LUKA 14

1Ikimunyi ikingi cha isabato, Yesu inje ukulya ichakulya, mukaye ya uyumwi va avavina va avafalisayo, avanu avebaho vavanzile ukumusigamila. 2Peeipwali Yesu epwali umunu umutamwa uwutamwa wa kutuna umuvili. 3Neke Yesu avawuse avigisi va indagilo na avafalisayo, “Ndawuli lugolofu ukuponia ikimunyi cha isabato apangi nda?” 4Swe avene vikatuka. Ndawe Yesu amwibatige uyo umutamwa nu kumuponia swe akumutawula ibitilage. 5Neke avatigile, “Ye nani mwa nyenye yeina umwanakwe nave senga yakwe peyigwilye mukisima yesiake aihumya nambi mukimunyi icha isabato?” 6Nawo sivigeli ukumupitula ulukani ulo. 7Neke Yesu peavalongele ikiganiso icha vala avali valaalike, lwevevahagwe ifigoda fya kuwulongolo itigila, 8“Pulaalikwe nu munu kuluwungo ulateng'emala ku kigoda icha kuwulongolo, apamwi alonga ave pwali umunu umulaalike umutambule ukulutila veve, 9Neke pease umunyakuvalaalika veve nu mwene akutigile, ‘Mulekele uyu!’ Pepene puvanga ni nyoni ukupiluka kumbele ukateng'emale. 10Apo pulaalikwe teng'emalage kumbele sambi peasile umunyakuvalaalika akutigile, ‘Munyawiyendi vangu, wuse kono kuwutalo kono, pepene puva na indolo pa avalaalike avayago.’ 11Pakuva yula yeyeavesaga akwilevesa apelwa ululumbo.” 12Neke amulongele yula yealamulaalike, “Putelike ichakulya cha pamunyi nave cha pamihye, ulakemela avanyawiyendi vako, nave vanyalukolo vako, nave avanono, valonga vakulaalike nave sambi uve uhombitwe kwa lula lweuvapije. 13Apo putelike ichakulya kemelage avamikaa, avalema, avatevafu, avabofu, 14apo pepene pupelwa uwufunyilile, pakuva iwo vihela chevakuhomba. Ipo pepene pe Nguluvi saakupela uluhombo lwako, ulusika lwe avanu vagolofu pevisilibuka.” 15Avelige ipulika iso uyumwi va vala avevateng'eme pamwi na Yesu pawulilo amulonje akumutigila, “Mufunyilile yula yesaalya ikilyo muwutwa wa Nguluvi.” 16Swe Yesu akumulongela, “Umunu uyumwi alatelike ifyakulya fyolofu nu kulaalika avanu wolofu. 17Ndawe amutumige umukami vakwe, pakivalilo icha ichakulya avevalaalike ukutigila musage pakuva ifilyo mbefili figelanise. 18Mbevali swe vivanga ukubihilila ng'ani: ‘Uva kutala amulonje ngusile mugunda ndibita kukulava ndisuka undegepele.’ 19Uyumwi swe itigila: ‘Ngusile isenga sinyichumi isa kulima ndibita ngasigele; ngukusuka undegepele.’ 20Uyumwi neke atigile: ‘Negwe umung'inetu pa ulo sinzusa.’ 21Swe umukami yula swe apilwike, nu kumulongela mbesili umuvina vakwe. Swe umunyakaye yula ivipa, nu kumulongela umukami vakwe: ‘Hume wangufye bite mumakasi na mumikuya ja muboma, kavalaalike ipa avamikaa, avalema, avabofu na avatevafu.’ 22Umukami neke atigile: ‘Mulugu, iso mbesili sulonzile yesipigike, neke ulwene na ikaye peyina kilega.’ 23Neke Umuvina amulongele umukami, ‘Hume kwivala bite mumakasi na mumbali, ukavagongolese vingile sambi ikaye yangu yimeme. 24Pakuva nguvalongela ukutigila mwavala avake valaalike, asupali nambi yumwi yesagesa ikilyo changu.’ ” 25Avamalugu pevamufwatige Yesu swe akuvapitukila akuvalongela, 26“Wone umunu ase kwa nene nave wesakumuvipila udade, nayu yuve, nayu vakwe, na vanakwe, vanyalukolo na vahase, ena nagumutima gwakwe, sahwana ukuva munyigendo vangu. 27Umunu yeyeavesaga yesitegula umusalaba gwakwe na ukuninila sahwana ukuva munyigendo vangu. 28Pakuva ye nani mwa nyenye peisaka pakusenga ikaye inali, yesiaitala tandi ukuvalila ifya ukusengela ulwa inafyo mbaka peisinda ukusenga? 29Alonga alemwe ukusinda kono we yeasenzile na lutu, neke mbevali vavange ukumubedala 30vitigila: ‘Umunu uyu akala kavanzile ukusenga, neke ave mugaya ludali lwa ukusindilisa.’ 31“Kangi kwina mutema muki, peisaka abite kukwihoma na umutema uyungi, yesiitalagi tandi ukwihosa. Umwene ina vanyigalu mbilima nyichumi wone ahwana ukwihoma na yula yeina vanyigalu mbilima machumi gavili? 32Manyi awone sahwana, atuma lukani isaka vilamule na umunu yula wepe ali pataali. 33Ndawe Yesu asindilisige itigila, “Yeyeavesaga mwanyenye, yesakufileka mbefili fyeinafyo, sahwana ukuva munyigendo vangu.” 34“Umwino kinu kinofu, neke umwino peguhupite gusopwa kiki gunone? 35Sigwinogela ing'i nambi buli, avanu vitagaga kwivala. Umunyamapulikilo gakupulikila apulikage!”

will be added

X\