1 Neke peyekuche avatambisi avavina, pamwi na avavina va avanu na avigisi va indagilo, na vavahisi mbevali vakong'ane na ukulongana; neke vamupinge Yesu vamusindike na ukumutawula kwa Pilato. 2 Neke Pilato amuwuse, “Veve ye veve ve Mutwa va Avayudaya?” Neke Yesu amupitule, “Veve ye ulonzile.” 3 Neke Avatambisi avavina vamusongele mu nzolofu. 4 Neke kangi Pilato amuwuse Yesu, “Wimugaya ulwa ukupitula? Wonage iva vakukusongela nzolofu.” 5 Neke Yesu siapitwi kinu swe Pilato isasavala. 6 Ino paikimunyi ikikomi icha i Pasaka Pilato avadindulilige uyumwinga va avanyandinde yevamuwendige. 7 Sweno, epwali umunu uyumwi yatambuligwe Balaba yealasopitwe mundinde pamwi na avananzi avangi kwa ukusagasa liyowo na uwuwulasi. 8 Neke vamalugu vamusile Pilato vakumusuka avapigile ndawe lwealasovye ukuvapigila. 9 Neke avapitule, “Mwisaka nene ndimudindulile Umutwa va Avayudaya?” 10 Pakuva alukagwe ulwa avatambisi avavina vevamulesile kulumwene kwa igila hela. 11 Neke avatambisi avavina vahele ukuvakuvilisa avanu vamusuke Pilato avadindulilage Balaba. 12 Neke Pilato kangi avatigile, Ino ngitage ndawuli na umunu uyu ye itambulwa Mutwa va Avayudaya?” 13 Neke pevayove kangi, “Atumbikwage!” 14 Neke Pilato avatigile, “Mbi wubi wuki? Weapigite?” Neke pevakoole mbevali, “Atumbikwage!” 15 Nave Pilato asakige ukwiyendelesa kwa avamalugu, swe akumudindulila Balaba. Ndawe alagilige Yesu vamutovangage ni imikungo iminyamifwa, ndawe amutawulige vakamutumbike. 16 Neke avanyigalu vamusogose Yesu mbaka kwivaha; swe vikong'ana avanyigalu mbevali pamwi. 17 Neke vamufwike Yesu umwenda ugunyakilesi, neke vative ingela ya imifwa nayo vamufwikite kumutwe. 18 Neke pevavange ukumuhungila, “Kamwene, ve Mutwa va Avayudaya!” 19 Neke vamutove na ululasi kumutwe neke vamufunyile amati, neke vamufugamile na ukumusunyalila. 20 Neke peyevamwelanzile, vamuwopwe isopeka neke vamufwike imyenda swe vakumusindika kukumutumbika. 21 Nawo vamung'ang'anise umulutilang'asi, Simoni uva ku Kilene yeahumige munanana, Udade va Isikanda na Lufo, sambi amuteguse umusalaba Yesu. 22 Neke vamusindike apono apatambuligwe Goligota kwekutigila, “Apono apa ikibang'a”. 23 Neke vamupelage idifayi inyanze na imanemane, neke Yesu abihile ukunywa. 24 Swe ndawe vamutumbikige Yesu, neke vagave imyenda jakwe vitovela isimbi ye nani ategule iki. 25 Ino che kivalilo cha wudatu, pevamutumbikige. 26 Pepina uwandike uwa uluhigilo lwa Yesu uwitigila, “Umutwa va Avayudaya.” 27 Pamwi na Yesu vatumbikwe avahiisi vavili, uyungi kwiwoko lya kundyo neke uyungi kung'igi. [ 28 Na Uwandike Uwelu wakwilye wewitigila, “Avalilwe pamwi na avananzi.”] 29 Na vavala avalutilige mung'asi vamuligige viyunza imitwe jawo vitigila, “Aha! Vemunyakudenya itembeli na ukuyisenga mufilo fidatu! 30 Wiponiage yuveve wike mumusalaba!” 31 Swe avatambisi avavina na avigisi va indagilo vamwelange vitigila, “Aponise avangi, ilemwa ukwiponia yu mwene! 32 Kumbi ye Kilisito, Umutwa uva Isilaeli! Ike lino uluhuma mu musalaba sambi tulave neke tufuuwe.” Na vavala avevatumbike pamwi nawo vamulisile ndahihyo. 33 Na pekifisile ikivalilo icha mutanda pamunyi kwave na lwisa mung'i mbeyili mbaka pa ikivalilo icha igonza. 34 Neke paikivalilo icha igonza pelitegamwike Yesu akoolite kwihuga, “Eloi, Eloi, lama sabakitani?” Kwekutigila, “Nguluvi vangu, Nguluvi vangu, mbi ndawuli undesile?” 35 Neke avangi avevimile pevapulike vatigee, “Mulavage! Ikemela Eliya.” 36 Neke uyungi akimbile, swe isopa idifayi inzasamufu neke avike mululasi swe akumunywesa itigila, “Leke tulave wone Eliya aasa amwise pasi!” 37 Neke Yesu akoole akwihuga swe Umutima gwidumuka. 38 Neke ikibupa icha ilyenda lya i tembeli swe kidemuka kihuma pavili uluhuma kuchanya mbaka pasi. 39 Umuvina uyumwi va avanyigalu yeeimite pawutalo pa Yesu amuwene peikoola nu kufwa, atigee, “Nachene Umunu uyu ake Mwana va Nguluvi!” 40 Ve povali na avang'inetu ave pataali mwavawo, epwali Maliya Magadalena, Salome na Maliya uyuve va Yakobo na Yose. 41 Iva vamuninilige Yesu pee ku Galilaya, na ukumupigila, neke kangi na avang'inetu avangi avevahelelige pamwi na Yesu ku Yelusalemu. 42 Ikinyamihye yechekifikite. Icho che kimunyi icha ukwigelanisa ikilongola kusabato. 43 Ipo aasile Yosefu uva ku Alimataya, umutambule uyumwi va pawuhigilo. Uyo yemwene nave awulavisige uwutwa wa Nguluvi wuuse. Ahele kwa Pilato wesakogopa, swe isuka apelwe umuvili gwa Yesu. 44 Neke Pilato asasavale ukupulika ulwa Yesu yeafwe; neke amukemele umuvina va avanyigalu, amuwuse ulwa wone Yesu yeafwe lusika. 45 Neke Pilato peyealukagwe ukuhuma kwa umuvina va avanyigalu ulwa Yeafwe, ndawe amutawulige Yosefu agutegule umufimba. 46 Ipo Yosefu agusile isanda inofu swe akumwisa Yesu mumusalaba neke amufwike isanda neke amutage muwuvi uwe wuyave mwitalawe, neke adinde na iliganga pamulyango gwa ichanga. 47 Maliya Magadalena na Maliya uyuve va Yose vapawene peali muvike.
Copyright © 1999 The Bible Society of Tanzania; ℗ 2010 Hosanna