UWUGUBULILWE WA YOHANE . 2

1“Kwa munyivaha va likanisa lya ku Efeso wandikage de, ulu lwe lukani ukuhuma kulumwene yeakolye ing'eng'esi isi mufung'ati mwiwoko lyakwe lya kundyo, na yula ye igendaga pagatinagati pa ifimikiso ifimufung'ati ifya itala ifiwuyapile isahabu. 2“Ndisikagwe ing'ani sako wuwupifu wako na ulwikangaliso lwako. Ngulukagula ukuta siuhwaniti uvakangalile avanu avanangifu, na ukuta uvagelite vala avakwitigila ulwa vigendo na kumbi sindahihyo, swe uvakagwe ukuta iwo vadesi. 3Veve wi munyamola, ukakangalye ulugudo ululipolofu ukwimila ilitawa lyangu, na siukadedi umutima. 4Neke ndina lukani lumwi hela kwa veve, veve sipeunzenda kangi lino ndawe pamwandi. 5Sweno, piwukage pala peuke wipwali peuke siulava ugwa, ukasileke inzanangifu sako, na ukupiga ndawe pala pamwandi. Pesi ndahihyo, ngusa kwa veve na ukukihesa ikimikiso cha itala yako pala pekipwali. 6Neke ulwene ngukusumila kwa kinu kimwi: veve ukufivipila fyevipiga Vanikolayia ndawe lwengufivipila nene. 7“Yeina mapulikilo, sweno, apulikage sila se Umuhe akugalongela amakanisa! “Vala vevidwesa sandivapela uwukwilanifu wa ukulya amakowo ga umubiki gwa uwumi uguli mugati ya ikinyungu cha Nguluvi. 8“Kwa munyivaha va likanisa lya Simulina wandikage de: Ulu lwe lukani ukuhuma kulumwene uva ukutala na ukudugilisa, yula yeafwe na ukunana kangi. 9Ndilukagwe ulugudo lwako; ndiwukagwe na uwumikaa wako, nambi ulwene nachene veve wimunono; ndigakagwe na maligo gevakakulisile vala avakwitigila Vayudaya neke ulwene si Vayudaya va nachene, pesi iwo lilugu lwakwe Setani. 10Ulava na muhwehwe na ludodo kwa sila isikuvagila uluteseko. Lavage! Setani isaka ukuvagela ikola ukuvasopa avamwi venyu mudinde; nanye muguda kwa lusika lwa filo finyichumi. Muvelage vahuvilwa mbaka pemwifwa, nane sandivapela ingela ya uwumi. 11“Yeina amapulikilo, sweno, apulikage sila se Umuhe akugalongela amakanisa! “Vala vevidwesa sisavateseka na ifwa iya kavili. 12“Kwa munyivaha va likanisa lya ku Peligamo wandikage de: Ulu lwe lukani lwakwe yumwene yakolye ilimage ilinyawugi mbekuli mbekuli. 13Ndikukagwe kwe wikwali; veve wikalite ku wikalo uwukomi wa Setani! Neke ukaali pewibatilila ilitawa lyangu; siulalubihila ulufuuwo lwako kwa nene mbaka mumisika gila je Andipa umolelesi vangu umuhuvilwa, peawulagilwe pala apono peakwilaga Setani. 14Neke ndinaso ng'efu hela kwa veve; avamwi venyu mwivanyigendo va Balamu yeamufundite Balaki avagwilise avana va Isilaeli valye ifilyo ifitawule nambika ku fihwananguluvi na ukwingila muwugoni. 15Lwindahihyo kangi, povali avangi mwanyenye avanu avakwinatila inzigiso isa Avanikolayi. 16Sweno, silekage inzanangifu sako. Pesi ndahihyo, ngusila sinyava na ukwihoma ligalu na avanu iwo ndikola ilimage ilihuma mumulomo gwangu. 17“Yeina amapulikilo, sweno, apulikage sila se Umuhe akugalongela amakanisa! “Vala vevidwesa sandivapela yila imanab ifihe. Sandivapela kangi na iliganga ilyelu ilyandike ilitawa ilipya lye sikwali yealikagwe pesi yu yula hela yeakulyanukila. 18“Kwa munyivaha va ku likanisa lya ku Tuwatila wandikage de: “Ulu lwe lukani lwa umwana va Nguluvi, ye amiho gakwe gamalavadike wita moto, na amagulu gakwe gimalavidika wita ichuma cha isaba ikiwuyapise wunofu. 19Ndisikagwe ing'ani sako mbesili. Ndiwukagwe na uwende wako, ulufuuwo lwako, uwupisi wako na ulwikangaliso lwako. Veve wipiga wunofu hilo lino sindawe pamwandi. 20Neke ndina lukani lumwi kwa veve; veve uhele ukumukangalila yula umung'inetu Yesebeli yeakwitigila muvisi va Nguluvi. Umwene akwigisa na ukuvayasa avakami vangu vapige uwugoni nave na ukulya ifitawule nambika ku fihwananguluvi. 21Yendimupelye ikilega ahongese na ukupela inzanangifu sakwe, neke siiwenda ukwileka na uwugoni wakwe. 22Lavage! Lino ngumutosa pawuhaga pala pe umwene pamwinga na mbevali avagonite nave vafikwa na ineseko inalamu. Ena, miga lulo wone valemwe ukuhongesa na ukupela ifipigo fyawo ifyaafu fyevapigite nave. 23Kangi ndivawulaga avanyigendo vakwe, sambi amakanisa mbegali galukagule ukuta nene ye nene yendigosaga inumbula na amahosa ga avanu. 24“Neke nyenye mwevangi yemuli uko ku Tuwatila yesimukwiga inzigiso sakwe Yesebeli; na ye simukiyigisi kila chevakukitigila, ‘Ikinyele cha Setani.’ Nguvalongela ukuta sindivawila ikitegulo ikingi. 25Luvavaje mwinatilage sila semwinaso lino mbaka pesanzusile. 26- 28“Vevidwesa, na vala vevinatila mbaka ku mudugo vipiga sendiwenda, sandivapela ululagi ku vanu va ing'olo isingi, Ena, sandivapela uludali lulula lwendalwanuche kwa Dada; kwekutigila savasitema ing'olo vikola ulugoda lwa ichuma na ukusidenyanga wita ikinu ikigade na lilongo. Kangi sandivapela ing'eng'esi (inema wufuku) 29“Yeina amapulikilo, sweno, apulikage sila se Umuhe akugalongela amakanisa!

will be added

X\