UWUGUBULILWE WA YOHANE . 11

1Ndawe ndapeligwe uludete lwelwe wita lugoda lwa kigelelo, swe ndilongelwa, “Winuke ubite ukayigele i tembeli ya Nguluvi, pifunyo, na ukavavalile avanu vevisunyalila mugati mumo. 2Neke yilekage ibwalo iyilikwivala ya i Tembeli, ulayigela, pakuva iyo nawule kwa avanu va ing'i isingi, vala avayilivata iboma inzelu lusika lwa myesi machumi gatayi na givili. 3Nane ndivapela uludali awolelesi vangu vavili sambi vavile lusika lwa ifilo mbilima yimwi na magana gavili na machumi gimutanda kono we vafwite imyenda imitifuse.” 4Iwo awolelesi avavili je imibiki igivili ja imiseituni na itala isivili isikwimaga pa Mutwa va ing'i. 5Wone umunu igelele ukuvatesa, umoto ugwihumaga mumilomo jawo guvawulaga avatavangu vawo, na yeyeavesaga munu yeigelela ukuvatesa afwila lulo. 6Iwo vina lulagi ukuleka vatanile indonya ukuta yilatonya ulusika pevilalika ulukani lwa Nguluvi. Kangi vina ululagi lwa ukudulika imifwilo mbegili ja ululenga give danda, na ululagi lwa ukwambusa ineseko na ifwa yeyeyivesaga mung'i pevavesaga vawendite. 7Neke pevave vasinzile ukudalika ulo ulukani ing'oko iyihuma mwikombo ilihelesa yihoma nawo ligalu, yivalema na ukuvawulaga. 8Imifimba jawo gisigala mumakasi ga iboma ingomi pa kwigilisa iboma iyo ku Sodoma na Misili kwa Umutwa vave atumbikwe. 9Avanu va ing'olo mbesili indongele, ing'i na ilivala savagilava imifimba ijo kwa ulusika lwa filo fidatu na ikilipinga, na sisavatawula gitagwe. 10Avanu avakwikalaga mung'i savahekelela ifwa ya avanu iwo avavili. Savawuyapa uluhekelelo na ukwisindikila ifipelwa pakuva avavisi iva avavili vakavelige vakuvafwahisa pakomi avanu va mung'i. 11Neke pefilutye ifyo ifilo ifidatu na ikilipinga umuhe gwa uwumi ukuhuma kwa Nguluvi gwavinje, nawo ndawe vimige, mbevali avavawene vibatike na umuhwehwe mukomi. 12Ndawe iwo avavisi vapulike iliswi likwihuga ukuhuma kuchanya likuvatigila, “Musage ipa pachanya!” Nawo swe vakwilila pachanya kuchanya mwifufu, avatavangu vawo viva we vakuvalava. 13Pa ikivalilo kicho kwave na ikitulo kikomi cha ing'i, ulubali ulumwi lwa iyimwi kwa nyichumi ya ing'i yanangike. Avanu mbilima simufung'ati vaafwe ukwimila ikitulo kicho cha ing'i. Avanu avasige wogwipe pakomi, swe vakumulumba Nguluvi va kuchanya. 14Ineseko isa kavili yesilutye, neke lavage! Ineseko isa wudatu sikusa sikwangufya. 15Ndawe umunyivaha uva mufung'ati akuvige ilipembe lyakwe. Na amaswi makomi gapulise kuchanya gitigila, “Lino uwutema wa mung'i ye wuve wa Umutwa vetu na Kilisito vakwe. Nave atema kitasila.” 16Ndawe vala avavaha machumi gavili na vatayi na avakong'ome pa Nguluvi mufigoda fyawo fya uwutwa, vagwe kinyalileme, swe vakumusunyalila Nguluvi, 17Vitigila: “Mutwa Nguluvi munyaludali, yewikwali na yewewikwali! Tukukulumba, pakuva ukwete uludali lwako ulukomi swe vivanga ukutema! 18Avanu avamyanza vibatiike na ililakali, pakuva ulusika lwa uwuvifu wako lufikite, ulusika lwa ukuvahiga avafwe. Lwe lusika lwa ukuvaposa avakami vako avavisi, avanu vako na mbevali avakulipela indolo litawa lyako, avavina na avadodo. Lwe lusika lwa ukuvawulagila ng'ani vala vevakuyiwulagila ng'ani ing'i.” 19Itembeli ya Nguluvi kuchanya swe yidindulwa, na Ilisandiko lya Lufingano lwakwe lyawonike mu Tembeli yakwe. Ndawe kwawonekige limemi, liswi, limadadama, ikitulo cha ing'i na indonya ngomi yinyamaganga.

will be added

X\