MALIKO 10

1Ndawe Yesu ahegige pala neke abite kulutanana ulwa ku Yudaya na kumwambu ya umukoga gwa ku Yolodani. Neke kangi vamalugu vakong'ane, ndawe Yesu lwealasovye mbepali swe ivanga ukuvigisa. 2Neke Avafalisayo vamusye Yesu sambi vamugele swe vakumuwusa, “Ndawuli lulagile kulumunu ukumuleka uvakwe?” 3Yesu avapitwe, “Musa avalaje ndawuli nyenye?” 4Neke vamutigile, “Musa atigee umunu amulekage uvakwe kwa ukumupela ulwandiko lwa ukulekana sive viva valekine. 5Neke Yesu avatigile, “Wimila uwutalamu wa inumbula senyu nambi Musa aandike ululagilo ulu. 6Neke uluhuma pakugawa avanu, Nguluvi agafile umunyidama na umung'inetu. 7Paulu umunyidama amuleka udade na uyuve neke abaning'ane pamwi na uvakwe. 8Na iwo avavili savava muvili gumwi viva sipevavili kangi nda vave muvili gumwi. 9Neke kila che aluming'ise Nguluvi umunu alakilekasa.” 10Na pevafisile kangi mukaye avanyigendo vamuwusise Yesu kangi ulukani lulula. 11Neke avatigile, “Yeyeamulekaga uvakwe neke ategule yungi, uyo iva mugoni. 12Neke umung'inetu yeakumuleka uvakwe neke agomwe kwa uyungi, apo nave iva mugoni.” 13Avanu vamusindikilage Yesu avana avadodo, ulwa sambi avapamise neke avanyigendo vavakenyele. 14Neke Yesu pealuwene ulu avifile, neke peavatigile, “Muvaleke avadodo vase kwa nene, mulatanila pakuva avana avindawe iva uwutwa wa Nguluvi wawo. 15Nachene, nene nguvalongela nyenye yeyeavesaga siakwanukila Uwutwa wa Nguluvi ndawe umwana mudodo sisaingila kuwutwa wa Nguluvi.” 16Neke peavategule mumawoko gakwe, neke avafunyilile, na ukuvageleka amawoko gakwe. 17Na Yesu peavangige ulugendo umunu uyumwi aasile kikimbila neke amufugamile amuwuse, “Ve mwigisi vemunofu, ngite ndawuli sambi nzingile kuwumi wa mbepali?” 18Neke Yesu amutigile, “Mbi ndawuli ukung'emela ndimunofu? Asukuli umunu umunofu pesi Nguluvi hela yeiyena. 19Ukusikagula indagilo; Ulawulaga, ulava mugoni, ulahisa, ulolelela wudesi, uladeta uvesage na choga kuludado na kuluyuwo.” 20Neke amutigile, “Mwigisi, isi mbesili ndinatye uluhuma pawana wangu.” 21Neke Yesu amulavile swe akumwenda neke amutigile, “Ukepite kinu kimwi hela bite ukaguse mbefili fyewinafyo uvapele avamikaa nayuveve sauva na uwunono kuchanya, neke pewuse uninile nene.” 22Peapulike ulo avifisile se ikumbing'ana ku miho swe ibitaga we avifile pakomi, pakuva ali munono hilo. 23Neke Yesu alave mbekuli mbekuli neke avatigile avanyigendo vakwe, “Saluva lutalamu kwa vala avanono ukwingila ku Wutwa wa Nguluvi.” 24Neke avanyigendo vasasavale ulwa ing'ani sakwe. Neke kangi Yesu avatigile, “Nye vana, sakuva lutalamu wuli ukwingila ku wutwa wa Nguluvi! 25Lupefu ingamiya ukukola mukidwi icha ulusingi neke sindawe umunu umunono ukwingila ku Wutwa wa Nguluvi.” 26Neke vasasavale hilo neke vamutigile, “Mbino ye nani yeahwanite apokwe?” 27Neke Yesu avalavile, neke atigile, “Ku vanu siluhwaniti, neke si kwa Nguluvi nda, pakuva ifinu mbefili fihwanite ukupigika kwa Nguluvi.” 28Petulo neke avange ukumulongela Yesu, “Lavage hwehwe tufilesile mbefili neke tukuninile veve!” 29Yesu atigee, “Nachene, nene nguvalongela nyenye, asukuli umunu yeailesile ikaye, nave vanyalukolo vakwe, nave avahase, nave uyuve, nave udade, nave avana, nave gimigunda ukwimila ilitawa lyangu na Ulukani Ulunofu. 