MALIKO 4

1Kangi Yesu avanzile ukwigisa, peali palubali pa inyanza. Neke amalugu makomi gegakong'ine gamupilime, swe akwingila mukipugu neke ateng'emale mugati kono ikipugu we kilimululenga ililugu mbelili lyelili mumwani. 2Neke peavigise ifinu fyolofu ikola figaniso, neke peakwigisa avatigilage, 3“Mupulikage! Umuvyasi ahele kukuvyala. 4Neke peivyala inyadikwa isingi sagwilye mung'asi, neke ifidege fyuse neke filye. 5Isingi sagwe mwitalawe umwemwina luganga lukefu ulusika silusika samesile, pakuva pepagaya luganga lolofu; 6Neke ilisuva pelivasile sakasile pakuva sengaya ndela. 7Isingi sagwe mumifwa neke imifwa givine swe gitova neke silemwe ukuveleka. 8Neke isingi sagwe muluganga ulunono naso samesile savinite na ukuveleka: iyimwi yiveleka imeke machumi gadatu, na iyimwi machumi gimutanda na iyingi ligana.” 9Neke atigile, “Umunyamapulikilo gakupulikila, apulikage.” 10Neke Yesu peeasige iyena, avamwi va vavala avevamupulike na vanyigendo vanyichumi na vavili, vahele ndawe vamuwusige ulwa ikiganiso. 11Neke avatigile, “Nyenye mwivapele ulupweng'enyu lwa Uwutwa wa Nguluvi, neke kwa avalipivala chichekivesaga vakikagula vikola ifiganiso, 12Sambi, ‘Valave hilo, neke valemwe pakuluwona, vapulike hilo, neke valemwe pakulukagula. Wone sindahihyo, vake vamupitukila Nguluvi, Nave ake avadegepela.’ ” 13Neke Yesu avawuse, “Simukukikagula ikiganiso iki? Mbi ino mufikagula ndawuli ifiganiso mbefili? 14Umunyakuvyala aivyala ulukani lwa Nguluvi. 15Neke iva vevala avali mung'asi, mula mwe ulukani luvyale; na pevapulike ulusika lulo Setani akusa neke ategule ulukani uluvyale muvene. 16Neke iva vindawe vala avavyale mwitalawe pevapulike ulukani ulusika lulo vakwanukila kwa luhekelelo. 17Kono we vagaya ndela, neke vanane ludodo, neke ulugudo na ineseko pesusile kwa avene vivalwa ulukani ulusika lulo vakululeka. 18Neke avangi vevala avavyale mumifwa; vevala avavipulika ulukani. 19Neke kwa uwuhuguvafu uwa mung'i, na ukuwenda uwunono, na ukudobokela ifinu ifingi, ifi pefinje fya fitova ulukani ulo, neke valemwe pakuveleka kinu. 20Neke vala avevavyale muluganga ulunono vevala avavipulika ulukani na ukwanukila, neke vaveleke amaveleko; machumi gadatu avangi machumi gimutanda, na avangi ligana.” 21Yesu ave peavalongela, “Mbi pwali umunu yeaikunga ulung'ali neke afihe mukisilo nave mwifungu lya uwuhaga? Nda sipwali, ulung'ali lwalwivikwa pachanya paluwumba. 22Pakuva sikokili ikifihe, chesisakivikwa pawelu, kangi sikokili ikigubikile chesisakigubulwa. 23Umunu umunya mapulikilo gakupulikila apulikage.” 24Neke avatigile, “Mwinatilage semwipulika! Ikigelo kila chemwigelanikisa avanu vangi sakiva che kigelo chesamugelanisiwa nyenye na ukuwilwa. 25Pakuva yula yeinafyo saapelwa, na uluhuma kwa yula yeihela na kikilaga cheinacho saapokwa.” 26Yesu we peavalongela, “Uwutwa wa Nguluvi windawe umunu yeaivyala inyadikwa mumugunda. 27Neke ibitilage, wesiakulukagula chekipigika kunyadikwa pakilo na pamunyi. 28Pakuva ing'i yayimesa yiyene tasi ikimelo, pambele ilihoo ilinyameke isa ingano. 29Neke ingano peyitung'wine umunyakuvyala aibita na ikibenelo swe ivanga ukubena pakuva isanga yeyifikite.” 30Neke Yesu atigile, “ Tuwiganisa na kiki uwutwa wa Nguluvi? 31Windawe inyadikwa iya umuhaladali indodo hilo ukulutila inyadikwa mbesili sa mung'i. 32Neke peyivyalitwe na ukumela yayigunga neke yive mubiki mukomi, ukulutila ifimelo mbefili ifya mumugunda na ukuva na matagala makomi, na ifidege ifya mwihala fihwanite fisenge uwusulya mumatagala.” 33Ukukola ifiganiso ifyolofu ifindawe ifi avalongelige avanu ulukani lwakwe, ndawe mwevevahwanite ukulukagula. 34Sialongigi nawo pesi ukukola ikiganiso, neke kukinyele avaganulilige avanyigendo vakwe ing'ani mbesili. 35Ikimunyi kikila, peyive kinyamihye avatige, “Leke tulowoke kumwambu.” 36Neke avaleke vamalugu, swe ibitaga na avanyigendo vakwe mukipugu cheemwali. Pala pepofili ifipugu ifingi fyefyahegise. 37Neke ikifulufumbi chuse neke amavingo gitova ikipugu na ikipugu yechekivanzile ukumema ululenga. 38Umwene Yesu alagonelye weihagwee umwihago mukipugu kicho, swe vakumulamusa neke vamutigile, “Mwigisi siwihosa ulwa hwehwe twifwa?” 39Neke pealamuke akenyele ikifulufumbi swe itigila kumavingo, “Sike! Sikimale!” Swe ikifulufumbi kisika swe kwiva na wutendemafu wukomi. 40Neke avatigile, “Mbi ndawuli mukogopa? muvagaya lufuuwo?” 41Neke vave na muhwehwe mukomi vakwiwusa, “Uyu ye nani ye na ikifulufumbi kikumupulika?”

will be added

X\