MATAYO 12

1Ulusika lululaga Yesu pealutilige mumigunda ija ingano pa ikimunyi icha isabato; avanyigendo vakwe vevina nzala, swe vivanga ukudenya amahoo aga ingano, vilya imeke. 2Neke Avafalisayo pevaluwene ulu, ndawe vamutigilige Yesu, “Lavage avanyigendo vako vipiga ulukani lwesilulagile ukupigwa pa ikimunyi icha isabato.” 3Ndawe Yesu avapitulige, “Simwemulimba che apigite Daudi, pe e ina nzala, umwene na avayagwe? 4Inje na vayagwe mukaye ya Nguluvi swe ilya imikate jejemivike pa Nguluvi. Umwene na avayagwe vevevakanile pakulya imikate ijo pesi vavatambisi hela aviyena. 5Tutigile simwemulimba mundagilo ukutigila pa ikimunyi cha isabato avatambisi vavidenya indagilo mutembeli, na sivevalasokamwa ukutigila vananzi? 6Nene nguvalongela nyenye ipa pwali umuvina ukulutila itembeli. 7Neke muke mulukagule ulu ukutigila, ‘Ndisaka ulusungu, sindisaka ifitawulwa’ simuke muvahiga vala vesivananga kinu. 8Pakuva Umwana va Umunu ye Mutwa va isabato.” 9Yesu ahesile uluhuma pala, ndawe ingilige musinagogi yawo. 10Ino mumo emwali umunu umunyalitela mwiwoko. Ndawe vamuwusige Yesu, “Luhwanite ukuponia umunu pa ikimunyi cha isabato?” Vamugelige sambi vamutose. 11Ndawe Yesu avapitulige, “Yenani mwa nyenye umunya ng'olo yimwi, neke peyive yigwilye mwikombo pa sabato yesiayihesa? 12Uwunofu wa umunu wulutye kalinga ku ng'olo apo luvaje ukupiga inofu pa Sabato.” 13Ndawe amutigilige umunu yula, “Golole iliwoko lyako.” Ndawe agololige swe ipona iliwoko liva ndawe iliyalyo. 14Ndawe Avafalisayo vahumige kwivala neke vavange ukulongana ifigaho ifya ukumuwulaga Yesu. 15Yesu we akulukagula ulu, swe ihega ukuhuma pala. Ndawe avanu wolofu vamufwatige nu kuvaponia avatamwa mbevali. 16Ndawe avakanilige valamulonga, 17Sambi lukwile lwelwe lulonge na umuvisi Yesaya; 18“Mulavage, umukami vangu yendimuhagwe, umwende vangu yula ye inumbula yangu yikumuhekelela. Mbika umuhe gwangu kulumwene, nave adalikila avanu mbevali ukuhigwa. 19Siava munyalubesa nambi liyowo, nambi liswi lyakwe sisalipulisa mumakasi. 20Ululasi uludenyefu sisaalusindilisa, nambi ulutambi ulunyalisusi sisaasimya, mbaka pesaileta uwulonga hilo wuteme. 21Na mwitawa lyakwe avanu mbevali valihuvila.” 22Ndawe avanu vamuletige kwa Yesu umunu umubofu na umunyakibubwi pakuva eina lisoka, ndawe Yesu amuponiage swe umunyakibubwi ilonga na ukulava. 23Neke avanu mbevali vasasavale neke viwuse, “Uyu ahwanite ave mwana va Daudi?” 24Neke Avafalisayo pevapulike ulu vatigile, “Ulu ludali lwa Libelisebuli hela. Ilivina hilo lya amasoka, kwe kutigila umunu uyu ihumya amasoka kwa uludali lwa lilyo.” 25We akugakagula amahosa gawo, ndawe avatigilige, “Uwutwa wewuvesaga wukwigavasa wiyena uwo wawigwa na ukuva wukiva, yisukuli iboma nave ikaye iyakwigavasa yiyene. 26Wone setani amuhumye setani ava igavise we iyena; ino uwutwa wakwe wiima ndawuli? 27Wone nene ndandihumya amasoka kwa Libelisebuli apo avanyigendo venyu vavihumya na kiki? Apo iwo vevavahiga nyenye. 