MALIKO 6

1Yesu ahesile uluhuma pala neke peabite kung'i yakwe, na vanyigendo vakwe vamuninile. 2Na paikimunyi icha isabato avange ukwigisa musinagogi, na awolofu avapulike vasasavale vitigila, “Umunu uyu akasiwene kwi mbesili isi? Wunyandolo wuki we apelitwe? miitu miki igi igipigika na amawoko gakwe? 3Uyu si yeyuyula umuhongosi, Umwana va Maliya, na Umame va Yakobo, nayi Yosefu, Yuda nayi Simoni? Kangi na vavahase sitwinawo ipa?” Swe vakumubihila. 4Ndawe Yesu avatigilige, “Umuvisi aiva mutambule mbekuli pesi kung'i yakwe na ku vanyalukolo vakwe na mukaye yakwe hela.” 5Neke alemwe ukupiga imiitu baho, pesi avagelike amawoko avatamwa vakefu hela, nu kuvaponia. 6Yesu asasavale ukwimila uwugaya lufuuwo lwawo. Ndawe Yesu abitige mufijiji akwigisa avanu. 7Nave avakemelye avigendo avanyichumi na vavili ndawe avangige ukuvatuma vavili vavili. Neke avapele ululagi lwa ukuhumisa amasoka, 8sweno akuvalagila, “Valategula kinu pesi lulubamba swe, nambi ichakulya nambi bogolo, nambi magobole mumapembo gawo. 9Vafwalage indatu valafwala isopeka sivili.” 10Neke peavatigile, “Pe mwinje mukaye, mwikalage baho mbaka pe mwihega. 11Neke wone pave popali apono pesivavanuchi, vabihile ukuvapulika mupunage ulungundi mumagulu genyu sambi wuve wolelesi kuvene.” 12Ndawe vabitige kukudalika ulwa avanu vahongesage na ukupela. 13Nawo vihumya amasoka; na ukubaka amafuta avatamwa wolofu, nawo vaponite. 14Umutema Helode apulike iso mbesili, pakuva ilitawa lya Yesu lyelikagulanike mbekuli. Avanu avamwi vatigile, “Ye Yohane umubatisi asilibwike ukuhuma kuvafwe, nambi inakitulo cha imiitu igipigikila mulumwene.” 15Neke avangi vatigile, “Ye Eliya.” Neke avangi vatigile, “Uyu ye muvisi, ndawe avavisi avayagwe avapidaha.” 16Neke Helode peapulike ulu atigee, “Yohane! Ye ndamudumwe asilibwike.” 17Pakuva Helode atumite avanu neke vamwibate Yohane, swe akumusopa mundinde akumuvala Helodiya ye ali mukina Filipo umunyalukolo vawo, pakuva alamutegwe. 18Pakuva Yohane atigee kwa Helode, “Silulagile kwa veve ukumutegula umukina munyalukolo vako.” 19Neke Helodiya amuvipile wuhulo Yohane, awendige amuwulage. 20Neke sahwaniti, pakuva Helode amwogopige Yohane, alukagulige ukuta Yohane e munu mugolofu kangi mwelu, nambi amulekige ave muwunofu. Helode awendige ukumupulikisa Yohane, na lwave peyeamupulikise asasing'anige wuhulo. 21Neke ikimunyi ikikomi cha ukwiwuka ukuwoneka kwa Helode awuyepe ikiwungo na ifyakulya sambi ave na uluhekelelo pamwi na avavaha va pawuhigilo na avavina va avanyigalu na avalongola va mu Galilaya. 22Ndawe aasige umwalive va Helodiya neke awunge, sweno Helode na avagenzi vakwe lwanoje hilo neke umutwa amutigile umuhinza yula, “Sukage nene che wisaka, nene ngupela.” 23Neke amwilapile, “Che usuka kwa nene, nene ngupela; nave ulubali ulumwi lwa uwutema wangu.” 24Neke umuhinza ahumile akumuwusa uyuve, “Sukage kiki?” Neke uyuve atigile, “Umutwe gwa Yohane umubatisi.” 25Ndawe umuhinza ingilige lulusika lulula ku mutwa itigila, “Ndisaka umele yilinode umutwe gwa Yohane umubatisi muluhelo.” 26Umutwa swe ihuguvala hilo, ino pakuva yeeilapite ulwilapo lwakwe pa avagenzi siawenditi alemwe ukukwisa ulukani lwakwe ku muhinza uyo. 27Swe lulusika lulo umutwa ituma umunyigalu akalete umutwe gwa Yohane. Ndawe umunyigalu abitige mundinde mweemwali Yohane swe akumudumula, 28neke pealete umutwe muluhelo amupele umuhinza, swe umuhinza akumusindikila uyuve. 