ulananga amafuta nambi idifayi!” 7Ndawe umwanang'olo ahesise indoni iya wutayi. “Wusage!” 8Nani ndalafile, na kumbi pepoyili ifwalasi iyimwi baho ifudufu. Nailitawa lya yealahofile yee fwa, na kuvafwe amuninilige mumbele. Iwo vapelitwe ululagi lwa ulubali ulumwi uludodo ku ng'i, mbeyili, vavawulage avanu vikola limage, ikinge, ifitamwa na ukukola ifikoko ifikali fya mung'i. 9Ndawe Umwanang'olo ahesige indoni ya wuhanu. Ndawe ndawonige pala pasika pifunyo pakufung'ilisisa uwufumba imyuhe ja vala avevawulage vivalwa ulukani lwa Nguluvi, na ukwimila uwolelesi wewolelelige. 10Sweno, ndawe vavembige vakwihuga: “Veve Mutwa, ve Mwelu na ve muhuvilwa, luva panili peufuvalila ukuhombela umukole kwa avakwikala mung'i mbevali ukwimila idanda yetu?” 11Swe vipelwa yeyeavesaga isopeka inaali iyinya livala lyelu, swe vilongelwa ulwa vaginage ukusupa kwa lusika ludodo, mbaka peyikwilye imbalilo ya avakami avayawo na vanyalukolo vawo ve nawo vawulagwa ndawe vavene lwevavawulige. 12Ndawe ndalavige, na ulusika umwanang'olo peahesige indoni iya mutanda, swe piva na ikitulo kikomi cha ing'i; ilisuva lyatilive wita ilyenda ilitifuse; na gu mwesi mbeguli gwave wita danda; 13nasi ng'eng'esi naso sa kwilanga saagwe mung'i wita amakowo ga umusombe amafwamunga lwegilagalaga pasi pe umubiki ugwene gwipuga na ikifulufumbi. 14Kwilanga kwipilinzile wita likalatasi lwelyalipilingwa; ifidunda mbefili na ifisima fyahesiwe pala pefyefipwali. 15Ndawe avatema va mung'i, avavina, avavina va vanyigalu, avanono, vanyaludali, yeyeavesaga munyawingi na umutemapakwe, vifihite mumapalika na mumapango mufidunda. 16Vakufitigila ifyo ifidunda na igo amapalika, “Mutugwilage, mukatufihe pataali na umwene ye ikong'omalaga mukigoda icha uwutwa, na pataali na ililakali lya Umwanang'olo! 17Pakuva ikimunyi ichene hilo cha ililakali lyawo yekifikite. Ngali yenani yeahwana vibese nacho?”

will be added

X\