UWUGUBULILWE WA YOHANE . 18

1Pesilutye iso, ndamuwene umunyivaha uyungi akwika ukuhuma kuchanya. Ali na ludali lukomi, na ing'i yang'alikwe na ulumalavadiko lwakwe. 2Swe, ihugite liswi itigila, “Ugwe; Babiloni ingomi yugwe! Lino yeuve wikalo wa amasoka; na finyamukela na amatuuyi amaafu na agifivifya wuhulo. 3Pakuva avanu va ing'i mbesili vagalite idifai ya uwugoni wakwe, nawo avatema va mung'i vagonite nave. Nawo avasulusi va mung'i vanonite vikola uwudobokesi wakwe uwugaya wudugo.” 4Ndawe ndapulikige iliswi ilingi ukuhuma kuchanya litigila, “Avanu vangu, muhege kulumwene, sambi mulemwe ukuhanga nave inzanangifu sakwe, mulahanga hela mukupuma kwakwe. 5Pakuva inzanangifu sakwe siginite wuhulo, sive kilundo mbaka kuchanya, na Nguluvi awiwike uwanangifu wakwe. 6Mumupigilage ndawe lweavapije nyenye; Mwihombelage umukole kavili mwasiso seavapije. Mumemyage ikinywelo chakwe kwa idifai ing'ali kavili ukulutila kila cheavapelye nyenye. 7Mumutesage kwa wuvafi na ikivembo ukutegana na ulwitupyo lwakwe, na ukwikala mulwinomo lwakwe. Pakuva akwilonganza munumbula: “Ndikalite ipa; nene ndi munumwehe. Nene sindimufwile, nambi ukufikwa na isa ikivembo sikilawoneka!” 8Nambi ukwimila lulo ineseko sakwe simufika kimunyi kimwi! uwutamwa, ikivembo, na ikinge. saalalisiwa na umoto, pakuva Umutwa Nguluvi yumwene yemunyakumuhiga ye munyaludali.” 9Avatema va mung'i avagonite nave na ukwikalasa nave imikalile imyaafu savayeyela na ukuvemba pevaliwene ilisusi lya iboma iyo peyipya. 10Viima pataali viva na umuhwehwe gwa ineseko sakwe na ukutigila, “Winalyo! Winalyo veve Babiloni, iboma inambulike na inzenge hilo! Kwa lusika lwa kivalilo kimwi hela yeupumite.” 11Avasulusi va mung'i savavemba na ukupalanga ikivembo, pakuva asupali umunu kangi yeagula ifinu fyawo; 12asupali kangi uva ukugula isahabu sawo, amagobole, amaganga agigusiwaga pakomi nambi ilulu, imyenda imyelu nambi ja ilivala ilinyakilesi, nambi bafuta na imyenda imidung'u, ifinu ifingi ifilipolofu ifiwuyapile imibiki hela, nambi ifiwuyapile amino ga Ndembo, na fya imibiki imitambule hilo, ifya isaba, ifya ichuma na amaganga agimalavadika, 13ifihatwa fya umudalasini, uwufumba, imanemane na uwudi, idifai, amafuta, uwuse na ingano, isenga na ing'olo, ifwalasi na imituka ja ukukwegwa, avanyawingi vawo nambi uwunani wa avanu. 14Avasulusi vakumutigila; “Ukwambula kwetukalavisige yekudusile, uwunono na uwuvina fitukimbye; suhwana ukuva nafyo kangi!” 15Avasulusi avanonite ukukola iboma yiyo, saviima pataali viva na muhwehwe gwa ineseko sayo, savayova na ukuyeyela, 16vitigila, “Winalyo! Winalyo ku iboma iyi ingomi. Yeweusovye ukufwala imyenda ija ibafuta, na ija livala ilinyakilesi na imidung'u na ukwiwuyapisa na isahabu, na amaganga agigusiwaga pakomi na ilulu!. 17Kwa kivalilo kimwi hela uwunono wako wuhesile!” Kangi na avilongosaga ifipugu ifikomi mbevali na vanyalugendo vawo, avipigilaga mubahali, viimite pataali, 18na vavelige vakuliwona lisusi lya umoto gula ugwalalisige iboma, vavembite vikoola vihugite, “Siyeyilawoneka iboma ndawe iboma iyi, ingomi!” 19Swe vakwitikila lingundi mumitwe jawo kono we vivemba na kuyeyela; “Winalyo! Winalyo veve ve boma ingomi! Ye boma ye vala avenafyo va ifipugu ifikomi ifigendaga mubahali vanonite vikola uwunono wa iboma yiyo. Kwa lusika lwa kivalilo kimwi hela mbefili yefiyaje ng'ani!” 20Uhekelelage mulumwene veve ve kuchanya. Nye avanu va Nguluvi, avigendo na avavisi, pakuva Nguluvi ayihigite ukukola mbesili sevavapije nyenye! 21Ndawe umunyivaha uyumwi umunyaludali hilo aakang'we liganga ilihwana na ulwala, swe akulitoosa mubahali itigila, “Ulu lwe i Babiloni yitooswa nu kuyagila ng'ani, 22uwani wa magombo, na uwani wa ifilanzi na amapembe sisafipulisa kangi mwaveve. Sisaawoneka kangi munu muwupisi avahongosi na avaponzi va mbefili yeyeavesaga mwaveve, nambi ulwala ukupulisa lwipigilwa mwaveve. 23Ulung'ali lwa itala sisaluwoneka kangi mwaveve; amaswi ga avanyakwitegula, mwadada na mwayuva sisagapulisa kangi mwaveve. Avasulusi vako ve vavina mung'i mbesili, na ukwimila uwuhavi wako avanu va ing'i mbesili wavayasise!” 24Iboma iyo yapumite pakuva muboma yiyo idanda ya avavisi yabohwike, idanda ya avanu va Nguluvi na idanda ya avanu mbevali avawuligwe mung'i mbeyili.

will be added

X\