UWUGUBULILWE WA YOHANE . 3

1“Kwa munyivaha va ku likanisa lya ku Salide wandike: ‘Ulu lwe lukani ukuhuma kulumwene yeina myuhe igimufung'ati ja Nguluvi nasi ng'eng'esi isimufung'ati. Ndisikagwe ing'ani sako mbesili; ngulukagula ukuta wiwoneka nda wina wumi kumbi ufwe! 2Lamuke! Kiginalisage uludali chechekivesaga ikinofu ikikusigalye nacho wesikilava kikukimbila ng'ani. Pakuva, kulino de, sindilafiwona ifipigo fyako ukuta yefikwilaniche pa Nguluvi vangu. 3Wiwukage, lino, sila sewimwigise na lwewapulike, winatilage na ukupitula amahosa gako amafu. Wone ulemwe ukwikomalila ngusila kwa kutinukisa wita umuhiisi, na siukikagula ikivalilo chenzusila. 4Neke povali vakefu uko ku Salide vesivalatifusa imyenda jawo. Iwo vevinoga tugendasage pamwinga nawo kono wevafwite imyenda imyelu pakuva vanoje. 5“Vala vevidwesa, savafwikwa imyenda imyelu ndawe vawo. Nane sinyesa amatawa gawo ukuhuma mukitabu cha uwumi. Kangi ndividikila ukuta iwo vangu pa Dada vangu na pa Vanyivaha vakwe. 6“Yeina amapulikilo, Sweno, apulikage sila umuhe se akugalongela amakanisa! 7“Kwa munyivaha va ku likanisa lya ku Filadelifiya wandikage de: Ulu lwe lukani uluhuma kulumwene ye mwelu na va nachene, yeakolye kila ikidindulilo cha Daudi, na yeidindulaga na sikwali umunu ye adinda yeahwana ukudinda na si kwali umunu ye adindula. 8Ndisikagwe ing'ani sako mbesili! Lino, ndindwe umulyango pawulongolo pa veve wesikwali umunu yeahwanite agudinde; ngulukagula ukuta nave wimugaya ludali lukomi, nambi ndahihyo, pewinatila indagilo sangu, ukuva na ichoga ku lukani lwangu na siukalibihyi ilitawa lyangu. 9Lavagee! Ngusindikila veve ililugu lya avanu vakwe Setani, avanu vevakwitigila avene Vayudaya kumbi vadesi. Ena, ndivasindika kwa veve na ukuvawuyapa vakufugamile wewilava, sambi valukagule ukuta nachene ngwenda veve. 10Pakuva veve yewinatye uwulagise wangu wukuva na ulwikangaliso, nane kangi ngulolela wunofu ulusika lula lwa ulugudo ulukusa mung'i mbesili ukuvagela mbevali avakwikala mung'i. 11Ngusa na sinyava! Lolelage hilo, chewinacho lino, ulonga wanukwe na umunu yeyeavesaga ingela yako ya uludweso. 12“Vala vevidwesa ndivawuyapa vave kipanda mu Tembeli ya Nguluvi vangu, na sisavahuma umo nangi. Kangi nzandika mwavene ilitawa lya Nguluvi vangu, na ilitawa lya iboma ya Nguluvi vangu, i Yelusalemu imya, ye yiika ukuhuma kuchanya kwa Nguluvi vangu. Kangi nzandika mwavene ilitawa lyangu ilipya. 13“Yeina amapulikilo, sweno apulikage sila Umuhe se akugalongela amakanisa! 14“Kwa munyivaha va ku likanisa lya ku Lawodikeya wandikage de: Ulu lwe lukani ukuhuma kulumwene yeitambulwagwa, ‘Ena.’ Umwene ye molelesi umuhuvilwa na uva nachene, yemwene yekilamuko cha ifigawa mbefili fyeagafile Nguluvi. 15Ndisikagwe isako mbesili! Ngulukagula ukuta veve si mufu kwa ulubali lwa ikinyamuhe nambi wimugaya uwuvafi ukwimila isa ikinyamuhe. Ikiba uke uvelage ulilubali ulumwi mwa siso. 16Sweno, pakuva veve wipagatinagati hela nene lino ngutaga kutaali! 17Veve ukwitigila, ‘Nene ndi munono; sinditoka kinu, sindiguluma kinu chechekivesaga.’ Kumbi, veve siukulukagula ukuta veve wi muhomefu, widedeva lusungu hela, wimumikaa, wimubofu kangi uliwufuula! 18Ngukuyisa ugulage kwa nene isahabu iyikwete mumoto peyiwuyapiswa wunofu sambi uve munono nachene. Kangi ikiba ugulage isopeka inzelu, ufwale na ukugubika inyoni sa uwufuula wako. Gulage kangi amafuta wibake pamiho sambi ulave wunofu. 19Nene yendikenyelaga na ukumupumya yeyeavesaga yendimwenda. Ukukola lulo kangasage umutima, silekage inzanangifu sako. 20Lavage! Nene nzimile pamulyango ndikong'ona. Umunu wone apulike iliswi lyangu na ukudindula umulyango, nzingila mukaye yakwe na ukulya ikilyo pamwinga nave, nave alya pamwinga na nene. 21“Vala vevadwesa ndivakong'omeka pamwi nanene pa kigoda changu cha uwutwa, ndawe yinene lwendadwesise swe ndikong'omala pamwi na Dada vangu pa kigoda chakwe cha uwutwa. 22“Yeina amapulikilo, sweno apulikage sila Umuhe se akugalongela amakanisa!”

will be added

X\