YUDA 1

1Nene Yuda, umukami va Yesu Kilisito, umunyalukolo va Yakobo, kwa nyenye avakemele na Nguluvi na nyenye ye Nguluvi udadetu akuvenda na ukulolelwa na Yesu Kilisito. 2Ulusungu, uwikalakunoga na uwende wongelekelage kwa nyenye. 3Nyevende, nditigana hilo, ukuvandikila nyenye ulwa uwupoki we tuhangite pamwi, mbwene lumbaje ukuvandikila na ukuvasukanisa muginage muwupifu ukwimila ulufuuwo lwe Nguluvi akavapelye avanu vakwe avelu sukumwi hela. 4Pakuva avangi vakinje kinyele avanu vala ve uluhuma pidaha vavikile uluhigilo ulu, avanu avagaya Nguluvi vevidulika uwuwuya wa Nguluvi vetu sambi vapige isa uwanangifu na ukumubihila Umutwa vetu, yeiyena Yesu Kilisito. 5Ino ndiwenda ndiviwuse nyenye nambi we yemwemusipulike hilo, ukuta Umutwa yula yeavapokite avanu na uluhuma mung'i ya ku Misili, pambele avawulige vala vesivevafuuvitwi. 6Na vanyivaha vala vesivinatyi ikilega chawo, neke vahege pawikalo apepavanoje vapingitwe ni minyololo ulwa mbepali ku lwisa ulukomi, mbaka kukimunyi cha uluhigilo ulukomi, 7ndawe lwave ku Sodoma na ku Gomola, na mu boma isemwipi kwe avanyang'i vakwe vapigite isa uwanangifu, visopite mu sa uwugoni viva kiganiso cha ulupumo ulwa umoto gwa mbepali na mbepali. 8Na ulo lweviwali kangi avanu iva mumaloto gawo gakuvatifusa imivili jawo, vibesa ululagi lwa Nguluvi na ukufiliga ifinyandolo. 9Nambi yi Mikaeli, Umunyivaha Umuvina, sapigiti ndahihyo. Mu lwitakilo na yula umwanangifu pevibesige vakwivala umuvili gwa Musa, siagesili ukulonga ulupumo ulutalamu kulumwene pesi ukutigila, “Umutwa yumwene akukenyele.” 10Neke avanu iva viligaga chechekivesaga chesivakikagwi na ifinu fila fyevakufikagula wesivakwiwusa viva nda lwefipigaga ifikanu ing'ani iso sikuvawulaga vavene! 11Vinalyo avanu iwo! Pakuva viva mumigendele ija Kayini, vakwitawula mwalulo sambi vakwave uwunono wa uwanangifu wa Balamu neke vafwile mu lubesa lwa Kola. 12Iga mambilila pemwilya ifilyo fyenyu pamwi, pakuva vilya chaka vanyalwiyendo; viva nda mafufu amagaya ululenga agisogoswa na ing'ala; vindawe imibiki imigaya maveleko pa mwesi umulagasa igifwilye ng'ani, imikuule; 13amavingo amatalamu ga inyanza agihumya ilifulo lya wuhonganyoni wawo viva nda ing'eng'esi isibumangilaga na uwutitu wa mbepali ye fuka yawo. 14Mwa isi nambi Enoki yeali mu mbegalo ya mufung'ati uluhuma kwa Adamu avilite itigila, “Lavage Umutwa aasile na avanyivaha vakwe avelu vesivahwaniti vavalilwe, 15avahige avanu mbevali ukuling'ana na ifipigo fyevapigite ifya uwanangifu ifisutine mung'asi ya Nguluvi na imbi sevalonzile isisutine na umwene.” 16Avanu iva vakwilonganza mbepali na sivikwilagi na ifinu; vavisogoswa na uwudobokesi wawo, vanyalwitupyo, vanyakwiyendelesa ku vanu sambi vambule kinu. 17Vanyawende ino luvavaje ukwiwuka, lwevavilite avanyigendo va Umutwa vetu Yesu Kilisito; 18Avene vavalonje ukuta, “Ifilo fya kumudugo, saveleluka avanu vanyalwelango avisogoswa na uwudobokesi wao.” 19Iwo ve vanu avakwambusaga ulwilekano; avanu avanyamahosa ga mung'i avagaya Umuhe va Nguluvi. 20Neke nyenye, vanyawende vangu, muginage ukuvina hilo mulufuuwo lwenyu ulwelu, mwifunyage muludali lwa Umuhe Umwelu, 21Nyenye, musigalage muwende wa Nguluvi; musindilage ulusungu lwa Umutwa Yesu Kilisito mbaka mupelwe uwumi wa mbepali. 22Muvasukanisage vala avamwi avisina; 23muvapokage avamwi ndawe umunu yemukumuhesa uluhuma mumoto, ku vangi muvelage na ulusungu pamwi na ichoga, mwinyinyalage na gimyenda jawo imitifuse mu nzanangifu sawo isa umuvili. 24Kulumwene yeahwana ukuvalolela mulongamugwe, na ukuvaleta nyenye mwivagaya wananzi mbaka pa indolo sakwe pamwi nu luhekelelo, 25kulumwene Nguluvi yeiyena, umupoki vetu ukukola kwa Yesu Kilisito Umutwa vetu, sivelage indolo, uwuvina, uwutema na ululagi, wesigilafika imisika mbegili na kulino na mbepali! Ena.

will be added

X\