28Neke wone ndihumya amasoka na Umuhe gwa Nguluvi apo nano uwutwa wa Nguluvi wusile kwa nyenye. 29“Luva lwa ndawuli umunu ingile mukaye ya umunyaludali neke ahiise ifinu fyakwe, pesiatasili tandi amupinge umunyaludali? Neke pe ahiise ifya mukaye. 30Umunu yesialipamwi na nene uyo akumbihila nene na yesi ikong'asa na nene uyo aitagalisa. 31Apo ino nene nguvalongela nyenye, ukutigila inzanangifu mbesili na uwulonga fibi avanu savadegepelwa, neke ulwa ukumulonga fibi Umuhe Umwelu sisavadegepelwa. 32Na yula yealonga ulubi kulumwana va Nguluvi saadegepelwa, neke yeyealonga ulubi kwa Umuhe Umwelu sisaadegepelwa, ulwa lino na lwa pambele. 33“Umubiki umunofu na amaveleko gagiva manofu neke umubiki umubi na amaveleko gagiva mabi. Umubiki gwagwikagulanika mumaveleko gakwe. 34Nyenye nyembegalo ya inzoka! Mbi mulonga ndawuli inofu, we mwivanya nzanangifu? Pakuva umunu ailonga isimumemile munumbula. 35Umunu umunofu ilongaga inofu uluhuma mukisande ikinofu; umunu umubi ailonga imbi uluhuma mukisande ikibi. 36“Nene nguvalongela pa ikimunyi icha ukuhigwa avanu savalalonga mbesili sevalongige. 37Pakuva kwa indongele sako sauvalilwa uwugolofu, na kwa indongele sako sauvalilwa uwanangifu na ukuhigwa.” 38Ndawe avangi va avigisi va indagilo na Avafalisayo vamutige Yesu, “Mwigisi, hwehwe twisaka utulagile umwitu ukuhuma kwa veve.” 39Ndawe Yesu avapitulige, “Imbegalo inzanangifu na uwugoni yisaka umwitu; na siyilagilwa umwitu pesi umwitu gwa umuvisi Yona hela. 40Ndawe Yona lwe ali mwileme lya isomba ingomi filo fidatu, ndahihyo na yu Mwana va Umunu saikala filo fidatu pasi. 41Avanu avanya ku Ninawi savalasilibuka ikimunyi icha ukuhigwa pamwi na imbegalo iyi, nawo savavahiga ulwa mwivananzi pakuva avene vahongise na ukupela kwa uwudalisi wa Yona; na ipa pwali yealutye kwa Yona. 42Pa ikimunyi icha ukuhigwa saiima umutwa ung'inetu uluhuma ku Seba saavahiga nyenye. Pakuva agenzile uluhuma kung'i yakwe aase amupulikise Solomoni, peakwigisa kwa uluhala neke nene nguwolelela ukutigila ipa, pwali yealutye kwa Solomoni. 43“Ilisoka pelihumile kulumunu, lyalikola muwubamba lisaka pawusuupo neke lilemwe ukupawona. 44Neke pelitigile, ‘Nene milukila kukaye yangu kwengahumite.’ napelifikite liwona pelu pafyagile na pavike wunofu, 45pepene pelyalipiluka neke likalete amayagwe gimufung'ati amabi hilo ukulutila ilyene, neke pegingile gikale mumo; na umunu yula akwanangika pakomi ukulutila umutalo. Ulu lwe salulava ku mbegalo iyi.” 46Yesu ave peavalongela avanu, uyuve na avanyalukolo vakwe veviimile kwivala visaka ukulongana nave. 47Ndawe uyumwi amulongelige Yesu, “Uyuwo na avanyalukolo vako vali pivala visaka valongane na veve.” 48Neke Yesu amupitule umunu yula atigile, “Yuva nene na vanyalukolo vangu vevanani?” 49Ndawe agololige iliwoko ilagilila ku vanyigendo itigila, “Iva ve vayuva na avanyalukolo vangu! 50Pakuva yula yeipiga isa Dada yealikuchanya ye munyalukolo vangu na yemuhasa vangu na ye yuva.”

will be added

X\