UWUGUBULILWE WA YOHANE . 21

1Swe ngukuwona kuchanya ukupya na ing'i imya. Pakuva kuchanya ukwa ukutala na ing'i iya ukutala yeyilutye na kwekugaya bahali kangi. 2Swe nguyiwona iboma inzelu, i Yelusalemu imya, yikwika uluhuma kwa Nguluvi kuchanya ye mbuyape wunofu wita umwigani ihambite wunofu ye sambi vakwitang'ana nu vakwe. 3Swe ndipulika iliswi ilikomi uluhuma ku kigoda icha uwutwa litigila, “Lavage Nguluvi awuyipe uwikalo wakwe pagati pa avanu. Ikala pagati apawo, nawo savava vanu vakwe, nave saava Nguluvi vawo. 4Umwene avahesa inzihosi sawo mbesili, sisakuva na ifwa kangi, nambi uwuvafi, nave kivembo, nave neseko, pakuva lula ulwa umutalo yelulutye!” 5Neke yula yealateng'eme mukigoda icha uwutwa atigile, “Lavage ndiwuyapa mbefili ukuva fipya.” Kangi anigee, “Wandike ulu, pakuva ing'ani isi sa kufuuwa na sanachene.” 6Kangi swe akunigila, “Yesikwilye, nene yendi Alifa na Omega, Muvango na Wusililo. Ye akelwike ndimupela ululenga ulwa ukunywa uluhuma mumufwilo gwa ululenga ulwa uwumi kigaya amombo. 7Yeyeavesaga adwesise anukila iki, nayi nene mba ndi Nguluvi vakwe nave ava mwanangu. 8Neke avanu avanyamuhodo, avagaya ulufuuwo, avanangike, neke avanu, avawulasi, avagoni, avahavi, avisunyalilaga ifihwananguluvi, na avadesi mbevali apono pawo pevavikilwe kwitemela ilikwakaga umoto ugwa ikibiliti, iyo yefwaa ya kavili.” 9Swe uyumwi va vala avanyivaha avevakolye ifinyandilo ifimufung'ati ifyefimemile ing'ooto isa uwusililo, aasile na ukunigila, “Wuse! Nane ngulagila umwigani, umukina Umwanang'olo!” 10Neke Umuhe asogwise, nave umunyivaha anzindike kuchanya kukidunda, ikitaali hilo swe akundagila iboma inzelu, yikwika uluhuma kwa Nguluvi kuchanya, 11iyimalavadika indolo sa Nguluvi. Imyakile jakwe jejindawe iliganga ilya amagobole amolofu nda Yasipi lilangala nda kilole. 12Ye yina lukanzi lutaali na lukomi lunya imilyango ichumi na givili na gweguvesaga mulyango gwa loleligwe na avanyivaha avalolesi ichumi na vavili. Amatawa ga avalolesi va imilyango ichumi na gavili ga Vaisilaeli gemandike pachanya pa imilyango gijo. 13Lweluvasaga lubali kwekwina milyango gidatu, kumihago milyango gidatu, kufuka milyango gidatu, kunena milyango gidatu, kusika milyango gidatu. 14Ing'anzi sa iboma iyo sesenge muchanya mu maganga ichumi na gavili ga ulutu, na pachanya palyelivesaga liganga pepandikwe uyumwi va avanyigendo vanyichumi na vavili va Umwanang'olo. 15Ino yula umunyivaha yetwalonganige alakolye ulugoda uluyapile isahabu lwa kigelelo sambi ayigele iboma iyo, imilyango nasi ng'anzi sakwe. 16Iboma iyo yeyinyawuling'ene uwugasu nu mutaafu filing'ene, neke umunyivaha yula ayigahite iboma iyo kwa ulugoda lwakwe, iboma iyo yeyina mutaafu na uwugasu na uwutaali ukubita kuchanya siva nda kilomita mbilima sivili na magana gatayi. 17Swe igela ulukanzi lwakwe nalo; nalo lwe lwina nzwambo machumi gimutanda kwa ukuvaganisa na amiho ga avanu, che umunyivaha yula akolye kicho. 18Ulukanzi ulo lwe lusenge kwa maganga madung'u ga amagobole molofu, nayi boma iyo yenzenge kwa sahabu inofu, iyimalavadika nda kilole. 19Amaganga ga ulutu lwa ulukanzi ulu lweluwuyapile maganga ganyamavala molofu aga magobole molofu. Iliganga ilya tasile mulutu lyeliganga lidung'u ilya amagobole molofu yasipi, ilya kavili samawati, ilya wudatu kalibadoni ilyawutayi sumalidi, 20ilya wuhanu salidoniki, ilya mutanda akiki, ilya mufung'ati kilisolito, ilya munana sambalajadi, ilya igonza topasi, ilya ichumi kilisoputaso, ilya ichumi na yimwi yasindo, ilya ichumi na sivili amatisito. 21Na imilyango gila ginyichumi na givili je lulu sinyichumi na givili. Na gula mulyango gwemuwuyapile lulu yimwi. Ilikasi ilikomi lyeliwuyapile isahabu inofu yilangala nda kilole. 22Sindayiweni itembeli muboma yila, pakuva Umutwa Nguluvi yumwene na yula Umwanang'olo vevene ve vetembeli. 23Iboma iyo siyiguluma lisuva nambi mwesi ukung'alika, pakuva indolo sa Nguluvi sa sesasing'alika na itala yakwe ye yula Umwanang'olo. 24Avanu va imilongele mbegili. Vagendela mulung'ali lwakwe na avatema va mung'i vawuletela uwunono wawo. 25Imilyango ja iboma iyo sagiva gilimwasi ikimunyi mbekili, pakuva sisakuva na ikilo mumo. 26Ululumbo na uwunono wa avanu va indongele sauwuletwa mugati mumo. 27Neke kisukuli chechekivesaga chaafu chesakingila mumo, nambi umunu yeyeavesaga yeipigaga ifya uluvifyo apangi ifya uwudesi sisaingila mumo. Pesivavala swe avandikwe mukitabu cha uwumi icha Umwanang'olo, vesavingila mugati.

will be added

X\