LUKA 10

1Savelige silutila iso, neke Umutwa ahagule avangi machumi gimufung'ati na vavili, swe akuvatuma vavili vavili valongole muboma na ifijiji mbefili mwalahosise ukubita yumwene pambele. 2Swe akuvalongela, “Isanga nzolofu, neke avanyakupiga vakefu; lino mumusukage Umutwa va isanga sambi asindike avanyakupiga mu mugunda gwakwe. 3Lino mubitage kono mulukagulage ukuta nguvatuma nyenye nda ng'olo isibita mukipinga cha ingwami. 4Mulategula kibogolo cha magobole, nambi bogolo nave indatu, mulahungila nambi munu mung'asi. 5Pe mwinje mukaye yeyeyivelaga, mutalage ukutigila, ‘Uwikalakunoga wuvelage mukaye iyi!’ 6Manyi pwali umunu yeawenda uwikalakunoga, uwikalakunoga wenyu wikala nave, neke wone ave asupali uwikalakunoga wuvapilukila nyenye. 7Mwikalage mukaye yiyo mulisage na ukunywa fyevakuvapela, pakuva umunyakupiga ikipigo anoje ukuhombwa amahombo gakwe, mulahama uluhuma ikaye iyi na yila. 8Wone mwingile mu boma yeyeyivesaga neke avanu vavanukile nyenye, mulisage fye vakuvapela. 9Muvaponiage avatamwa vemovali, na muvalongelage avanu, ‘Uwutwa wa Nguluvi ukuta yewuhegelye.’ 10Pemwinje muboma yeyeyivesaga neke valemwe ukuvanukila muhegage umo na pemwilutila mung'asi sawo mutigilage: 11‘Nalulungundi lwa iboma yenyu ululi mumagulu getu tukuvapunila; neke mulukagulage ulu ukuta uwutwa wa Nguluvi wuhegelye.’ 12Nguvalongela, ikimunyi cha ukuhigwa iboma iyo sayihigwa pakomi hilo ukulutila avanu va ku Sodoma! 13“Winalyo veve, Kolasini! Winalyo veve Betisaida! Pakuva imiitu ijo ijapigike kwa nyenye je give gipigike mu Tilo na mu Sidoni, ve vava pesile idaha, na ukufwala amagunila nu kuteng'emala mukifu. 14Nambi ndahihyo, ikimunyi cha ukuhigwa nyenye sayihigwa ikiba ukuhigwa kwa iboma sa ku Tilo na ku Sidoni sindawe ukuhigwa kwa nyenye sakuva kukomi wuhulo. 15Nayuveve Kapelenaumu wisaka wivinie mbaka kuchanya? Sausulunulwa pasi mbaka kuvafwe!.” 16Sweno ndawe atigilige yakuvapulikisa nyenye akumulikisa nene, “Yula yeyeavesaga akuvapulika nyenye akumulika nene, na yeakubihila ukuvanukila nyenye, ibihila ukunzanukila nene. Na yeyeavelage akumbihila ukunzanukila nene ibihila ukumwanukila yula yeanumite.” 17Pambele vala avamachumi gimufung'ati na vavili vapilwike we vina luhekelelo vitigila, “Mutwa, na amasoka ginyunyuvala mwitawa lyako.” 18Umwene neke atigile, “Ngamuwene Setani isulunuka witigila lung'ali uluhuma kuchanya. 19Lavage, ndivapelye ululagi ukulivata inzoka na ingii, na uludali ululutye kwa yula umutavangu, pagaya kinu kangi chekivananga nyenye. 20Nayilino mulahekelela pakuva amasoka gakuvanyunyuvalila, muhekelelage pakuva amatawa genyu gandikwe kuchanya.” 21Pakivalilo kikila ahekelye mu Muhe Umwelu itigila, “Ngukulumba ve Dada, ve Mutwa va ing'i na kuchanya, pakuva isi uvafihite avanyafigaho nu luhala uvalaje avana. Ena, Dada, pakuva lwakunoje luve ndahihyo.” 22Neke atigile, “Nene melitwe mbefili na Dada vangu. Asukuli yeamusele Umwana pesi Dada nambi yeamusele Dada pesi Umwana na yeyeavesaga munu ye umwana awendite ukumulagila.” 23Neke avapitukile avanyigendo peviyena nu kuvalongela, “Mafunyilile amiho gegilava isi semukusiwona nyenye! 24Pakuva nguvalongela nachene ukutigila avavisi wolofu na avatwa vadobokige ukusiwona semukusiwona nyenye neke sivasiweni, na ukupulika semwipulika nyenye na sivapuliki.” 25Wonage, umwigisi uyungi va indagilo iimite akumuwusa Yesu we akumugela, itigila, “Mwigisi, ngitage ndawuli sambi nyale ku wumi wa mbepali?” 26Neke amuwuse, “Chandikwe kiki mundagilo wakwimba kiki?” 27Neke amupitule atigile, “Umwendage Nguluvi vako ni numbula yako mbeyili, na umutima gwako mbeguli, na uludali lwako mbeluli, na kwa amahosa gako mbegali, na umwendage umunyafivawo vako ndawe lwe ukwiyenda veve.” 28Neke Yesu amutigile, “Upitwe wunofu! Gitage ndahihyo nave unana kitasila.” 29Pakuva umwene asakige uwugolofu wa ukwivangila amuwusise Yesu, “Na umunyafivawo vangu ye nani?” 30Yesu amupitule, “Epwali umunu uyumwi yeahumige ku Yelusalemu ibita ku Yeliko. Na pe e mung'asi atang'ine na avaposi, swe vakumuwopola imyenda na mbefili nu kumuvayulanga vamulesile asilike. 31Neke yigave umutambisi uyumwi agendele ing'asi yiyo ave akumuwona akwete kulubali. 32Ndahihyo nayu mulevi, nave avelige ifika pala na ukumuwona akwete kulubali. 33Neke Umusamaliya, uyumwi yealimulugendo afikite peeipwali umunu yula nave ave akumuwona, amuwonie ulusungu, 34swe ihegelela nu kumusopela idifayi na amafuta mumavamba swe, akumuwopela wunofu ndawe amuhofige mu dogovi yakwe akumusindika kukaye ya avagenzi nu kumutamya. 35Ulwa imilawu yakwe atawe amagobole dinali sivili nu kumupela umunyakaye ya vagenzi itigila, ‘Mutamyage umunu uyu; na chicheutawula ikilutye nguhomba pemilwike.’ ” 36Wiwona ndawuli, “Veve mwa iwo avadatu, “Yenani yeawonike ulwa munyafivawo va yula yeatofilwe na avaposi?” 37Neke umwigisi va indagilo atigile, “Yula yeamuwonie ulusungu.”, swe Yesu akumulongela, “Ena, nave gitage ndahihyo.” 38Na pevali mulugendo viinje mukijiji ikimwi, na umung'inetu uyumwi ilitawa lyakwe Malita amwanuche kukaye yakwe. 39Malita nave eina mame ilitawa lyakwe Maliya; uyu yalateng'eme pipi na Yesu ipulikisa inzigiso sakwe. 40Neke Malita ali na fipigo fyolofu; swe ibita kwa Yesu na ukumulongela, “Mutwa, siwiwona lubi nda umamangu akundekelesa ndipiga ndiyena? Mulongele anange.” 41Swe Umutwa amupitule, “Malita, Malita, witigana na ukufwaha na nzolofu. 42Kinu kimwi swe, ikinoje na Maliya ahagwe ikinu ikinofu, chesisaapokwa na munu.”

will be added

X\