MALIKO 7

1Neke Avafalisayo pamwinga na Avigisi va indagilo, avevahumile ku Yelusalemu swe vikong'ana kwa Yesu. 2Vave vakuvawona avanyigendo vakwe avamwi vilya ichakulya na amawoko amahongawinya kwekutigila sivevakalivi. 3Pakuva Avafalisayo na Avayudaya mbevali sivilisagi kinu wesivakalivi amawoko gawo wunofu ukwinatila indongwa isa avanyakataali vawo. 4Kangi, sivilisagi kinu chekivesaga ikitumite pamagulilo, mbaka peyevafyofwige. Kangi kosili inzigiso isingi sevevanuche ukuhuma kwa avanyakataali vawo ndawe ukofuga ifinywelo, ifitonga na ifinu fingi ifiwuyape na ifyuma. 5Neke Avafalisayo na avigisi va indagilo vamuwuse Yesu, “Mbi ndawuli avanyigendo vako sivavakwinatila indongwa isa avanyakataali, pevilya na amawoko amahongawinya?” 6Neke peavatigile, “Yesaya avilite wunofu isa nyenye nyevabuganisi ndawe lweandike: ‘Avanu iva vakunzogopa kwakulonga hela, Inumbula sawo silipataali na nene, 7Vakwifwahisa hela ukusunyalila pakuva, vakwigisa fila fye vakwivangila vavene indagilo sawo hela.’ 8Mukusileka indagilo sa Nguluvi neke mwinatile indongwa isa avanu.” 9Neke peavatigile, “Mwivasugu pa kugubika indagilo isa Nguluvi sambi mwinatile indongwa senyu! 10Pakuva Musa atige, ‘Mwogopage udado na uyuwo,’ na, ‘Yula ye aliga udade nave uyuve, lumuvaje ukufwa.’ 11Ino nyenye mwakwigisa, ‘Wone umunu ave na ikinu cheisaka avatange nacho udade na yuyuve, neke hambi atigile ikinu icho kolabani (kwekutigila kitawulwa kwa Nguluvi), 12Swe lino silumuvaji ukumutanga udade nambi uyuve.’ 13Uko kwekubedala ulukani ulwa Nguluvi na ukwinatila indongwa senyu semwakwilekela. Kangi mwipigaga nzolofu isihwana na siso.” 14Neke Yesu avakemele vamalugu vaase swe akuvatigila, “Mbemuli mupulikisage sambi mulukagule. 15Kisukuli ikinu ikikwingilaga mulumunu uluhuma kwivala chekilekaga umunu ave mwanangifu, ali ikinu ikihuma mugati mulumunu icho chechakileka ave mwanangifu. [ 16Wone kwina umunu umunyamapulikilo aga ukupulikila lekage apulike!”] 17Neke na peinje mukaye weagulesile umukong'ano gwa vanu avanyigendo vakwe neke vamuwuse ulwa ikiganiso. 18Neke peavatigile, “Kumbi nayi nyenye mwivagaya luhala? Simukuluwona ulwa ikinu ikikwingila mulumunu uluhuma kwivala sichakileka umunu anangike, 19pakuva sichakwingila munumbula, icho chakwingila mwileme neke kiluting'asa na ukutagwa kwihala?” (Pakulonga ulu esise ifilyo mbefili.) 20Neke peatigile, “Ichakihuma mulumunu che chakileka umunu ave mwanangifu. 21Pakuva mugati munumbula sa avanu, gagihuma amahosa amabi, uwugoni, uwuhiisi, uwuwulasi, 22Uwusafi, uwung'ung'unu, uwaafu, uwugaya choga, uwifu, igila, uwulisi, ikidada na uwupufi. 23Imbi mbesili isi sasihuma mugati mulumunu sesene sesasileka umunu ave mwanangifu.” 24Neke uluhuma pala awukite swe ibita kung'i iya ku Tilo na ku Sidoni. Ndawe ingilige mukaye iyingi, neke sawenditi umunu alu kagule; nambi ndahihyo ave siafihimi. 25Neke ulusika lulula, umung'inetu, yeeina umwalive ina masoka, apulike isa Yesu. Neke, pease afugame pamagulu gakwe. 26Na umung'inetu yula e Mugiliki, uva ku Silofonike. Neke peamugongole agahumye amasoka kulumwalive. 27Neke Yesu amutigile, “Lekage tasi avana valye pakuva silwinoga pakutegula ichakulya icha avana neke utosekese imbwa.” 28Neke umung'inetu yula amupitule Yesu, “ Ena Mutwa, lwindahihyo, neke imbwa naso sasisava uwuwuluwulu wewawigwa pawulilo wa avana.” 29Neke Yesu peamutigile, “Paulu wibitilage, ilisoka limuhumite umwaliwo!” 30Neke umung'inetu yula abite kukaye neke afike umwana avasise muwuhaga na ilisoka limuhumite. 31Ndawe Yesu ahegige mulutanana lwa mu Tilo, swe igendela ku Sidoni, ndawe afikige ku nyanza ya ku Galilaya igendela mung'i sinyichumi iyitambulwa Dekapoli. 32Neke pevamuletele umunu yeemudibafu kangi munyakibubwi, neke vamusuke amugeleke amawoko. 33Neke Yesu peamutegule palubali uluhuma pa vanu neke avike ifyala fyakwe mumapulikilo neke peafunye amati swe akumupamisa ululimi. 34Ndawe alavige alavige kuchanya sweihuguvala hilo neke amutigile, “Efata,” kwekutigila,“Dibaluke.” 35Neke amapulikilo gakwe gadibaluke, ululimi lwakwe luhogohe, swe ilonga wunofu. 36Neke Yesu avalagile ukutigila valalongela munu; pakulonga ndahihyo ave nda avatumite pakuva pepene pevaginite ukubitakilonga. 37Swe avanu visasavala hilo vitigila, “Apigite mbesili wunofu: avadibalwe avadibafu vapulike, na avanyakibubwi vilonga!”

will be added

X\