UWUGUBULILWE WA YOHANE . 1

1Uwugubulwe Yesu Kilisito we Nguluvi amupeelye sambi avalagile avakami vakwe ing'ani isivaje ukuwoneka ulusika ululipipi, alekite lukagulanike pe amutumite umunyivaha vakwe amulongele Yohane, umukami vakwe, 2nave olelye mbesili seasiwene. Na uwu we wolelesi wakwe uwa ulukani lwa Nguluvi na uwolelesi wa Yesu Kilisito na kwa sila mbesili se asiwene. 3Mufunyilile umunu yula yeakwimba kwa liswi ing'ani isa uwuvisi, vafunyilile vala avanu vevipulikisa na ukwinatila inzandike umu, pakuva ulusika ulu yeluhegelye. 4Ye nene Yohane ngugandikila amakanisa agali ku lutanana lwa mu Asiya. Nguvasukila uwuwuya na uwikalakunoga ukuhuma kulumwene yeikwali, yeekwali na yula yeakusa; na ukuhuma ku myuhe avimufung'ati avali pa kigoda chakwe cha uwutwa, 5na ukuhuma kwa Yesu Kilisito, umolelesi umuhuvilwa, uva ukutala ukusilibulwa uluhuma kuvafwe, na umwene ye mutema va avatwa va mung'i. Umwene atwenda, na kwa idanda yakwe atudindulye uluhuma mundinde isa inzanangifu setu, 6swe akutuwuyapa hwehwe tuve wutwa, wutambisi kw Nguluvi, Udade, Kulumwene sivelage ndolo na uludali, mbepali na mbepali! Ena. 7Lavage! Akusila mumafufu! Yeyeavesaga munu saamuwona, mbevali vevamuhomite, Ing'olo mbesili isa avanu mung'i savamuvembela. Ena! Nachene. 8“Nene ye ndiva ukutala na ukudugilisa.” Ilonga Umutwa Nguluvi yekwali, yeeikwali na yeakusa ye umunyaludali mbeluli. 9Nene Yohane, ndimunyalukolo venyu, ye ndihanga pamwinga nanyenye yemukwikangasa muwutwa wakwe. Nene nde pa kigunguli ikitambulwa Patimo ndivalwa ukudalika ulukani lwa Nguluvi na uwanachene wa Yesu. 10Wendisogoswa na Umuhe pa ikimunyi cha Umutwa, ndapulike umubumo mukomi kumbele kwa nene wita mubumo gwa ilipembe. 11Nago gwatige, “Wandikage mukitabu mbesili seukusiwona, ukasindike ku makanisa iga agimufung'ati: Efeso, Similina, Peligamo, Tuwatila, Salide, Filadelifiya na Lawodikeya.” 12Ino, ndawe ndapitukige ndimulave uyo yealongige nanene, ndafiwene ifimikiso ifya itala ifimufung'ati ifiwuyapile isahabu, 13na pagatinagati baho pepina kinu wita munu, nave alafwite isopeka naali na umusipi umuwuyapile isahabu mumambaga. 14Umutwe na ifwili sakwe samalavadikige wita uwuhamba uwunofu, wita ikitungwi kinyawumela; amiho gakwe gamalavadikige wita moto, 15amagulu gakwe gamalavadikige wita ichuma cha isaba imbuyape wunofu na ukusopwa mumoto na ukutelemesewa hilo, na iliswi lyakwe lye wita umubumo gwa ululenga ulukwitoosa. 16Mwiwoko lyakwe ilya kundyo, eakolye ing'eng'esi isimufung'ati, na mumulomo gwakwe mwahumige ilimage ilinyawugi mbekuli mbekuli. Uwusu wakwe wamalavadikige wita ilisuva lyelivala. 17Ino, ndavelige ngumuwona hela ndagwe pamagulu gakwe siliike wita munu ye afwe. Neke umwene angelike iliwoko lyakwe lya kundyo swe itigila, “Ulava na muhwehwe! Nene ye uva ukutala na ukudugilisa. 18Nene ye nene ye ndi mumi! Nde ndafwe, neke, lavage, lino ndimumi kitasila mbepali. Kangi ndinacho ikidindulilo cha Ifwa na cha Kuvafwe. 19Sweno, lino wandike isi seukusiwona, ing'ani isiwoneka lino na sila isasiwoneka pambele. 20Ikinyele cha ing'eng'esi sila isimufung'ati seusiwene mwiwoko lyangu lya kundyo, na ikinyele cha ifimikiso ifimufung'ati ifya isahabu ifya itala che iki: Sila ing'eng'esi isimufung'ati ve vanyivaha va amakanisa agimufung'ati, na fila ifimikiso ifimufung'ati ifya isahabu ifya itala ge amakanisa agimufung'ati.

will be added

X\