UWUGUBULILWE WA YOHANE . 12

1Sweno, ikilagilo ikikomi chawonike kuchanya. Epwali ipo umung'inetu yeemufwike lisuva, na umwesi pasi pa magulu gakwe, na ingela na ing'eng'esi nyichumi na sivili mumutwe gwakwe! 2Umung'inetu uyo ali na filo, ayofile ukwimila uwuvafi wa ukwivikula sambi egale umwana. 3Ikilagilo ikingi chawonike kuchanya: liyoka likomi lidung'u na linya membe nyichumi na imitwe gimufung'ati, na imitwe mbegili jemifwike ingela. 4Liyoka ilyo lyakulumite likola umukila gwalyo ing'eng'esi iyimwi kwa isidatu ya ing'eng'esi isa kwilanga na ukusitoosa pasi mung'i. Nalyo limite pa uyo Umung'inetu yeali pipi ukwegala umwana, ligelanise hilo ukumumila umwana, pembe hela egalwe. 5Ndawe umung'inetu uyo egalige umwana mukwamisi, yula yeatema avanu va ing'i mbesili ikola ulugoda lwa ichuma. Neke umwana uyo swe inyelebulwa na ukusindikwa kwa Nguluvi na ku kigoda chakwe cha uwutwa. 6Swe uyo mwayuva akimbilye ku balali, kula kwe Nguluvi alamugelanikise apono apawunamu pala pealalolelwa ikale kwa ulusika lwa filo mbilima yimwi na magana gavili na machumi gimutanda (1260). 7Ndawe kwalamukige ligalu kuchanya: Mikaeli na avanyivaha vakwe vihomile na lilyo liyoka, nalyo lyavananzile pamwinga na vanyivaha vakwe. 8Neke ulwene liyoka ilyo silyahwaniti ukuvalema, na pambele kangi sipavi na ikilega chalyo kuchanya ukwimila ilyene nambi vanyivaha valyo. 9Sweno, liyoka lilyo ilikomi lyatosiwe kwivala. Liyoka ilyo ye yula liyoka lya pidaha yuyo yeitambulwagwa kangi, Ibilisi apangi Setani. Ye akuyisanga ing'i mbeyili. Nachene, atoosiwe mung'i, na ililugu lyakwe mbelili pamwinga nave. 10Ndawe ndapulikige liswi likomi kuchanya litigila, “Lino uwukombolwa uwihuma kwa Nguluvi yewufikite! Uludali na Uwutwa wa Nguluvi vetu yewuwonike pawelu. Nayi Kilisito aluvisile pawelu ululagi lwakwe! Pakuva yula umusongela va avanyalukolo vetu, yeakwimaga pa Nguluvi akuvasongela pakilo na pakimunyi, lino atoosiwe kwivala. 11Vanyalukolo vetu yevadwesise kwa idanda ya umwanang'olo na kwa uludali lwa uwanachene wevawulaalikige, pakuva sivawutugiti na uwunani wawo ukuta kinu hilo, swe viva vidiche nambi ukufwa. 12Palulo, muhekelelage nyenye mwe kuchanya na mbefili ifikwikala kuko. Neke, mwinalyo nyenye mwe ing'i na ibahali, pakuva Ibilisi avasye we ina lilakali na uwuvifu wukomi, pakuva akulukagula ukuta ifilo fyakwe ifisige ye fikefu.” 13Liyoka lyave likulukagula ukuta litoosiwe pasi mung'i, swe livanga ukumufwima yula mwayuva yee eje umwana umukwamisi. 14Neke mwayuva uyo apelitwe amapiko gavili ga imbungu sambi ahwane ukuguluka abite pataali hilo na ilyo liyoka, mbaka apono pakwe ku balali kwe ake alolelwa wunofu ulusika ulutaali. 15Sweno, liyoka lyafunyite ululenga lolofu wita mukoga, swe ululenga ulo lwamuninilite uyo mwayuva mumbele sambi lumutegulise. 16Neke ing'i yamutanzile uyo mwayuva yadindwike wita wuvi na ukwingisa ululenga ulo ulwahumige mumulomo gwa liyoka lilyo. 17Swe, liyoka ilyo lyamuvipye uyo mwayuva, swe likwibitilaga, lyahele ukwihoma na imbegalo iyingi ya uyo mwayuva, kwekutigila vala mbevali avanyachoga ku ndagilo isa Nguluvi na ukwinatila uwanachene wa Yesu. 18Na liyoka ilyo lyahele lisakwima pamugekela gwa ibahali.

will be added

X\