MATAYO 21

1Na peyevahegelye ku Yelusalemu vafisile ku Betifage, kukidunda icha imiseituni, neke Yesu avatume avanyigendo vavili. 2Akuvatigila, “Mubitage mbaka kukijiji che mulaving'ine muyiwona idogovi minge pamwi na kichana, muwopolelage neke mundetele nene. 3Wone ave pwali yealonga kinu mumutigilage: ‘Umutwa agulwime iyi,’sahaava avatawulila.” 4Ulu lwave dee, sambi lukwise ulwali lulonge na umuvisi ukutigila, 5“Muyilongelage iboma iya ku Sayuni; lavage Umutwa vako akusa kwa veve mulele, ahofile idogovi, na ichana cha idogovi.” 6Avanyigendo vahele neke vapige ndawe lwe vevatumitwe. 7Valetite idogovi na kichana, neke vageleke imyenda jawo mudogovi, neke Yesu ateng'emale muchanya mudogovi. 8Awolofu va amalugu vatandike imyenda jawo mung'asi, avangi vadumwe amatagala ga imibiki neke vatandike mung'asi. 9Neke vamalugu avevalongwe na avamuninilige vayovige: “Hosana Mwana va Daudi! Mufunyilile yeakusa mwitawa ilya Umutwa! Hosana Nguluvi yealikuchanya!” 10Na peye inje mu Yelusalemu, iboma mbeyili yasasave yitigila, “yenani uyu?” 11Neke amalugu gatigile, “Uyu ye Muvisi Yesu ukuhuma ku Nasaleti iya ku Galilaya.” 12Neke Yesu ingile mu Tembeli, neke avadage vala mbevali avagusige na ukugula mu Tembeli ndawe adulikige imesa isa avakowoka amagobole na ifigoda fya avasulusi va ingunda. 13Yesu avatige, “Ulu lwandike: ‘Ikaye yangu sayikemelwa kaye ya kwifunyila.’ Neke nyenye mupitwe yive wifiho wa avahiisi.” 14Na avabofu na avanyakiteve vaasile kwa Yesu mu tembeli, neke avaponie. 15Neke avatambisi avavina na avigisi va indagilo pevawene imiitu gila jeapigite Yesu, na vavana viyoya mu tembeli, “Hosana Mwana va Daudi.” Vavifile. 16Neke vamutigile Yesu, “Wipulika iva sevilonga?” Neke Yesu avatigile, “Ena; ndipulika mbi simwemulimba uwandike uwelu? ulwa ‘Ukuhuma mumilomo ija ifyali, na avakong'a, ukwisise ululumbo.’ ” 17Swe akuvaleka; ibita kuboma iya ku Betaniya ivasa kuko. 18Pamilawu peipiluka kuboma eina nzala. 19Peaguwene umusombe palubali lwa ing'asi, ahegelye ulwa wanda akiwona kinu, neke sakiweni kinu pesi gamahombo, ndawe agutigilige, “Sagalawoneka maveleko kwa veve uluhuma namunyi mbaka mbepali!” Swe umusombe gwikala lulusika lulo. 20Avanyigendo pevaluwene ulu vasasave, vitigila, “Mbi luve ndawuli umusombe gukasile lulusika lulu?” 21Neke Yesu avapitule, “Nachene nguvalongela, wone muve mwina lufuuwo, ulugaya muhwehwe, simupiga lulu hela nda ulupigike ku musombe, na mutigile ikidunda iki: ‘Hegage ukitoose mubahali,’ luva ndahihyo. 22Na ikinu chechekivesaga, chemumusuka Nguluvi samwanukila wone we mwina lufuuwo.” 23Na peinje mutembeli, avatambisi avavina na avavaha va avanu vaasile kulumwene na peakwigisa neke vatigile, “Uluwene kwi uludali ulwa ukupigila isi? yenani ye akupelye uludali ulu?” 24Yesu avapitwe, “Nayi nene leke ndivawuse nyenye lukani: wone we mundongela apo nayinene ndivalongela kwengaluwene uludali ulwa ukupigila isi mbesili. 