UWUGUBULILWE WA YOHANE . 15

1Ndawe ndakiwonige ikilagilo ikingi kuchanya, kikomi na cha kwinatila. Ipo pepovali vanyivaha avimufung'ati ave vina ineseko iso ingomi isimufung'ati isa kuwusililo. Na ukukola ineseko iso ingomi isimufung'ati, ililakali lya Nguluvi liva likwilaniche. 2Ndawe ndakiwonige kinu wita bahali ya kilole, nyanze na umoto. Ndawene kangi vala avanu vevayidwesise yila ing'oko na ulwihwano lwayo na imbalilo ya ilitawa lyakwe, vevimile palubali pa iyo ibahali ya ikilole, wevakolye amagombo agevapelitwe na Nguluvi. 3Vimbige ulwimbo lwa Musa umukami va Nguluvi na ulwimbo lwa Umwanang'olo vitigila: “Uwukomi wa uwuhulo wulimufipigo fyako! Veve ve Nguluvi ve Mutwa munyaludali mbeluli ing'asi sako ngolofu na sanachena! Veve ye ulimutema va mbepali kwa mbevali. 4Ye nani mugaya choga na ukulipela indolo ilitawa lyako veve ve Mutwa? Pakuva veve ye wiyena ve mwelu. Avanu va ing'i mbesili savakusila na ukukusunyalila pakuva ifipigo fyako fya wugolofu fiwonike kwa mbevali.” 5Pesilutye iso ndayiwene i Tembeli ndindule kuchanya, na mugati pepolili ilihema ilyalagilige uwulipwali wa Nguluvi. 6sweno, vala avanyivaha avimufung'ati avanya neseko isimufung'ati vahumite mula mu Tembeli, kono wevafwite imyenda igimalavadika ijesiwe hilo na imisipi imiwuyapile isahabu mumambaga sawo. 7Ndawe, uyumwi va ifigawa fila ifitayi avapelye iwo avanyivaha avimufung'ati ifinyandilo ifiwuyapile isahabu ifimemile ililakali lya Nguluvi, yeinanaga kitasila. 8Itembeli yamemile ilisusi ilyambwise na indolo na uludali lwa Nguluvi, na siekwali umunu yeahwanite ukwingila mu Tembeli mbaka pesadusise sila ineseko ingomi isimufung'ati isa vala avanyivaha avimufung'ati.

will be added

X\