MATAYO 22

1Neke kangi Yesu avalongele avanu ifiganiso itigila. 2“Uwutwa uwakuchanya wihwana na umutwa, yeeina uluwungo ulwa umuswamuve. 3Neke pe atume avakami vakwe kukulaalika avanu kuluwungo; neke valemwe ukusa. 4Kangi swe akuvatuma avakami avangi, itigila, ‘muvalongele vala avalaalike, ulwa ye nelike ifyakulya, ing'ambakwa na sisenga sangu indutu yendumwe na ifinono mbefili ye mbuyipe, musage kuluwungo!’ 5Neke valemwe ukusa, swe vakwibitilaga, yungi ku mugunda gwakwe, uyungi mufipigo fyakwe, 6neke avangi vavibete na ukuvatova avakami vakwe, neke vavelange, nu kuvawulaga. 7Umutwa avifile pakomi neke avatume avanyigalu sambi vakavawulage avawulasi na ukunyanya iboma sawo. 8Neke peatigile ku vakami vakwe, ‘Uluwungo yelufisile neke vala avali valaalike vave sivahwaniti. 9Mubitage ino mbekuli mumakasi mukavalaalike kuluwungo mbevali ve muvawona.’ 10Neke avakami vala vabite mumakasi swe vikong'asa avanu mbevali vevavawene avabi na avanofu, sweno ibwalo ya uluwungo yimema avagenzi. 11Neke umutwa peasile ukulava avagenzi, neke amuwene umunu yeemugaya umwenda ugwa uluwungo; 12Neke pe amutigile: ‘Be mbi wusile ndawuli ipa we wimugaya mwenda ugwa uluwungo?’ Umunu yula sapitwi kinu. 13Neke umutwa avatigile avakami: ‘Mumupinge amagulu na amawoko neke mumutoose kwivala ukulwisa; kula kwe avanu savavemba na ukugelesula amino.’ ” 14Pakuva, “Avakemele wolofu neke avahagule vakefu.” 15Neke Avafalisayo ndawe vabitige kukukong'ana sambi vagahe wevagita ukumugwilisa Yesu mumilongele jakwe. 16Ndawe vavatumige avanyigendo vawo pamwi na Avahelode vakamuwuse, “Mwigisi tukulukagula ulwa veve ye veve wemulonga hilo yewakwigisa mumwene ing'ani isa Nguluvi, kangi siwakogopa munu nambi uwuvina wakwe. 17Tulongele, lwewihosa, manyi luva lulagile ukuhomba imbemenenge kwa Kaisali ngali apangi nda?” 18Yesu we akufikagula ifigaho fyawo ifyanangifu, neke peatigile, “Nye! Mwevabuganisi mbi ndawuli mukungela? 19Mundagile iligobole ilya kuhombela imbemenenge neke vamuletele iligobole.” 20Neke Yesu avawuse, “Uwusu uwu wa nani na litawa lya nani?” 21Neke vamutigile, “Fya Kaisali.” Neke pe avatigile, “Mumutawulilage Kaisali ifyakwe, na Nguluvi mumutawulilage ifyakwe umwene Nguluvi.” 22Pe vapulike ulu, vasasave; ndawe vamulekige swe vakwibitilaga. 23Ikimunyi kikila avamwi va avasadukayo vaasile kwa Yesu. Iwo vevawo vevavitigila avafwe sivavisilibuka. 24Swe vakumutigila, “Mwigisi, Musa atige wone umunu afwe mugaya vana umunyalukolo vakwe amutegulage umufwile vakwe sambi amwegalile avana. 25Ino ukwetu vepovali vanyalukolo vimufung'ati pamwi, umunyakutala ategwe neke afwe wemugaya vana neke amulekele umufwile umunyalukolo vakwe. 26Swe lwiva ndahihyo kuvakavili na kuvawudatu mbaka uvamufung'ati. 27Pevasisile mbevali na yung'inetu yula aafwe. 28Ino paikimunyi icha ukusilibuka ava mukina nani mwa vala avimufung'ati? Pakuva mbevali ve vamutegwe.” 29Neke Yesu avapitule, “Mwivayasi, pakuva simuwuseli uwandike uwelu nambi uludali lwa Nguluvi! 30Pakuva avafwe pevasilibwike, savava ndawe vanyivaha va kuchanya, uko kugaya kutegula nambi kugomwa. 31Ino ulwa ulusilibuko uluhuma kuvafwe, mbi si mwemulimba ulwali lulonge kwa nyenye na Nguluvi? 32‘Nene ye nene Nguluvi va Abulahamu, na Nguluvi va Isaki, Nguluvi va Yakobo!’ Umwene si Nguluvi va avafwe nda, umwene ye Nguluvi va awumi.” 33Neke vamalugu pevapulike ulu, vasasave kwa lula lweigisige. 34Neke Avafalisayo pevapulike ulwa Yesu akatwise Avasadukayo, swe ndawe vakong'anige pamwi mbevali. 35Uyumwi vawo e mwigisi va indagilo, amuwusise Yesu akumugela. 36“Mwigisi, ululagilo ululutye lulikwi?” 37Neke Yesu peamutigile, “ ‘Umwendage umutwa Nguluvi vako na inumbula yako mbeyili na gumutima gwako mbeguli na luluhala lwako mbeluli.’ 38Ulu lwe lulagilo ululutye kangi lwelwa ukutala. 39Neke ulwa kavili lwihwana na lulo: ‘Umwendage umuyago ndawe lwe wakwiyenda yiveve!’ 40Mwa indagilo isi isivili mwe sikwimila indagilo isa Musa na inzigiso isa avavisi.” 41Na pevakong'ine Avafalisayo, Yesu avawusise 42ukutigila, “Nyenye mukumuhosaga ndawuli Mesiya? Mwamwitigila mwana va nani?” Vamutige, “Mwana va Daudi.” 43Yesu avatigile, “Mbi ino lwave ndawuli Daudi kwa uludali lwa umuhe amukemele Mutwa? Itigila, 44‘Umutwa atige kulu Mutwa vangu, teng'emale kuliwoko lyangu ilya kundyo, mbaka pendivavikite avatavangu vako pamagulu gako.’ 45Wone Daudi akumukemela Mutwa, mbino ava mwanakwe ndawuli?” 46Neke ave asukuli umunya kumupitula lukani, ukuhuma ikimunyi kikilaga ave asukuli umunu yeigelye ukumuwusa kangi lukani.

will be added

X\