MALIKO 12

1Neke Yesu avanzile ukulonga nawo kwa ifiganiso, “Epwali umunu yealalimite umugunda gwa imisabibu, isitila ulusito umugunda mbeguli. Neke awuyape apono pawuhusilo wa amaveleko ga imisabibu, neke awuyape na chuwo. Swe akuvalekela avalimi imigunda neke peawuke ulugendo. 2Ulusika lwavelige lwifika ulwa ukwangula amaveleko, atumite umukami vakwe abite kwa vala avanyakubasa, akategule amaveleko amuletele. 3Vala vamwibete, neke vamutove, na ukumuhumya mu mugunda we mugaya kinu. 4Neke kangi atume umukami yungi; swe nave vakumuvayula lweya mumutwe na ukumupigila imbi. 5Umunyamugunda amutumite yungi kangi, uyo vamuwulige na avangi avaasige vavapigile ndahihyo, avamwi vavatofile na avamwi vavawulige. 6Ino alasigise umunu yumwi hela, umwanakwe umwende vakwe. Uyo nave pambele amutumite itigila, ‘Uyu apamwinga vamwogopa pakuva muswamuvangu.’ 7Neke vala avanyakubasa umugunda valongane vavene ng'ani, ‘Uyu ye munya lilila lya umugunda, ino lekage tumuwulage, na ililila live lyetu!’ 8Swe vakumwibata, vakumuwulaga, vakumutosa kwivala uluhuma pa mugunda gwa imisabibu. 9“Lino yula umunyamugunda avagita ndawuli? Saasa avasinde avanyakubasa umugunda, na umugunda ugo gwa imisabibu saavabasikisa avangi. 10Mbi ndawuli nyenye Uwandike uwu simwemulimba? ‘Iliganga lila lyevalibihye avasenzi, ilyo live liganga likomi lya mulubali. 11Ulukani ulu luhumite kwa Umutwa, nalo wuhulo pamiho getu. 12Avatambisi avavina, avigisi va indagilo na avavaha valukagwe ukuta ikiganiso icho avaselengige avene. Nambi vagahige ukumwibata, neke ulwene vawogopige vamalugu. Swe vakumuleka, swe vakwibitilaga. 13Swe vakuvatuma kwa Yesu Avafalisayo na Avahelode, sambi vamugwilise Yesu mu ng'ani sakwe. 14Neke vamubitile vamutigile, “Mwigisi, tukulukagula ukutigila veve wi munu wimulongela mumwene, na siwakwogopa uwuvina wa munu. Pakuva siwawilava uwusu wa umunu wakwigisa mumwene ulukani lwa Nguluvi. Lino witigila ndawuli lunoje tuhombe imbemenenge kwa Kaisali apangi nda?” Tutawulage, tulatawula? 15Nave, we akulukagula ukutigila vabuganisi, swe Yesu akuvatigila, “Mbi ndawuli nyenye mukungela? Mlete iligobole ndave.” 16Swe vakumusindikila. Neke avalongele uwusu uwu na ilitawa ili lya nani?” Neke vamutigile, “Lya Kaisali.” 17Neke Yesu avatigile, “Mumupelage Kaisali ifya Kaisali na ifya Nguluvi mumupelage Nguluvi.” Swe visasavala hilo. 18Neke Avasadukayo avitigila kugaya ulusilibuko vahele kwa Yesu, neke vamuwuse, 19“Mwigisi, Musa atwandiche ululagi ulwitigila: ‘Wone umunu afwe amuleke uvakwe mugaya mwana, umunyalukolo va yula yeafwe amutegulage yula umufwile sambi amwegalile yula yeafwe avana.’ 20Lino vepovali avanu vimufung'ati avegalwa pamwinga. Umuvina ategwe umung'inetu, neke afwe we mugaya mwana. 21Umunyalukolo va kavili nave amutegwe yula umung'inetu, nave afwe wesalekiti mwana; na uva wudatu nave ndahihyo. 22Na mbevali ndawe vimufung'ati vamulekite yula umung'inetu mugaya mwana. Pambele nayu ng'inetu yula aafwe. 23Lino pa ikimunyi cha ukusilibuka avanu mbevali uluhuma mufwa, umung'inetu uyo saava mukina nani? Pakuva mbevali ndawe vimufung'ati vevamutegwe.” 