25Uwubatiso wa Yohane wahumite kwi? Wahumite kuchanya? Ngali apangi wahumite kuvanu?” Ndawe vavangige ukwilonganza vavene vitigila: “Wone tutigile,‘Wahumile kuchanya’, atutigila: Apo, ndawuli simwamufuuvitwi? 26Neke wone tutigile, ‘Wahumile kuvanu’, tukogopa amalugu, pakuva mbevali vakulukagula ulwa Yohane e muvisi.” 27Sweno vakumupitula Yesu, “situlukagula.” Neke avatigile, “Nayi nene sindivalongela kwendaluwene uludali ulwa ukupigila isi mbesili.” 28“Ino mwitigila ndawuli? Umunu eina vana vavili; neke pe abite kwa umuvina neke atigile, ‘Mwanangu neng'ino bite ukapige ifipigo mumugunda gwa imisabibu.’ 29Neke amupitule, ‘Si mbita nda!’ Neke pambele ahongise neke abite. 30Neke peamubitile umudodo na ukumulongela sisilaga; neke amupitule, ‘Ena mbita Muvaha!’ Neke alemwe ukubita. 31Ye alikwi yeapigite sila seasakige udade?” Swe vitigila, “Umuvina.” Yesu avatige, “Nachene nene nguvalongela nyenye avakong'asa imbemenenge na avagoni savavatalila ukwingila ku wutwa wa Nguluvi.” 32Pakuva Yohane aasile avalagile ing'asi ya uwugolofu, neke mulemwe ukumufuuwa neke avakong'sa imbemenenge na avagoni vamufuuvitwe; neke nyenye nape mulukagwe pambele napo simwahongisi na ukupela na ukumufuuwa. 33Mupulikage ikiganiso ikingi, “epwali umunya mugunda, yealavyalite imisabibu swe isita ulusito ipilimya umugunda, swe iyava ilikombo lya ukuhusila idifayi, neke pe asenge ichuwo ikitaali icha ukumingila umugunda swe akuvabasikisa avangi ndawe awukige ulugendo. 34Pe sambi amaveleko givanga ukutung'una avatumite avakami ku vanyakubasa sambi vakategule amaveleko. 35Avanyakubasa vavatofile avakami, uyungi vamuwulige, neke uyungi vakinye na amaganga. 36Kangi swe ituma avakami avangi wolofu ukulutila avevalongwe, nawo vavapije ndawe vavala avayawo. 37Pambele swe akuvasindikila yumwanakwe itigila; ‘Vava na choga kulumwanangu.’ 38Neke avanyakubasa pe vamuwene umwana va umunyamugunda ndawe vatigilige uyu ye munya malila leke tumuwulage tutegule ililila. 39Ndawe vamwibatige neke vamutoose kwivala umugunda, swe vakumuwulaga. 40Ino peasile umunya mugunda gwa imisabibu, avagita ndawuli vala avanyakubasa?” 41Vamutige, “Avawulaga vala avanangifu mbevali, neke pe abasikise avangi vevamupela amaveleko ulusika pelufisile.” 42Yesu avatige, “Simwemulimba Uwandike Uwelu: ‘Iliganga lila lyevevalibihye avasenzi ilyo live liganga likomi lyamulubali; ulukani ulu luhumite kwa Umutwa, nalo wuhulo pamiho getu!’ ” 43Ino nene nguvalongela nyenye, uwutwa wa Nguluvi sawuhega kwa nyenye neke wutawulwe ku vanu va ing'i isingi aviveleka amaveleko ga uwutwa uwo. [ 44Neke yula ye agwila mwiganga ili saadenyangika fivi neke pelimugwilye umunu limung'enyanga.] 45Avatambisi avavina na avafalisayo pevapulike ifiganiso fyakwe valukagwe ulwa akuvalonga vavene. 46Neke pe vagele ukumwibata, swe vakogopa amalugu, pakuva gegamukagwe ulwa muvisi.

will be added

X\