LUKA 20

1Ikimunyi ikimwi, Yesu peavigisige avanu mu tembeli na ukudalika ulukani ulunofu, avavina va avatambisi, na avigisi va indagilo pamwi na avavaha, vamusye, 2Neke vamulongelage vatigilage, “Tulongele! Wipiga ing'ani iso kwa ludali luki, kangi yenani yakupelye uludali ulu? 3Neke avapitule avatigile, “Nane ndivawusa nyenye lukani, mundogele: 4uwubatiso wa Yohane wahumile kwa Nguluvi apangi kuvanu?” 5Swe vakwiyisa we vavene ng'ani vitigila: “Manyi tutigile wahumite kuchanya, atigila: ‘Apo mbi ndawuli pe simwamufuuvitwi?’ 6Na manyi tutigile wahumile ku vanu, avanu mbevali vatukinya na amaganga, pakuva vevamwidiche Yohane ukuta muvisi.” 7Swe vipitula ukuta, “Situluseli kwe wahumile.” 8Neke Yesu avatigile, “Nayinene singuvalongela nyenye ukuta kwa ludali luki ndipiga isi.” 9Swe Yesu ivanga ukuvalongela avanu ikiganiso iki, “Umunu uyumwi ali na mugunda gwa misabibu, swe ibasikisa avalimi ndawe ahegige nu kwikala kungi musika. 10Na imisika ja kutung'una amaveleko, atumite avakami kwa vala avalimi sambi vamupele amaveleko agamwi ga imisabibu. Avalimi vamutofile nu kumudaga mawoko ng'ani. 11Neke atume umukami yungi; nave neke vatove vamuhongele inyoni nu kumudaga mawoko ng'ani. 12Neke atume na vawudatu, uyu nave vamuvaywe malweya nu kumudagilisa kwivala. 13Ndawe umunyamugunda atigilige: ‘Ngitage ndawuli? Ndimutuma umwanangu umwende vangu; apamwi vamutuga.’ 14Neke vala avalimi, vave vakumuwona swe vilongana vavene vitigila: ‘Uyu ye munyalilila ili. Tumuwulage sambi ililila live lyetu.’ 15Ndawe vamugabikisige kwivala nu kumuwulaga.” Lino, “Yula umunyamungunda avagita ndawuli? 16Aasa nu kuvawulaga avalimi vala, na umugunda gula avabasikisa vangi, pevapulike iso vatige, “Nda iso silatufika!” 17Neke pe avalavile we itigila, “Kwe kutigila kiki ulukani lwe lwandikwe ‘Iliganga lyevalibihye avasenzi, ilyo live liganga likomi lya palubali?’ 18Umunu yeyeagwilaga mwiganga ilyo adenyangika na yula ye limugwilye limung'enyanga tipu!” 19Avigisi va indagilo, na avavina va avatambisi vasakige ukumwibata ulusika lulo, neke wogope avanu pakuva valukagwe ukuta mukiganiso iki avaselengige avene. 20Ndawe vavangige ukumusigamila. Vatumite avatandisi avabuganisi sambi vamwibate mung'ani sakwe na ukumutosa pa wuhigilo. 21Neke pevamuwuse vitigila, “Mwigisi, tukulukagula ukuta wilonga ing'ani sa uwugolofu, kangi wimugaya luhagu wawikwigikisa mumwene ing'asi isa Nguluvi. 22Ino ndawuli lulagile, ukuhomba imbemenenge kwa Kaisali apangi nda!” 23Neke umwene Yesu asikagwe igila sawo akuvatigila, 24“Mundagile iligobole. Lina wusu na litawa lya nani?” 25Vamupitwe, “Fya Kaisali.” Swe akuvalongela, “Apo nano, ifya Kaisali mumupelage Kaisali, ifya Nguluvi mumupelage Nguluvi.” 26Na sivahwaniti ukumwibata pala pa vanu nambi kwa lukani lungi, swe vikalite vakatwike kono we visasavala lwe avapitulige. 27Ndawe Avasadukayo, avamwi vamubitye vala avavitigilaga ulwa kugaya ulusilibuko, neke vamuwuse: 28vitigila, “Mwigisi, Musa atwandiche ukuta umunyalukolo va umunu peafwe neke amuleke umufwile mugaya mwana, umunyalukolo vakwe amutegulage ung'inetu uyo sambi amwegalilage avana yula yeafwe. 29Ino vekovali avewosile pamwi vimufung'ati. Uvakutala alategwe umung'inetu neke afwe we mugaya mwana. 30Na uva kavili amuhalite umung'inetu yula nave swe ifwa we mugaya mwana; 31mbaka na vawudatu nave amuhale. Na mbevali we vimufung'ati, vafwe wesivegali vana. 32Pambele swe nayu mung'inetu yula ifwa. 33Lino, pevasilibwike umung'inetu saava mukina nani? Pakuva e mukina mbevali we vimufung'ati.” 34Neke Yesu avalongele, “Avanu ava imisika igi vavitegula na ukugomwa; 35Neke vala avivalilwa ukuta vavaje ukuhala ing'i yila na ukusilibuka kuvafwe sivitegulagi kangi sivigomwagi. 36Kangi sisavafwa nda, pakuva savalava nda vanyivaha na vana va Nguluvi, ndawe weviwali avana va ulusilibuko. 37Neke ulwa avafwe lwevavisilibusiwa, na yu Musa olelye Muwandike Uwelu mumulyango gwa ikisaka chechakige, ipo pamutambwe Umutwa ukuva ye Nguluvi va Abulahamu, Nguluvi va Isaki, na Nguluvi va Yakobo. 38Nave si Nguluvi va avafwe, Nguluvi va awumi, pakuva mbevali vavinanaga kulumwene.” 39Avigisi va Indagilo avamwi vamupitule vitigila, “Mwigisi ulonje mumwene.” 40Na sivigeli vamuwuse lukani kangi. 41Neke Yesu peavawuse, “Mbi ndawuli avanu vavilonga ukuta Kilisito mwana va Daudi? 42Pakuva umwene atigee mu kitabu cha Sabuli: ‘Umutwa amulonje Mutwa vangu: Wikale kwiwoko lya kundyo 43mbaka pe ndivavikite avatavangu vako vave nda kigoda cha ukugeleka amagulu gako.’ 44Apo Daudi pakumutambula, ‘Mutwa,’ lwiva ndawuli ave mwanakwe?” 45Na avanu mbevali pevamupulikisige, Yesu avalonje avigendo vakwe, 46“Mwikomalilage na avigisi va Indagilo, aviwendaga ukugenda vafwite isopeka inaali na ukuhungilwa mumagulilo, na ukuteng'emala apatambule mumasinagogi na mufigoda fya uwutambule munyekelelo. 47Vakuvahiisila nu kuvawonela avang'inetu avafwile, kono vakwilagila nda vanu vanofu kwa ukwifunya musika kumbi vabuganisi. Iwo savahigwa pakomi hilo!”

will be added

X\