24Neke Yesu avatigile, “Nyenye mwiyaga pakomi, pakuva simuwuseli uwandike uwelu na uludali lwa Nguluvi. 25Pakuva vevafwe pevave vasilibwike sivitegulagi nambi kugomwa; vaviva vihwana vanyivaha va kuchanya. 26Na ulo lwa avanu ukusilibuka mbi simwemulimba mukitabu cha Musa pa mulyango gwa ikisaka chechakige umoto? Nguluvi amulonje Musa ukutigila, ‘Nene ndi Nguluvi va Abulahamu, Nguluvi va Isaki na Nguluvi va Yakobo.’ 27Lino umwene si Nguluvi va avafwe nda, umwene Nguluvi va awumi. Nyenye mwiyaga pakomi.” 28Uyumwi va avigisi va indagilo afikite neke apulike lwevakwibesa. Avelige ipulika ulwa Yesu avapitwe wunofu, nave ahele amuwuse Yesu, “Mundagilo mbesili ululutye lulikwi?” 29Neke Yesu amutigile, “Lwa ukutala lwe ulu: ‘Pulikage veve Isilaeli! Nguluvi vetu ye Nguluvi yeiyena. 30Nayuveve mwendage Nguluvi vako munumbula yako mbeyili, na mu umutima gwako mbeguli, na mu uluhala lwako mbeluli na mu uludali lwako mbeluli.’ 31Na ulwa kavili lwe ulu, ‘Mwendage umuyago ndawe inumbula yako yiveve.’ Pagaya ululagi ulungi, ulukomi lwelulutye kwa isi.” 32Swe yula umwigisi va indagilo akumutigila, “Nachene ulonje mumwene ukutigila Nguluvi iyena, pagaya yungi pesi yumwene hela. 33Na ukumwenda kwa inumbula yako mbeyili, na kwa uluhala lwako mbeluli na kwa uludali lwako mbeluli na umuyago ndawe inumbula yako yuveve, ulukani ulo lwelulutye ku fitawulwa na inambika mbesili.” 34Nave Yesu avelige akumuwona ukuta alonzile kwa luhala, swe akumutigila, “Veve siulipataali na uwutwa wa Nguluvi.” Uluhuma baho, pagaya umunu yeigelye ukumuwusa kangi Yesu lukani. 35Neke Yesu pe akwingila mu Tembeli. Avawusise, “Mbi ndawuli avigisi va indagilo vavitigila Kilisito Mwana va Daudi? 36Kono Daudi yumwene peilongoswa na Umuhe Umwelu atigee: ‘Umutwa atigee kulumutwa vangu. Teng'emale kuliwoko lyangu ilya kundyo, mbaka pendivaletite avatavangu vako pamagulu gako.’ 37“Umwene Daudi akumukemela Mutwa. Lino luva ndawuli ave kangi Mwanakwe?” Neke ililugu ilya avanu vamupulikisige kwa luhekelelo. 38Neke Yesu avalongele peakuvigisa, “Mwikomalilage na avigisi va indagilo, aviwendaga ukugenda vafwite isopeka inaali sa ulutogo, na ukuhungilwa mumakasi, 39na ukwikala pawulongolo mumasinagogi na mufigoda ifya muwulongolo mumbungo. 40Vakuvawonela avang'inetu avafwile, nu kutegula ifinu fyawo, kono we vakuvabuganisa nu kwifunya lusika, iwo savahigwa pakomi ukulutila.” 41Nave Yesu alikalite pipi na pala pevisopaga ifitawulwa, mu kinyawugali cha mu tembeli avawene avanu lilugu visopa ifitawulwa. Avanono vasopige amagobole molofu. 42Aasile umung'inetu yungi, mufwile, kangi mumikaa, uyo asopite amagobole makefu wita figobole fivili hela. 43Neke Yesu avatigile, avanyigendo vakwe, ukutigila, “Nachene nguvalongela uyu umufwile umumikaa atawe ukulutila mbevali avatawe ifitawulwa mukinyawugali. 44Pakuva avangi mbevali vasopite ifinu fyefivalutye uwolofu, neke uyu umung'inetu umumikaa, muwumikaa wakwe atawe mbefili fyeakalinafyo, na fyeakalaahuvye.”

will be added

X\