MATAYO 27

1Kwave kwicha avatambisi avavina mbevali na vavaha va avanu valongine ifigaho ifya ukumuwulaga Yesu. 2Neke vamupinge nu kumusogosa vakumutawula kwa Pilato Umutema. 3Ino Yuda yeamupitwike, pe awene ulwa Yesu yeahigitwe ukufwa lwamuvafile swe ibita ukuvapilulila avatambisi avavina na avavaha amagobole machumi gadatu. 4Neke atigile, “Nzananzile ukuyipituka Idanda yesinzananga kinu” neke vatigile, “Mbi lukutuvava kiki hwehwe? Ulo ulukagula yuveve.” 5Swe itoosa amagobole gala mutembeli swe ibitaga kukwitumbika. 6Neke avatambisi avavina vategule amagobole itigila, “Silulagile ukuhanza na agangi pakuva magule na danda.” 7Swe vikong'ana nukulongana, neke vagule ililungulu ilinyakinongo ilya ukutagila avagenzi. 8Na ililungulu lila litambulwa mbaka neng'ino lilungulu lya idanda. 9Neke pelukwile ulukani ulwalonzilwe na u muvisi Yelemiya itigila, “Vategwe amagobole machumi gadatu, ilifungu lya yula yeemukelele na avana va Vaisilaeli, 10neke pevagulile amagobole gala ililungulu ilya amatago, ndawe Umutwa lwealandaje.” 11Swe Yesu vakumwimya kulumutema, neke umutema amuwuse umwene, “Veve ye veve vemutwa va Avayudaya!” Yesu amupitwe, “Veve ulonzile.” 12Neke peemutose na avatambisi avavina na avavaha, siapituligi lukani. 13Neke Pilato amutigile, “Siwipulika isi mbesili se vakukolelela veve?” 14Siamupitwi nambi lukani, neke Umutema asasave pakomi. 15Ino ikimunyi ikikomi icha i Pasaka umutema eina musimu gwakwe gwa kuvadindulila umunu uyumwi va avanyandinde yula yevamuwendige. 16Ino pepina munyandinde yeakagulanikige hilo atambuligwe Balaba. 17Neke Pilato atigile, “Mwisaka ndivadindulile yalikwi? Balaba apangi Yesu yeitambulwa Kilisito?” 18Pakuva ealukagwe ulwa vamuletite kwa gila. 19Na peeateng'eme pakigoda icha ukuhigila uvakwe amutumye lukani ukutigila, “Ulapiga kinu kulumunu uyu umugolofu, pakuva neng'ino nesike pakomi mumaloto ukwimila Umunu uyo.” 20Ino avatambisi avavina na avavaha vavakuvilise avanu vamusuke Balaba sambi Yesu awulagwe. 21Umutema kangi swe akuvatigila, “Ye nani kuvavili iva yemwisaka nene ndimudindulile?” Neke pe vatigile, “Balaba.” 22Neke Pilato peavatigile, “Ino ngitage ndawuli kwa Yesu yeitambulwa Kilisito.” Neke mbevali vatigile, “Atumbikwage.” 23Neke peatigile, “Mbi kiki ikibi cheapigite?” Neke pevayovele ng'ani mbevali, “Atumbikwage.” 24Ino Pilato aveiwona siinosa kinu, ligina liliyowo, swe akwegula ululenga swe ikalava amawoko gakwe pamalugu itigila, “Nene sindimwananga kinu ku danda ya umunu uyu umugolofu mulukagula yinyenye.” 25Neke avanu mbevali vatigile, “Idanda yakwe lekage yive kwa hwehwe na kuvanetu!” 26Neke peamudindulile Balaba na peyeamutofile Yesu ni mikova amutawe sambi vamutumbike mu musalaba. 27Neke avanyigalu va Pilato vamusindike Yesu mubwalo iya uwutema, neke ikilugu mbekili kimukong'anikile. 28Neke ipo vamuwopwe imyenda jakwe nu kumufwika isopeka idung'u, 29neke vative ikihalama ikinyamifwa nu kumufwika mumutwe neke vamupele uludete mwiwoko ilya kundyo. Neke vamufugamile vakumwelanga vitigila, “Kamwene ve Mutwa va Avayudaya!” 30Neke pevamufunyile amati swe vitegula uludete lula neke vamukong'olelage kumutwe. 31Na peyevamwelanzile na ukumuwopola isopeka yila swe vakumufwika imyenda jakwe nu kumusindika kukumutumbika. 32Napevahumige vatang'ine na Umunu uva ku Kilene, ilitawa lyakwe ye Simoni neke vamung'ang'anise ategule umusalaba gwa Yesu. 33Neke na pevafisile apono apitambulwa Goligota kwekutigila, “(apono pa ikibang'a).” 34Vamupelye idifayi yeyenyanze na ikinyongo sambi anywe, neke peagesise abihye ukunywa. 