UWUGUBULILWE WA YOHANE . 20

1Swe ngumuwona umunyivaha uyumwi akwika uluhuma kuchanya we ina ikidindulilo icha kuvafwe na umunyololo umukomi mwiwoko lyakwe. 2Swe akulibata iliyoka lila-Iiyoka lya pidaha kwekutigila Ibilisi, apangi Setani-swe akulipinga myaka mbilima yimwi. 3Swe umunyivaha akulitoosa kuvafwe, swe idinda umulyango ugwa ukwingilila uko na ukutemwa uluhagi sambi lilemwe ukuyasa avanu mbaka ipo imyaka mbilima yimwi pegikwilye. Neke pegilutye imyaka ijo, lidindulilwa kangi, ipo lusika ludodo hela. 4Swe ngufiwona ifigoda ifya uwutwa na avanu ave vateng'ime muchanya, avanu iwo vapelitwe uludali ulwa ukuhiga. Ndagiwene nagi myuhe gila ja avanu avevatumbikwe wimila uwolelesi wa Yesu na wimila ulukani lwa Nguluvi, iva sivasunyalii ing'oko ulwihwano lwayo, sive vateme uluhagi muwusu wawo nave mumawoko gawo. Vapilulilwe uwumi kangi swe vitema pamwi na Kilisito kwa myaka mbilima yimwi. 5(Vala avangi avevafwe sivapelitwe uwumi mbaka imyaka mbilima yimwi pegikwilye) ulo lwe lusilibuko ulwa ukutala. 6Vinomi hilo kangi vafunyilile iwo mbevali avihanga mulusilibuko ulwa ukutala, ifwa iya kavili sisayiva na ludali kuvene savava vatambisi va Nguluvi na va Kilisito na savatema pamwi nave myaka mbilima yimwi. 7Peyesagilutye imyaka mbilima yimwi, setani saadindulilwa uluhuma mundinde yakwe. 8Ino sa ahuma kwivala, neke avange ukuvayasa avanu mbevali avatagalye mung'i mbeyili, kwekutigila, Gogu na Magogu, avakong'asa pamwinga ukwimila iligalu. Nawo savava wolofu nda luhanga lwa mumwani. 9Vatagalye mung'i mbeyili, swe vakuligomba likambi lya avanu va Nguluvi na iboma ya Nguluvi yeayenda. Neke umoto gwikite uluhuma kuchanya, swe gukuvalalisa. 10Nave setani ye avayasige, atoosiwe mulitemela lyakumoto gwa kibiliti, mwe molili ilikoko na yula umuvisi uva uwudesi nawo savateswa pakilo na pamunyi, mbepali na mbepali. 11Ndawe ndakiwonige ikigoda cha uwutwa kikomi chelu, na yula yealateng'eme pachanya. Ing'i na kuchanya swe fikwikwega pamiho gakwe; na ifyo sifyawoniki kangi nangi. 12Kangi swe nguvawona avanu, avavina na vavadodo vimile pakigoda icha uwutwa na ifitabu swe fidindulwa. Neke ikitabu ikingi kwekutigila ikitabu icha uwumi, swe nacho kidindulwa avafwe swe vihigwa ukugelela mumigendele jawo ndawe lwandikwe mufitabu ifyo. 13Ibahali swe yikuvahumya avafwe avemumo, ifwa na kuvafwe fikuvahumya ave mumo. Yeyeavesaga ahigitwe ukwimila imigendele jakwe. 14Ndawe ifwa na kuvafwe fyatoosiwe mulitemela lya umoto. Ilitemela ili ilya umoto yefwa iya kavili. 15Umunu yeyeavesaga ilitawa lyakwe silyawoniki lyandike mukitabu icha uwumi, atoosiwe mwitamela lya umoto.

will be added

X\