MATAYO 10

1Neke Yesu avakemele avanyigendo vakwe vanyichumi na vavili, neke avapele uludali ulwa ukuhumya amasoka, na ukuponia inamwa na uwuhomefu wewuvesaga. 2Amatawa gawo avigendo avanyichumi na vavili ge iga: Umunyakutala Simoni, yeatambuligwe Petulo neke nayi Andeleya umwanakwave; Yakobo umame va Yohane avana va Sebedayo, 3Filipo neke nayi Batolomayo; Tomasi neke nayi Matayo umukong'asa imbemenenge; Yakobo umwana va Alifayo, neke nayi Tadeyi; 4Simoni uva ku Kana neke nayi Yuda yeamupitwike Yesu. 5Yesu avatumite iwo avanyichumi na vavili, neke avalagile de: “Mulabita kuvanu vesivamuseli Nguluvi, nave ukwingila muboma iya ava Samaliya. 6Lino mubitage ku Vaisilaeli avayasile nda ng'olo. 7Neke pemwibita mudalikage mwitigila: ‘Uwutwa uwa kuchanya wuhegelye.’ 8Muponiage avatamwa, musilibulage avafwe, mutelesage uwukoma, muhumyage amasoka. Nyenye mwanuche kitahomba nayinyenye mutawulage kitahombwa. 9Mulategula isahabu, nambi magobole nambi mapesa. 10Nambi bogolo, nambi sopeka sivili, nambi ndatu, nambi lubamba pakuva umukami anoje ukupelwa ikilyo chakwe. 11“Pemwinje mu boma yiyeyivesaga nave kijiji, musakage yeahwanite ukuvanukila mukaye yakwe, mwikalage mumo mbaka pesamwihega. 12Peye mwinje mukaye yila muvahungilage avanyakaye. 13Neke wone avanyakaye yila vanukile ukuhungila kwenyu uwikalakunoga wenyu wikala nawo neke wone sivanuchi, uwikalakunoga wenyu wuvapilukila nyenye. 14Na umunu yesiavanuchi nambi kupulikisa ing'ani senyu mupumunage ulungundi lwa inzaho senyu pe mwihuma mukaye yila nambi muboma yiyo. 15Nachene nguvalongela, ikimunyi cha ukuhigwa iboma iyo sayihigwa pakomi ukulutila ukuhigwa kwa iboma sila sa mu Sodoma na mu Gomola.” 16“Mupulikisage, nene nguvatuma nda ng'olo mukipinga cha ingwami; ino muvesage mwivasugu ndawe inzoka kangi muvesage mwivalele ndawe ingunda. 17Mwikomalilage kuvanu; pakuva savavasindika kuwuhigilo, muhigwe na ukutowa mumasinagogi gawo. 18Samusindikwa ku vatema na avatwa, mwivalwa nene, sambi muwolelele Ulukani Ulunofu avene na vala vesivamuseli Nguluvi. 19Nape avanu vavasindike kuwuhigilo, nyenye mulahuguvala ulwa mulonga kiki nakuta luva ndawuli, pakuva ulusika ulo pelufisile, samupelwa ulwa kulonga. 20Pakuva muva si nyenye yemulonga, ava Muhe va udadenyu yalonga uluhuma mugati mwa nyenye. 21“Vanyalukolo savavapituka avanyalukolo vawo sambi vawulagwe, udade amupituka umwanakwe, na avana savavagalukila avegasi vawo sambi vavawulage. 22Neke nayi nyenye samuvipilwa na avanu mbevali mwivalwa ilitawa lya nene, apo umunyakwinatila mbaka ku wudugo uyo saapokwa.” 23“Nape vavahakite iboma iyi, mukimbililage iboma iyingi; pakuva nachene, nguvalongela, sisamusinda iboma sa mu Isilaeli, mbaka umwana va umunu pakusa.” 24“Umunyigendo siava muvina ukulutila umwigisi vakwe, kangi umunyawingi samulutila umuvina vakwe. 25Lukwilye umunyigendo ukuva ndawe umwigisi vakwe na umunyawingi ukuva ndawe umuvina vakwe. Ino pevamutige umunyakaye Belisebuli, lino luva ndawuli kwa vala vamukaye yakwe sivavapela amatawa amabi ukulutila?” 26“Ino mulawogopa avanu iwo. Chichekivesaga kigubike sakigubulwa na ikifihe sakifihilulwa. 27Lwenguvalongela nyenye mulwisa, mululongage pa welu; na senguvapwepela mulongage wima hela. 28Mulawogopa vala avanyakuwulaga umuvili pakuva sivahwaniti ukuwulaga inumbula; mumogopage yula umunyakwananga inumbula na gumuvili kwitemela lyaumoto. 29Ndawuli! ifihuna ifivili fyafigusiwa ligobole limwi? Na kimwi sichakigwa pasi udadenyu wesialukagwi. 30Neke kangi nasifwili isa imitwe jenyu mbalile mbesili. 31Ino mulogopa pakuva; nyenye mwivanofu ukulutila ifihuna.” 32“Apo umunu yeyeavesaga akunzidikila pavanu apo nayi nene sandimwidikila pa Dada vangu yealikuchanya. 33Neke umunu yesaambihila nene pavanu nayi nene sandimubihila pa Dada vangu yealikuchanya.” 34“Mulatigila nene ngasile mukuleta uwikalakunoga mung'i nda ngasile mukuleta iligalu. 35Pakuva ngasile mukulekasa umunu na udade, umwalive na uyuve na uyuve na umukamwana na ung'inafyala. 36Na avatavangu va umunu vavalaga avalimukaye yakwe.” 37“Yula yeakumwenda udade nave uyuve ukulutila nene uyo siahwaniti na yuyula ye akumwenda umwalive ukulutila nene uyo siahwaniti ave munyigendo vangu. 38Neke na yesiitegula umusalaba gwakwe nu kuninila uyo siahwaniti ave munyigendo vangu. 39Yula yeakwibatilisa uwunani wakwe awuyasa na yeakuwuyasa uwunani ivalwa nene uyo saawuwona.” 40“Umunu yeakuvanukila nyenye akunzanukila nene na na yeakunzanukila nene akumwanukila Nguluvi yula yeanumite. 41Umunu ye akumwanukila umuvisi pakuva muvisi saanukila ikipelwa icha umuvisi, na yeamwanukila umugolofu pakuva mugolofu anukila ikipelwa icha umugolofu. 42Nachene nguvalongela, mwambevali yeamupela uyumwi va avadodo iva ululenga ulusisimu, ukuva munyigendo vangu, uyo nave nachene apelwa uluhombo lwakwe.”

will be added

X\