1 Lino peyilutye isabato, pe sambi kwidandaluka pa Jumapili, Maliya Magadalena nayi Maliya uyungi vahele kukulava ichanga. 2 Swe lulusika lulo pave na kitulo kikomi mung'i; ndawe aasige umunyivaha va Umutwa ukuhuma kuchanya nu kubidusa iliganga, neke ateng'emalile. 3 Na uwusu wakwe wewindawe ulumuli na imyenda jakwe je myelu wita wusee. 4 Avanya kumuminga wogwipe hilo vikuvila viva nda vafwe. 5 Neke umunyivaha avalongele avang'inetu, “Mulogopa! pakuva ngulukagula ukutigila mukumusaka Yesu yevamutumbike. 6 Siipwali ipa nda, pakuva asilibwike ndawe alongige. Muse mulave apono peemulambalike. 7 Ino mwangupe mubite mukavalongele avanyigendo vakwe ulwa asilibwike uluhuma kuvafwe wonage akuvalongolela ukubita ku Galilaya; kwekwene kwemumuwona. Yendivalonje.” 8 Swe vakwangufya pakuhega wevinawogofi uwunyaluhekelelo lukomi. 9 Ndawe Yesu vitang'anige nawo neke atigile, “Kamwene.” Swe vihegelela nu kumwibata amagulu neke vamufugamile. 10 Ndawe Yesu avatigilige, “Mulogopa! Mubitage mukavalongele avanyalukolo vangu vabite ku Galilaya kwevambona nene.” 11 Na pevabitige, lavage, avanyakuminga avamwi vahele muboma neke vakavalongele avatambisi avavina mbesili sevasiwene. 12 Avatambisi avavina ndawe vakong'anige na avavaha, neke vagahe ikigaho ndawe vavafupige avanyigalu magobole molofu. 13 Neke vavatigilage, ‘Muvalongelage avanu ukuta avanyigendo vakwe vaasile pakilo neke vamuhiise petugonelye.’ 14 Ulukani ulu wone lupulise kulumutema hwehwe tulongana nave mulahuguvala.” 15 Ndawe avanyigalu vategulige amagobole nu kupiga lwevevalagile. Neke ululongwa ulu lwatagalye ku Vayudaya mbaka neng'ino. 16 Ino avanyigendo vanyichumi na yumwi vahele ku Galilaya, kukidunda chealavalagilye Yesu. 17 Na vave vakumuwona ndawe napevamuwene ndawe vamusunyalilige, neke avangi vasinite. 18 Neke Yesu aase neke avatigile, “Uludali mbeluli ulwa kuchanya na mung'i ngapelitwe nene. 19 Ino mubitage mukavapitule avanu mbevali ava konivala vave vanyigendo vangu, mukavabatise mwitawa lya Dada, Umwana na Umuhe umwelu. 20 Na ukuvigisa vinatilage mbesili sendavalaje nene. Neke nene mba na nyenye mbepali mbaka kuwusililo uwa ing'i.”
Copyright © 1999 The Bible Society of Tanzania; ℗ 2010 Hosanna