UWUGUBULILWE WA YOHANE . 14

1Ndawe ndakiwonige ikidunda cha ku Sayuni, na umwanang'olo imile muchanya; pamwi nave vepwali avanu mbilima ligana na machumi gatayi na vatayi ve valivandikwe muwusu wawo ilitawa lya Umwanang'olo na ilitawa lya Udade. 2Kangi ndawe ndapulikige iliswi ukuhuma kuchanya ilyapulisige wita ululenga ulwibuma lukwitoosa mumatalawe, wita umubumo umukomi gwa limadadama. Lyapulisige wita lwimbo lwa avakufi avikuva amagombo gawo. 3Iwo avanu mbilima ligana na machumi gatayi na vatayi vimbige ulwimbo ulupya pa kigoda cha uwutwa na pa fila ifigawa ifinyawumi ifitayi na pa vala avavaha. Siekwali umunu yeahwanite ukwiyigisa ukwimba ulwimbo ulo pesi vavala hela avanu avakombole mung'i. 4Avanu vawo, vevala vesivisopiti muwuhongawinya vagendanile na avang'inetu, pakuva veva tunaafu. Avene, vakumuninilaga Umwanang'olo kukwe abitaga. Iwo vevala avagule uluhuma muvanu awolofu, kangi vave ve va ukutala ukutawulwa kwa Nguluvi na kulumwanang'olo. 5Na sivigeli nangi ukuva vadesi; vagaya wananzi uwewuvesaga. 6Ndawe ndamuwonige Umunyivaha uyungi iguluka adonyite kuchanya ina Ulukani Ulunofu lwa mbepali na mbepali lwa Nguluvi sambi alulalike ku vanu mbevali avakwikalaga mung'i ku vanu va ing'i mbesili, ing'olo mbesili, avanu va indongele mbesili na amavala mbegali. 7Alonzile akwihuga, “Muvelage na ichoga kwa Nguluvi na ukumupela indolo! Pakuva ikivalilo yekifikite cha uluhigilo lwakwe. Mumusunyalilage umwene yeagafile ing'i na kuchanya, ibahali na imifwilo ja ululenga.” 8Umunyivaha va kavili amufwatite uyo uva ukutala kono weitigila, “Yeagwe! Ena Babiloni ingomi yeagwe! Babiloni yeavapelye avanu va ing'i mbesili vayinywe idifayi yakwe idifai ing'ali uwuyasi wakwe.” 9Na umunyivaha va wudatu avafwatite iwo avavili ilonga akwihuga, “Yeyeavesaga munu yeakuyisunyalila yila ing'oko na ulwihwana lwayo na ukwidikila ukutemwa uluhagi lwayo muwusu wakwe nambi mwiwoko lyakwe, 10uyo atang'anila ilikali lya Nguluvi iligaya uwudegepele. Umunu uyo sa ateseka mumoto gwa ikibiliti pa Vanyivaha avelu na pa Umwanang'olo. 11Ilisusi lya umoto ugukuvatesa likwililaga kuchanya mbepali na mbepali. Avanu iwo vevayisunyalye ing'oko na ulwihwano lwayo, na ukutemwa uluhagi lwa ilitawa lyayo, sisavava na iikiba yiyeyivesaga pakilo na pamunyi.” 12Ukwimila siso, luvavaje avanu va Nguluvi, avanu avakwinatila ululagi lwa Nguluvi na ukumufuuwa Yesu, vavelage na ulwikangaliso. 13Ndawe ndapulikige iliswi ukuhuma kuchanya litigila, “Wandike ulu! Vinomile avanu ve uluhuma lino vifwa kono wevahanzile na Umutwa.” Nave Umuhe itigila, “Vinomite hilo! Pakuva savasuupa uluhuma mu kuguda mbekuli; na amaveleko ga ifipigo fyawo sagagendasa nawo.” 14Ndawe ndalavige, kumbi pepolili lifufu ilyenzelufu baho. Na pachanga pa lifufu lilyo pepina kigawa wita munu. Alafwite ingela imbuyapile isahabu mumutwe, kono akolye inyengo mwiwoko lyakwe. 15Ndawe umunyivaha uyungi ahumite mu Tembeli weakwihuga akumutigila yula yealakong'ome mwifufu, “Ngukugongola, kolage isenzi yako ukabete isanga, pakuva ulusika lwa isanga yelufikite; isanga ya ing'i yeyitung'wine.” 16Sweno, yula yealakong'ome mwifufu atoosise isenzi yakwe mung'i, na isanga ya ing'i ndawe yabetigwe. 17Ndawe umunyivaha uyungi ahumite mu Tembeli kuchanya weakolye inyengo inzugi. 18Ndawe kangi umunyivaha uyungi umwimilisi va umoto, ahumite pifunyo, akumulongela akwihuga yula umunyivaha yeakolye isenzi iyinyawugi, “Nave kolage iyo isenzi yako inzugi, ukadumule isabibu ukuhuma mumisabibu ja mung'i pakuva isabibu isene yesitung'wine!” 19Sweno, umunyivaha uyo ndawe atoosige isenzi yakwe mung'i, swe idumula isabibu sa mung'i, swe akusisopa mu kisilo ikikomi cha ukuhusila isabibu, ikitegulilo cha ililakali lya Nguluvi. 20Swe isabibu iso sihuswa mugati mwa isavani iyili kwivala kwa iboma, na idanda ukuhuma musavani iyo yanyilime pataali wita nzwambo magana gadatu na uwuhelesa wacho wita nzwambo magana givili.

will be added

X\