35Vave vakumutumbika Yesu vagavine imyenda jakwe kwa ukutova isimbi; (sambi lukwile ulukani ululonge na umuvisi, vagavine imyenda jangu na isopeka yangu vakugitovela isimbi.) 36Neke pevateng'emale nu kumuminga. 37Neke pachanya pa musalaba gwakwe vatovelye uwandike, “UYU YE YESU UMUTWA VA AVAYUDAYA.” 38Ino pepina avahiisi vavili avevatumbikwe pamwi na Yesu uyumwi kwiwoko ilya kundyo uyungi kwiwoko ilya kung'igi. 39Neke vala vevalutilige mung'asi vayunzige imitwe jawo vakumuliga vitigila, 40“Be, vemunyakudenya Itembeli nu kusenga mu filo fidatu, wipoke uwumi wako, na wone wi mwana va Nguluvi, wiike uluhuma mu musalaba.” 41Neke avatambisi avavina, pamwi na avigisi va indagilo na avavaha, vamwelanzile vitigila, “Aponise avangi ilemwa ukwiponia yumwene. 42Ye mutwa va Avaisilaeli, leke iike uluhuma mu musalaba neke petumufuuwe. 43Alaamwihuvye Nguluvi, kono weakwitigila umwene Mwana va Nguluvi; ino leke tandi, Nguluvi amuponiage, wone inogelwa nave.” 44Neke na avahiisi avevatumbike pamwi na Yesu nawo vamulisile ndahihyo. 45Ino uluhuma paikivalilo icha mutanda pamunyi ing'i mbeyili lwavelwisa mbaka paikivalilo icha igonza pelitegamwike. 46Neke paikivalilo icha igonza pelitegamwike Yesu akoolite kwa liswi likomi itigila, “Eli, Eli lamasabakitani.” Kwekutigila, “Nguluvi vangu, Nguluvi vangu, mbi ndawuli undesile?” 47Neke avali mulubali vimile pevapulike vatigee, “Umunu uyu ikemela Eliya.” 48Neke uyumwi akimbile akategule ilisambi ilisabike mudifayi inzasamufu neke avike muludete neke peamupelanise Yesu anywe. 49Neke avangi vatigile, “Musindile, leke tulave apangi Eliya aasa amuponia.” 50Yesu kangi peakoolite kwa liswi likomi ndawe umutima gwadumukige. 51Ino ulusika lulo, ikibupa cha ilyenda ilya mutembeli ilya demwike neke lihume pavili uluhuma kuchanya mbaka pasi. Ing'i swe yiva na kitulo, amaganga gamegwike; 52Nafifyanga fyadindwike, na gimivili ija avagolofu avevafwe jasilibwike. 53Na pevahumile mufyanga Yesu peyeasilibwike vahele kuboma inzelu neke vitang'ane na awolofu. 54Ino umuvina va avanyigalu na vala avevalipamwi vevamumingige Yesu, pevawene ikitulo na ing'ani sinyawuhulo vakuvye wuhulo vitigila, “Uyu nachene ake Mwana va Nguluvi.” 55Pala pepina avang'inetu wolofu, avalavisige kwa pataali, iwo ve vala avamufwatige Yesu uluhuma ku Galilaya na avamupigilige. 56Uyumwi va iwo e Maliya Magadalena, na Maliya uyuve va Yakobo na Yosefu, pamwinga na uyuva va avana va Sebedayo. 57Pakive kimihye aasile umunu umunono ukuhuma ku Alimataya, ikemelwa Yosefu nave ali munyigendo va Yesu. 58Ahele kwa Pilato akasuke umufimba gwa Yesu. Pilato alaje Yosefu apelwe umufimba gula. 59Swe Yosefu itegula umufimba neke agufwike isanda ya umwenda umunofu. 60Neke peatage muwuvi wakwe weeayafile mwitalawe, swe ibidukisa iliganga ilikomi pamulyango gwa uwuvi neke abitage. 61Maliya Magadalena na Maliya uyungi ve baho vateng'eme palubali pachanga. 62Ikimunyi icha kavili tutigile ikimunyi icha ukutala kukimunyi icha ukugelanisa, avatambisi avavina pamwinga na Avafalisayo vahele kwa Pilato, 63vitigila, “Muvaha tukwiwuka umudesi yula peemumi atigilige ngali: ‘Pefilutye ifilo fidatu asilibuka.’ 64Ino lagilage, sambi chakwe kimingwe mbaka pa ikimunyi icha wudatu, sambi apono pangi, avanyigendo vakwe valemwe ukubita vamuhiise vasindike sambi vavalongele avanu ulwa asilibwike kuvafwe. Uwudesi uwu wulonga wulutile kwa wula uwamutalo.” 65Pilato avatige, “Mwinawo avanyigalu mubite mukaminge ichanga wunofu. 66Swe ndawe vabitige kukuminga ichanga kila wunofu, swe vivika na ing'olekelo mwiganga lila pamwi na avanyigalu.”

will be added

X\