MALIKO 13

1Na Yesu avelige ihuma mu Tembeli uyumwi va vanyigendo vakwe amutige, “Mwigisi, lavage amaganga na ikaye isi wesiwali uwunofu.” 2Yesu amupitwe, neke amulongele, “Ukusiwona ikaye ingomi isi? sipolili nambi iliganga limwi mukaye isi lyesisalidenywa.” 3Ino Yesu pealateng'eme pa kidunda icha imiseituni alaving'ine na itembeli, Petulo, na Yakobo, Yohane na Andeleya vamuwusise Yesu palubali, 4“Tulongele, ing'ani isi panili pesasiwoneka? Na kiki chekiva kilagilo ukuta ulusika ulo yesambi lwikwila?” 5Neke Yesu avatigile, “Mwikomalilage, umunu alavasanga. 6Pakuva avanu wolofu savasa mwitawa lyangu, vitigila, ‘Nene ye nene!’ Nawo savavasanga wolofu. 7Pesamwipulika ulwa amagalu na simwepo sa amagalu, mulakabuka. Pakuva iso sasusa, neke umudugo guva sigulafika. 8Ing'i sayiwuka ukwihoma na ing'i yingi, na uwutwa ukwihoma na uwutwa uwungi; sakuva na ifitulo pono na pono, sakuva na ikinge. Iso mbesili gwemuvango gwa ukuteseka ndawe umung'inetu peakwivikula. 9“Nayi nyenye mwikomalilage inumbula senyu. Pakuva savavasindika nyenye pawuhigilo, na mumasinagogi sambi mutowe, samusindikwa ku vatema na avatwa sambi muhigwe pemwivalwa ilitawa lyangu, sambi muve wolelesi kwa avene. 10Neke pesilulava ulo. Ulukani Ulunofu sa ludalikwa tandi kuvanu mbevali. 11Nawo pevavibete nyenye na ukuvasindika pawuhigilo, mulahwa kihosa chemulonga, pakuva samupelwa icha ukulonga na Umuhe Umwelu. 12Umunyalukolo amupituka umunyalukolo vakwe awulagwe; udade amupituka umwana; na avana vavagalukila avavaha vawo na ukuvawulaga. 13Avanu mbevali savavavipila nyenye, vakuvavala ilitawa lyangu. Neke yula yeyeavesaga akange mbaka pamudugo uyo yesaapokwa. 14“Neke pemuluwene ‘Uluvifyo ulwa Uwanangifu’ lulipe sipapene. (Ye akwimba alukagulage!) ipo avanu ve vali ku Yudaya vakimbililage mufidunda. 15Umunu ye alikwiking'a lya ikaye aliika mukaye yakwe ategule kinu. 16Na ye ali kumugunda alapiluka kukaye akategule umwenda gwakwe. 17Neke vinalyo vala vesavava na ifilo na vala vesavakoosa mufilo ifyo! 18Mwifunyage kwa Nguluvi sambi ulusika ulo, lulemwa ukuva pa ikitungwi. 19Pakuva ukuguda kwa ifilo ifyo sakulava kubi ukulutila, uluhuma ukugawa ing'i mbaka ku lino de, ukuguda uko sikwekulawoneka, na sisakuwoneka kangi nangi. 20Na wone Nguluvi akalaleke ukufikepula ifilo ifyo, asupali umunu yeakalapokwa. Lino ukwimila avahagule vakwe, Nguluvi akepwise ifilo ifyo. 21“Neke lino, wone umunu avatigile, ‘Mulavage Kilisito ali ipa!’ ‘Na vavatigile ali kula’ mulafuuwa ulo. 22Pakuva savawoneka wolofu vesavitigila vavene ve Kilisito va wudesi na avavisi va uwudesi nawo savapiga ifilagilo na uwuhulo, sambi vavayase wone luhwane na vavahagule. 23Neke nyenye mwikomalilage. Pakuva nene yendivalonje mbesili wesisilava siwoneka. 24“Neke ifilo ifyo, ukuguda pekulutye, ilisuva salipituka live lwisa, na gumwesi sisaguvala nangi. 25Na ing'eng'esi sasigwa uluhuma kwilanga, na ludali ulwa kuchanya nalo saluhogoleka. 26Ipo pesavamuwona Umwana va Umunu akusa mumafufu mu ludali ulukomi na indolo. 27Nave saavatuma vanyivaha vakwe vavakong'ase; avahagule vakwe, uluhuma imbali mbesili isitayi konivala, uluhuma pawudugo wa ing'i mbaka uwudugo wa kuchanya. 28“Ukukola umusombe mwiyigisage ikiganiso iki: Pembe muwone matagala ga imisombe gavanzile ukutopola amahamba, mulukagulage ukutigila ikifuku yekihegelye. 29Lwindahihyo pemusiwene ing'ani mbesili yesiwonike, mulukagulage ukutigila Umwana va Umunu yeahegelye mumilyango. 30Nachene nene nguvalongela, imbegalo iyi siyilutila mbaka ing'ani iso mbesili peyesikwilye. 31Ing'i na kuchanya safilutila, neke ing'ani sangu mbesili sisasilutila nangi. 32“Neke ikimunyi na ikivalilo asukuli yeakisele; nambi vanyivaha ava kuchanya nambi Umwana; pesi Dada hela yeiyena. 33Mwikomalilage mwikale miho, pakuva simukiseli ikimunyi icho kilava panili. 34Lwihwana nu umunu yeisaka ukuwuuka ulugendo yeakuyileka yeailesile ikaye yakwe neke avalagile na ukuvagavila ifipigo avakami vakwe, na ukumulongela yula munyakugosa yula umwimilisi va umulyango ikalage miho. 35Lino mwikalage miho, pakuva simukiseli ikimunyi icha umunyakaye cheasila; ukutigila yilava pamihye, pakilo, apamwinga yilava mukilo mwilangali, kangi apamwi munzogolo mwesivika, nambi pamilawu. 36Mwikalage miho alonga ase avatinukise afike mugonelye tulo. 37Na isi senguvalongela nyenye, ndilongela na avangi mbevali ukutigila: Mwikalage miho!”

will be added

X\