MALIKO 9

1Neke Yesu avalongele, “Nachene nene nguvalongela nyenye, povali avanu avimite ipa vesisavafwa wesi valawuwona Uwutwa wa Nguluvi yewusile muludali.” 2Neke pefilutye ifilo fimutanda Yesu avategwe Petulo na Yakobo na Yohane avasindike kukidunda ikitaali viyena. Na pevalikuko we vakumulava, Yesu apitwike ulwihwano lwakwe, 3na gimyenda jakwe jamalavadikige, myelu wuhulo, asukuli umufufi mung'i yahwanite ukwesa ndahihyo. 4Swe, ndawe vaasige Eliya na Musa, vilongana na Yesu. 5Nave Petulo ndawe amulongelige Yesu, “Mutwa, lwinoga hwehwe tusigale baha. Leke tusenge ifitinga fidatu: ikimwi cha veve, ikingi cha Musa, ikingi cha Eliya.” 6Pakuva sialukaguligi ulwa ukulonga, pakuva vevina muhwehwe mukomi. 7Neke ilifufu livagubike, neke iliswi lyahumite mwifufu litigila, “Uyu ye Mwanangu umwende vangu, mumupulikage umwene.” 8Sukumwi hela we pevalava kono na kono sivamuweni munu yungi kangi pesi Yesu hela. 9Na pevisulunuka uluhuma kukidunda avatanie ulwa valalongela munu sevasiwene mbaka Umwana va Umunu peasilibwike uluhuma kuvafwe. 10Swe vakwinatila ululagilo ulo, vakwiwusa vavene ulwa ukusilibuka kuvafwe che kiki. 11Neke pevamuwuse Yesu, “Mbi ndawuli avigisi va indagilo vavitigila mbaka asaage tasi Eliya?” 12Neke avatigile, “Nachene Eliya aasa tasi kukugolola mbesili, neke pamwi na siso Umwana va Umunu andikilwe ndawuli ulwa atesiwa mu nzolofu pamwi na ukubedalwa? 13Ino nguvalongela ulwa Eliya yeeasile neke vamupigile sevawendige avene ndawe lwe andikilwe.” 14Na pevafisile ku vanyigendo avevavalesile vawene ililugu ilikomi livapilime. Na avigisi va indagilo vahele vakwibesa nawo. 15Neke ulusika lulula amalugu mbegali pevamuwene Yesu vasasave hilo, neke vamukimbilile ukumutang'anila vamuhungile. 16Neke Yesu avawuse, “Mbi mukwibesa kiki nawo?” 17Uyumwi va avamalugu amupitwe Yesu, “Ve Mwigisi, ndimuletite umwanangu kwa veve, pakuva ina lisoka ilinyakibubwi. 18Na pelyakumutova lyakumugwisa pasi, na ukuhumya ilifulo mumulomo na ukugelesula amino, na ukukala umuvili mbeguli. Neke ndivasuke avanyigendo vako valihumye valemilwe.” 19Nave Yesu peavapitule, “Nye mbegalo ingaya lufuuwo. Mbi ndikala na nyenye mbaka panili? Mbi ndivakangalila nyenye mbaka panili? Mumulete kwa nene.” 20Neke pevamusindike umunyakilambo yula kwa Yesu. Neke ilisoka pelimuwene Yesu ulusika lulula lyamuletye ililibisi, neke umunyakilambo yula agwe pasi igalangala, kono we lihuma ilifulo mumulomo. 21Neke Yesu amuwuse udade, “Uluhuma panili ina lisoka ili?” Neke udade atigile, “Uluhuma pawana. 22Na mbepali lyakumutoosa mumoto na mululenga sambi limwanange. Neke wone wihwana ukupiga kinu tuwonelage ulusungu ututange!” 23Neke Yesu amutigile, “Wone uve wihwana! Mbesili sasihwana ukupigika kwa yeifuuwa.” 24Ulusika lulula udade va umukwamisi ayofile neke atigile, “Ndifuuwa! Nange uwugaya lufuuwo lwangu.” 25Neke Yesu peawene avamalugu vikimbila vakusa swe akulikenyela ilisoka akulitigila, “Ve lisoka ve munyakibubwi na ve mudibafu, ngukulagila hege kwa uyu na ulapilukila umwingile kangi!” 