29Neke avanyigendo vakwe Yohane pevapulike vahele neke vategule umuvili gwakwe vasakutaga ku matago. 30Avigendo vapilwike kwa Yesu neke vamulongele mbesili sevapigite na ukwigisa. 31Neke atigile kuvene, “Muse yinyenye kulubali musuupe ludodo pakuva avanu wolofu aavasige nu ukubita neke vagaye uwulegefu uwa ukusuupa na ukulya.” 32Ndawe vabitige na ikipugu apono pa ikilega. 33Ino avanu wolofu vavawene pevibita neke vavakagule. Sweno awolofu vahumite iboma mbesili, vikimbilila kweekwali Yesu na avanyigendo vakwe, avene vilongola ukufika. 34Nape vikige pamwani Yesu awene amalugu makomi ga vanu neke avawonele ulusungu, pakuva vevindawe ing'olo ingaya umunyakukwamila. Neke peavange ukuvigisa ing'ani nzolofu. 35Ikimunyi pekilutye avigendo vakwe vaasile kwa Yesu vamutigile, “Ipa pe ihala hela na lisuva yelisalye. 36Ikiba uvilage avanu iva, vabite mumigunda na mufijiji ifilimwipi neke vigulile ifya ukulya.” 37Neke avapitule, “Nyenye muvapele ichakulya.” Nawo vamuwusise, “Ngali hwehwe tubitage tukagule imikate ija dinali magana gavili sambi tuvapele valye?” 38Neke Yesu avawuse, “Mwina mikate gilinga? Mubite mulave.” Neke pevalafile vatigee, “Gihanu na somba sivili.” 39Neke pealagile mbevali vateng'emale fiwungu fiwungu 40Swe viteng'emala pasi fiwungu fiwungu fya avanu ligana ligana na machumi gahanu gahanu. 41Neke egule imikate igihanu na isomba isivili swe ilava kuchanya akumulumba Nguluvi, neke pe amegule umukate, swe avapele avanyigendo vakwe sambi vavagavile avanu. Na sisomba isivili naso avagavie mbevali. 42Swe mbevali valye, neke vigute. 43Ndawe vasavige uwuwuluwulu wa imikate na isomba fitangula finyichumi na fivili fimemile. 44Na avalye imikate gila ve vanyidama mbilima sihanu. 45Ulusika lulula avatige avanyigendo vakwe vingile mukipugu valongole kumwambu ku Betisaida, umwene epeavilaga vamalugu. 46Na peavilasile ahele kukidunda kukwifunya. 47Na ikinyamihye pekifisile ikipugu che pagati ya inyanza, nave eiyena hela mung'i ing'afu. 48Sweno, avawene avanyigendo vakwe viguda pakugenza ikipugu na imitela pakuva ikifulufumbi chevategulisige. Na pembe kwicha, Yesu ahele kuvene, igenda muchanya mu nyanza. Ave ndaakuvalutila, 49neke pevamuwene igenda munyanza vatigilige vakiwene kisuka swe vikoola; 50pakuva mbevali pevamuwene vave na muhwehwe mukomi. Nave Yesu ndawe avatigilige, “Musikimalage, ye nene. Mulava na muhwehwe!” 51Swe akwingila mukipugu, mwevemumo, na ikifulufumbi kisikimala. Nawo vakabwike hilo, 52pakuva sivevalalukagula ulwa imikate, neke inumbula sawo save pesito. 53Neke na peyevalowike inyanza, vafikite mung'i ya mu Genesaleti. 54Neke na peyevikite mukipugu, ulusika lulula avanu swe vakumukagula Yesu. 55Sweno, ndawe vabitige vakwangupa mung'i yila mbeyili, kukuleta avanu avatamwa mufivasikiso fyawo, vavasindikige mbekuli kweekwali Yesu. 56Na kukweabitige Yesu mufijiji, muboma, na mu malungulu vavalambalikige avatamwa paluvanza, na ukumugongola Yesu ulwa nambi vake vapamise avatamwa ulupindo lwa umwenda gwakwe hela. Na mbevali avapamisige vaponige.

will be added

X\