30yesisaanukila kanyigana ulwalino, ikaye na avanyalukolo vakwe na vahase na vayuve na vana na gimigunda pamwi nasi neseko, neke pambele uwumi wa mbepali na mbepali. 31Neke awolofu avalongola savalava vamumbele neke avamumbele savalava valongola.” 32Na pevali mulugendo, vasogwe ku Yelusalemu, Yesu alalongwe, neke vasasavale, nawo avamuninilige vave na muhwehwe. Neke avategule palubali avanyichumi na vavili kangi, swe ivanga Ukuvalongela lula uluwoneka kulumwene, 33itigila, “Mulavage, tusogwe ku Yelusalemu, neke Umwana va Umunu atawulwa ku vatambisi avavina na avigisi va indagilo, nawo vamuhiga sambi awulagwe, na ukumutawula kwa avamyanza. 34Nawo vamwelanga, vamufunyila amati, vamutova na imikungo iminyamifwa na ukumuwulaga, neke pefilutye ifilo fidatu asilibuka.” 35Neke Yakobo na Yohane, avana va Sebedayo, vabite kwa Yesu neke vamutigile, “Mwigisi hwehwe twisaka utupigile chechekivesaga chetukusuka veve.” 36Neke avatigile, “Mwisaka nene ndivapigile kiki?” 37Neke vamutigile, “Lekage hwehwe tuteng'emale, uyumwi kwiwoko lyako lya kundyo neke uyumwi kwiwoko lyako ilya kung'igi, mundolo sako.” 38Neke Yesu avatigile, “Simukukikagula che mwisuka! muhwanite ukunywela ikinywelo cha uluteseko chenywela nene nave uwubatiso wendibatisiwa nene?” 39Neke vamutigile, “Tuhwanite.” Neke Yesu avatigile, “Ikinywelo chendandinywela nene munywela, na uwubatiso wendibatisiwa nene, nayi nyenye mubatisiwa. 40Neke ulwa ukuteng'emala kuliwoko lyangu lya kundyo nave ilya kung'igi ulo si lwa nene ukuvapela, Ulo lwa vala avavikile.” 41Neke vala avanyichumi peyevapulike swe vivanga ukuvavipila va Yakobo na Yohane. 42Neke Yesu swe akuvakemela, neke avatigile, “Mukulukagula ulwa ukutigila vala avavikagulanika ulwa vatema mu vamyanza vavitema kwa ludali na avavina vawo vakuvavika avanu muwuvanda. 43Ino sisaluva ndahihyo kwa nyenye, pakuva yeisaka ave muvina mwa nyenye ava mukami venyu. 44Neke yeava mulongola mwa nyenye ava mukami va mbemuli. 45Pakuva nayu Mwana va Umunu siasili apigilwage, pesi apigilage, na ukutawula uwumi wakwe sambi luve luhombo lwa awolofu. 46Neke vafike ku Yeliko, nave Yesu pealutilige mu Yeliko pamwi avanyigendo vakwe na vamalugu, Batimayo, yeali mubofu umususi, umwana va Timayo, eateng'eme palubali pa ng'asi. 47Neke peapulike ulwa ye Yesu uva ku Nasaleti, avanzile ukukoola itigila, “Yesu ve Mwana va Daudi, umbonelage ulusungu nene!” 48Neke awolofu vamukenyele, akatuke, neke umwene aginite ukukoola hilo, “Ve Mwana va Daudi umbonelage ulusungu nene!” 49Swe Yesu akwima neke atigile, “Mumukemele.” swe akumukemela umubofu na ukumutigila, “Wikangase! Wime, akukukemela.” 50Neke atage isopeka yakwe, swe idibuka ibita kwa Yesu. 51Neke Yesu amutigile, “Wisaka ngupigile kiki veve?” Neke umubofu amutigile Yesu, “Mutwa ngukusuka ndave.” 52Neke Yesu amutigile, “Wibitilage, ulufuuwo lwako lukuponise.” Na ulusika lulula swe ilava na ukumuninila Yesu kwe abitige.

will be added

X\