26Neke pe likoole, limuletele ililibisi ave nda afwe neke pelihege. Neke awolofu vatigile umunyakilambo, “yeafwe!” 27Neke Yesu amwibate iliwoko, neke amukang'ule, swe akwima. 28Neke peinje mukaye, avanyigendo vakwe vamuwuse kukinyele, “Mbi ndawuli hwehwe tulemilwe ukulihumya?” 29Neke avatigile, “Ilisoka ilya de silike lyakuhesa ndahihi pesi kwa lwifunyo hela.” 30Neke Yesu na avanyigendo vakwe vahesile uluhuma pala neke vagendele ku Galilaya. Nave Yesu sawendigi alukagule munu pepwali, 31pakuva avigisige avanyigendo vakwe, akuvatigila, “Umwana va Umunu atawulwa mumawoko ga avanu nawo vamuwulaga; na pevamuwulige pefilutye ifilo fidatu asilibuka.” 32Ino avanyigendo sivalukagwi lwe alongige neke ulwene wogopige pakumuwusa. 33Ndawe vafikige ku Kapelenaumu. Na pealimukaye avawusise, “Mulongige kiki mung'asi?” 34Neke vakatuke pakuva mung'asi vilonganzige ulwa yenani umuvina yealutye mwa veve. 35Neke Yesu ateng'emale swe akuvakemela vala avanyichumi na vavili, neke avatigile, “Yeyeavesaga iwenda ave mulongola kwa mbevali uyo ava va mumbele na mukami va mbevali.” 36Neke amutegule Umwana mudodo, neke amuvike pagatinagati apawo; neke amwegule mumawoko gakwe swe akuvatigila, 37“Yeye amwanukilaga umwana yeindawe uyu mwitawa lyangu akunzanukila nene, na yeakunzanukila nene siakunzanukila nene hela, akumwanukila yula yeanumite nene.” 38Yohane swe akumutigila, “Mwigisi tumuwene umunu yungi ihumya masoka mwitawa lyako neke tumutanile pakuva sivelagi siayiva pamwi na hwehwe.” 39Neke Yesu avatigile, “Mulamutanila, pakuva asukuli yeapiga imiitu mwitawa lyangu neke lulusika lulo alonge imbi kwa nene. 40Pakuva yesiakutubihila hwehwe uyo alilubali lwa hwehwe. 41Pakuva, yeyeavesaga akuvapela nyenye ululenga mu kinywelo ulwa ukunywa pakuva mwivanu vakwe Kilisito sisaaneema ukupelwa uluhombo.” 42“Umunu yeyeavesaga akwambusa uyumwi va avadodo iva avakufuuwa nene apige inzanangifu, ikiba peawopelesewe ulwala musingo neke atooswe mubahali. 43Neke wone iliwoko lyako likukuvase upige inzanangifu, dumule! Ikiba veve pewinje kuwumi we wimugaya liwoko sindawe pe wina mawoko gavili neke sambi utoswe kumoto gwa ku Gehena gwe sigwisimagi. [ 44Kula, ifitekenya fyawo sififwisagi, na gumoto sigwisimagi.] 45Neke wone na liligulu likukukuvasa upige inzanangifu, dumule! Ikiba pewinje kuwumi wina ligulu limwi sindawe pe wina magulu gavili neke sambi utoswe kumoto. [ 46Kula, ifitekenya fyawo sififwisagi na gumoto sigwisimagi.] 47Neke wone na liliho lyako likukukuvasa upige inzanangifu ikiba peuling'amatwe neke utage! Lunoje wingile ku wutwa wa Nguluvi na liho limwi sindawe pe wina miho gavili neke sambi utoswe kumoto. 48Kula ifitekenya fyawo sififwisagi na gumoto sigwisimagi. 49“Pakuva yeyeavesaga saafungiswa mumoto. 50Umwino munofu, neke wone guhupe gusopwa kiki neke gunone? Nyenye mwinona mwino, mukikalage mu wikalakunoga yinyenye kwa yinyenye.”

will be added

X\